Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Te Pawulus lolontonga mota nga'amila anggota lo Mahkama lo agama boyito wawu loloiya odiye, ”Mongowutato, to pongorasa latiya sambe dulahe ingontiye botiye watiya tumu-tumula wolo hilawo beresi to talu lo Allahuta'ala.”

² Bo te Ananiyas imamu da'a boyito lopoahu mao ta hetihula to tili le Pawulus molambali mao tunggile Pawulus.

³ Te Pawulus loloiya mao ode oli imamu da'a boyito odiye, ”Allahuta'ala ma molambali oli imamu, weyi tawu munapiki odelo dinginga ma lototahu ceti-ceti moputio! Ti imamu masatiya hulo-huloa hemomutoa olatiya moturuti mao hukum, bo ti imamu lohihilawo lolambanga hukum boyito wolo ulopoahu to tawu lolambali olatiya.”

⁴ Ta hetihula to tili le Pawulus loloiya odiye, ”Yio hemohina oli imamu da'a ta bilintao Allahuta'ala.”

⁵ Te Pawulus lolametao odiye, ”Mongowutato, dila otawa latiya tiyo ti imamu da'a. Memangi woluwo tula-tulade to kitabi odiye, ’Dila mowali timongoli mohina tauwa lo bangusamu.’”

⁶ Otawa le Pawulus deu ngotayadu anggota lo Mahkama lo agama boyito tawu-tawuwala ta o pahamu Saduki wawu ngotayadu tawu-tawuwala ta o pahamu Parisi. Sababu uwito, tiyo loloiya to delomo Mahkama lo agama boyito odiye, ”Mongowutato, watiya botiye tawu ngota ta o pahamu Parisi wawu waliya lo ta o pahamu Parisi. Watiya iladililiyo teye sababu hemoharapu deu ta ma lopowate ma popobongulo mayi lo Allahuta'ala monto kuburu.”

⁷ Tou yilapatao te Pawulus loloiya odito, to wolota lo ta o pahamu Parisi wawu tawu-tawuwala ta pahamu Saduki ilowaliya lo butola, tunggulo tawu-tawuwala ta heambuwa boyito ma lotayade duluwo.

⁸ Sababu tawu-tawuwala ta o pahamu Saduki paracaya deu ta ma lopowate didu tumumulayi. Timongoliyo olo paracaya deu malaikati wawu roh yito diyaluwo. Bo tawu-tawuwala ta o pahamu Parisi paracaya deu nga'amila boyito woluwo.

⁹ Lapatao ma lowali buluhuta da'a. Ngololota ta ahali lo Tawurat to wolota lo ta o pahamu Parisi tilimihulayi turusi hemomutola wolo uto'otutuwa wawu loloiya odiye, ”Ami dila lo'otapu totala tuwawu mao to tawu botiye! Wolo talaliyo wonu woluwo roh meyambo malaikati lobisala ode oliyo!”

¹⁰ Buluhuta boyito ma lotanggalo, tunggulo panglima lo pasukan boyito ma yilohe bolo te Pawulus ma po'opate limongoliyo. Uwitolo sababuliyo tiyo lomarenta mao ode mongopajuleliyo molahe mota mohama mayi ole Pawulus monto wolota limongoliyo wawu modelo mola oliyo ode markas.

¹¹ Tou lombuhuyiliyo mola ti Isa Eya tilimihulayi to tili le Pawulus wawu loloiya odiye, ”Pawulus, po'olotola mola hilamu! Debo odelo yio wolo uto'otutuwa helohungguli mao pasali tomimbihu Wau to kota lo Yerusalem botiye. Odito olo yio musi mohungguli lo pasali boti to kota lo Roma.”

¹² Didimodupa mola woluwo ngololota tawu lo Yahudi ta ma losatujuwa wawu lotadiya deu timongoliyo dila monga wawu mongilu wonu timongoliyo dipo lohinggi nyawa le Pawulus.

¹³ Jumula lo ta losatujuwa boyito wopatopulu apingolota.

¹⁴ Timongoliyo nga'amila mota lotaluwa wolo mongotauwa lo imamu wawu ta dudula'a-dudula'a tawu lo Yahudi wawu loloiya odiye, ”Amiyatiya ma lotadiya dila monga wawu mongilu wonu amiyatiya dipo lohinggi nyawa le Pawulus.

¹⁵ Pohile lamiyatiya alihu timongoli wolo Mahkama lo agama mopoahu mao panglima lo pasukan mopotaluwo mayi le Pawulus ode olimongoli. Popobilohe mao bo odelo timongoli ohila muli momarakisa to'otutuwa parakaraliyo boyito. Ami ma sadiya molabodu wawu mohinggi nyawaliyo tou dipo tunggula mota ode olimongoli.”

¹⁶ Bo patuju limongoliyo boyito ilodungohe lo pouwala'a le Pawulus. Uwitolo sababuliyo pouwala'aliyo boyito lonao mola wawu lomaso ode markas lopotunggulo pasali boyito ode ole Pawulus.

¹⁷ Lapatao te Pawulus loibodeyi tauwa lo pasukan ngota wawu loloiya ode oliyo odiye, ”Delowa mao ta bohulotawu botiye ode oli panglima lo pasukan. Woluwo pasali tuwawu u poposambewoliyo ode oli panglima.”

¹⁸ Lapatao tauwa lo pasukan boyito lodelo mao ta bohulotawu boyito ode oli panglima wawu loloiya odiye, ”Te Pawulus ta tatahangi boyito lotiyanga olatiya wawu lohile alihu ta bohulotawu boti delo mayi latiya motaluwa woli tuwani, sababu woluwo pasali tuwawu u ohila poposambewoliyo ode oli tuwani.”

¹⁹ Panglima lo pasukan boyito lodihu mao olu'u lo ta bohulotawu boyito wawu dileloliyo lotipotia mota lapatao lohintu ode oliyo odiye, ”Uti, wolo u ohila polelemu ode olau?”

²⁰ Ta bohulotawu boyito lolametao odiye, ”Tuwani, woluwo tawu lo Yahudi ngololota ma loheluma mohile oli tuwani modelo mota oli om Pawulus lombu motaluwa wolo Mahkama lo agama. Ontonga mayi lo tawu Mahkama lo agama boyito odelo u ohila momarakisa to'otutuwa oliyo.

²¹ Bo pohile latiya ti tuwani dila moturuti hihile limongoliyo boyito. Sababu to wolota limongoliyo woluwo wopatopulu apingolota ta ma molabode oli om Pawulus tou dipo tunggula mota ode Mahkama lo agama. Timongoliyo ma lotadiya deu timongoliyo dila ta monga wawu mongilu wonu dipo lohinggi nyawa li om Pawulus. Masatiya botiye timongoliyo ma hesadiyawa wawu hewulata putusani li tuwani.”

²² Lapatao panglima lo pasukan lomarenta mao ta bohulotawu boyito lohuwalingo wawu lolahuli odiye, ”Dila mao poleleya to tawu deu yio botiye ma lopotota lo pasali botiye ode olau.”

²³ Lapatao panglima boyito loibodeyi tauwa lo pasukan dulota wawu loloiya ode olimongoliyo odiye, ”Poposiyapuwa mao pajule dulohetutolota monao lo oato wawu pitulopululota pajule to wadala wawu dulohetutolota pajule ta hedelowa totobuo monao ode kota lo Kayisareya jamu sambilan huyi boti.”

²⁴ Lapatao tiyo lomarenta mao olo moposadiya mao lo wadala u taeya le Pawulus wawu modelo mota oliyo wolo usalamati mota motaluwa wole Peliks gubornur lo lipu boyito.

²⁵ Panglima loluladeo tulade ngopita odiyamola tuwangiyo,

²⁶ ”Ode oli tuwani, gubornur Peliks ta mopiyohe hilaliyo. Salamu lonto olatiya, te Klawudiwus Lisiyas.

²⁷ Pe'epe'enta wolo tulade boti watiya loidelo mayi tawu ngota. Tawu botiye yilaupiyo lo tawu lo Yahudi wawu ma ngope'e yilinggila limongoliyo nyawa tou watiya wawu mongopajule lonao mota lopobebasi oliyo. Sababu watiya lo'odungohu deu tiyo boyito raiyati lo yiladiya lo Roma.

²⁸ Sababu ohila otawa latiya wolo u hepopotuludu lo tawu ode oliyo, watiya lodelo mota tawu boti lotaluwa wolo Mahkama lo agama limongoliyo.

²⁹ U lotapu latiya tiyo pilopotuludeliyo lo pasa-pasaliyala lo hukum lo agama limongoliyo. Bo diyaluwo tuwawu mao u hepilopotuludiyo boyito u patuti mowali sababu tiyo hukumaniyola mate meyalo ulungolo.

³⁰ Woluwo tawu ngota lopo'ota mayi ode olatiya deu woluwo heluma o patuju mohinggi nyawa lo tawu botiye. Uwitolo sababuliyo watiya ngointa lolawo mayi oliyo ode oli tuwani wolo tahuli ode nga'amila ta o masa'ala woliyo, alihu timongoliyo moda'awa oliyo to talu li tuwani.” Odito tuwango tuladiyo le Klawudiwus Lisiyas.

³¹ Lapatao tauwa lo pasukan dulota boyito lohutu mao odelo u ma pilomarenta lo panglima boyito wawu lohama mayi ole Pawulus huyi boyito dileloliyo ode kota lo Antipatris.

³² Lolombuliyo mola mongopajule ta hetaeya to wadala lopoturusi lo nonao limongoliyo wole Pawulus wawu ta henaowa lo oato ma muli lohuwalinga ode markas.

³³ Tou mongopajule ta hetaeya to wadala ma ledungga mota ode kota lo Kayisareya, tuladi panglima boyito yilohi mao limongoliyo ode oli gubornur wawu te Pawulus ma dileloliyo mao ode taluliyo.

³⁴ Tou ti gubornur lobaca mao lo tulade boyito, tiyo lohintu ole Pawulus lonto utonu asaliliyo. Tou ilotawaliyo mao te Pawulus lonto propinsi lo Kilikiya,

³⁵ tiyo loloiya odiye, ”Wau momarakisa parakaramu wonu ta o masa'ala wolemu ma ledungga mayi.” Lapatao tiyo lomarenta mao alihu te Pawulus tahangiyaliyo to istana li gubornur u omo-omolu mayi lowali istana le Herodes ta bohuliyo.

Kisah Para Rasul

Video Kisah Para Rasul 23

Ikuti Kami:

KONTAK | PARTISIPASI | DONASI