Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Paulus mandeng ka reng-oreng anggotana mahkamah jareya, laju adhabu, "Tan-taretan bangsa Isra’il! Sampe’ are mangken paneka kaula e dhalem ate ta’ apangrasa sala ka Allah e dhalem carana odhi’ kaula."

² E bakto Paulus adhabu kantha jareya, Imam Agung Ananiyas makon oreng se manjeng e seddi’na Paulus namper lesanna Paulus.

³ Paulus laju adhabu ka imam agung jareya, "Sampeyan masthe etamper sareng Allah, he, oreng monafek se ce-masocce! Sampeyan alenggi e ka’iya ngadilana kaula menorot hokomma Mosa, mangkana sampeyan dibi’ ta’ atoro’ ka hokom ganeka kalaban nyoro oreng namper colo’ kaula!"

⁴ Reng-oreng se badha e seddi’na Paulus jareya ngoca’ ka Paulus, "Ba’na reya ya-nyeya imam agungnga Allah!"

⁵ Saodda Paulus, "O, tan-taretan, kaula ta’ oneng ja’ ka’dhissa’ imam agung. Pajat e dhalem Alketab esebbuttagi, ‘Ja’ sampe’ ba’na ya-nyeya pamimpinna bangsana ba’na.’"

⁶ Paulus ngoladi ja’ reng-oreng anggotana mahkamah jareya sabagiyan badha se kaetong reng-oreng Saduki ban laenna reng-oreng Farisi. Daddi Paulus laju adhabu ka mahkamah jareya, "Tan-taretan bangsa Isra’il! Kaula oreng Farisi, toronanna oreng Farisi. Kaula eadili e ka’iya polana kaula parcaja ja’ oreng se mate bakal odhi’a pole."

⁷ E bakto Paulus adhabu kantha jareya, reng-oreng Farisi ban reng-oreng Saduki se badha e jadhiya molae atokar, sampe’ sidang jareya pecca daddi dhu golongan.

⁸ (Sabab reng-oreng Saduki parcaja ja’ oreng mate ta’ bakalodhi’a pole, ja’ malaekat reya tadha’, ban roh-erroh tadha’ keya; dineng oreng Farisi parcaja ja’ jareya kabbi badha.)

⁹ Daddi e jadhiya laju ce’ baridhuna. Badha reng-oreng Farisi se daddi guru agama manjeng sarta nangtang theng-mathettheng; oca’na, "Mon ca’na kaula sadaja, oreng paneka tadha’ salana sakale! Kadiya pajat badha erroh otaba malaekat se abu-dhabu ka oreng paneka!"

¹⁰ Se atokar laju ce’ daddina sampe’ komandhan gella’ tako’ Paulus me’ egaruyu’ bi’ reng-oreng jareya. Daddi komandhan jareya nyoro pasukanna ngala’ Paulus dhari nga’-tengnga’anna oreng se bannya’ jareya sarta pas esoro giba ka markas.

¹¹ Kalagguwanna malem Isa ngadek e seddi’na Paulus, laju adhabu, "Pakowat atena ba’na! Ba’na la nyakse’e Sengko’ e Yerusalim reya. Ba’na kodu nyakse’e Sengko’ e Roma keya."

¹² Kalagguwanna gu-laggu badha reng-oreng Yahudi molae asakongkel. Reng-oreng jareya asompa ta’ ngakana ban ta’ ngenoma mon gi’ ta’ bisa mate’e Paulus.

¹³ Se asakongkel kantha jareya lebbi dhari pa’ polo oreng.

¹⁴ Reng-oreng jareya laju entar ka mam-imam kapala ban pin-pamimpin Yahudi, laju ngoca’, "Kaula ampon padha asompa ta’ neddha’a sareng ta’ ngenoma pa-ponapa manabi gi’ ta’ mate’e Paulus.

¹⁵ Samangken Tan-taretan sareng para anggotaepon Mahkamah Agama ka’dhinto’ kasokana ngerem serrat ka komandhannepon pasukan Roma ka’dhissa’, nyo’on sopaja Paulus epangadhep ka sampeyan pole, tha-kantha parkarana epareksa’a pole epateteya sareng sampeyan. Kaula sadaja padha asadhiya mateyana Paulus ganeka sabellunna napa’ ka ka’dhinto’."

¹⁶ Tape ana’ lake’na taretan bine’na Paulus ngedhing sajjana reng-oreng se asakongkel jareya, daddi laju entar ka markas notorragi parkara jareya ka Paulus.

¹⁷ Paulus pas adikane settong parwira, laju adhabu kantha reya, "Bakta’agi kana’ paneka ka komandhan, amarga badha se ereppottagiya."

¹⁸ Parwira jareya ngeba kana’ ngodha buru ka komandhanna, laju mator, "Paulus, oreng tahanan ka’dhissa’, ngolok abdina, nyo’on tolong sopaja kana’ ngodha paneka ebakta ka panjennengngan; badha se ereppottagiya."

¹⁹ Kana’ ngodha gella’ bi’ komandhan jareya etonton, egiba ka penggir epajau dhari reng-oreng laenna; parwira jareya atanya, "Apa se ekabala’a ba’na ka sengko’?"

²⁰ Saodda kana’ ngodha jareya, "Reng-oreng Yahudi ampon amopakat nyo’ona ka panjennengngan sopaja Paulus epangadhebba ka Mahkamah Agama lagguepon, tha-kantha parkarana epareksa’a pole epateteya.

²¹ Namong ampon ja’ torodi, sabab badha oreng bannya’epon langkong dhari pa’ polo se padha ngetek ngaddhanga Paulus e lorong. Sadajana padha asompa ta’ neddha’a sareng ta’ ngenoma manabi gi’ ta’ olle mate’e Paulus. Samangken saos reng-oreng gapaneka ampon padha asadhiya; kare anante’ dhabuepon panjennengngan."

²² Ca’na komandhan jareya, "Ba’na ja’ abala ka pa-sapa ja’ la notorragi parkara reya ka sengko’." Kana’ ngodha jareya pas esoro mole.

²³ Komandhan jareya pas ngolok parwira kadhuwa, laju ngoca’, "Sadhiya’agi sardhadhu dhu ratos oreng ban sardhadhu jaran pettong polo oreng, sarta sardhadhu se asanjata tombak dhu ratos oreng; dhaggi’ pokol sanga’ malem epamangkada ka Kaisareya.

²⁴ Sadhiya’agi keya jaran epatompa’a ka Paulus, giba Paulus jareya sampe’ salamet napa’ ka Gubennor Feliks."

²⁵ Komandhan jareya pas noles sorat se monyena kantha reya,

²⁶ "Se Molja Gubennor Feliks. Salam dhari Klaudiyus Lisiyas!

²⁷ Oreng ka’dhinto’ epega’ sareng reng-oreng Yahudi, sareng para’ epateyana, ja’ sakenga ta’ etolong abdina sareng pasukan abdina, sabab abdina mereng ja’ oreng paneka warga nagara Roma.

²⁸ Abdina terro onenga ponapa salerressa kasala’annepon se earannagi ka oreng paneka, daddi sareng abdina oreng paneka ebakta ka Mahkamah Agamana oreng Yahudi.

²⁹ Nyataepon oreng paneka ta’ gadhuwan sala se patot eokom mate otaba epenjara. Sabab se earannagi reng-oreng Yahudi gapaneka namong barang se badha hubunganna sareng agamana reng-oreng gapaneka dibi’.

³⁰ Saamponna gapaneka abdina badha se ngatore oneng ja’ badha reng-oreng Yahudi se andhi’ maksod jahat ka oreng paneka. Daddi abdina langsung ngerem oreng gapaneka ka Towan Gubennor. Ban sareng abdina reng-oreng se ngarane oreng paneka epakon areppot ka panjennengngan."

³¹ Dhu-sardhadhu jareya laju ajalannagi parenta jareya. Paulus egiba malem jareya keya sampe’ ka Antipatris.

³² Kalagguwanna dhu-sardhadhu se ajalan soko abali ka markas, dineng pasukan jaranna nerrossagi parjalananna ngaterragi Paulus.

³³ Sanapa’na pasukan jaran jareya ka Kaisareya, soradda komandhanna laju eatorragi ka gubennor, dineng Paulus pas epassra’agi keya.

³⁴ Saellana maos sorat jareya, gubennor buru laju mareksane dhari dhimma asalla Paulus jareya. E bakto meyarsa ja’ Paulus asalla dhari Kilikiya,

³⁵ gubennor jareya laju adhabu, "Iya, mara, sengko’ mareksa’a parkarana ba’na mon reng-oreng se areppottagi ba’na la napa’ dha’ enna’." Saellana jareya gubennor buru laju makon sopaja Paulus etahan e dhalem karatonna Herodes.

Kisah Para Rasul

Video Kisah Para Rasul 23

Ikuti Kami:

KONTAK | PARTISIPASI | DONASI