Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi Paulus nenutong tebubpun besara' ineh, kebalaneh, "O kinanak-kinanakku! Ratnan ulunku ini ui meran niat pa kiung Allah macing aco sini."
2 Idi Ananias, Imam Rayeh ineh nengecuk lemulun luk tuped iring Paulus mepag tangneh.
3 Idi kebala Paulus kuanneh, Allah miak mepag namu, O alad luk sinat ku kapor luk mebuda'! Iko ini tudo ngukum negku maya' Ukum Musa, iamo' iko ngelaba Ukum Musa dengan ngecuk lemulun mepag negku!"
4 Idi keburi' lun luk tuped muneng ni Paulus, "Iko ngilang Imam Allah luk Rayeh!"
5 Idi keburi' Paulus, "O kinanak-kinanakku, ui na kali' ieh ineh Imam Rayeh, ngaceku pangeh inayud, 'Aleg iko ngedat lun rayeh pupumu.'"
6 Iamo' kareb Paulus nekali' idi sebuang lemulun ineh lun Saduki, idi luk baken ineh lun Parisi, idi ieh nengitang bang tebubpun ineh, kebalaneh, "O kinanak-kinanakku, ui ini lun Parisi idi anak lun Parisi. Ngaceku rapet idi tui lun naté ui ini tinutun bang besara'."
7 Kareb ieh pangeh nepebala kudeng ineh, idi nacing aceh kedaluh arang lun Parisi dengan lun Saduki. Idi lun mula' ineh pana' nepatad peh.
8 (Ngaceku lun Saduki pebala na luk idi tui, idi na luk idi melaikat idi roh pana'; iamo' lun Parisi manu ku amung ineh.)
9 Idi nacing kedaluh luk rayeh, idi tuda'-tuda' guru Ukum ratnan babpat lun Parisi nudur, keburi'deh, "Lemulun ini na sala' anun-anun! Inan aceh roh kian melaikat nepebala neneh lek!"
10 Kedaluh ineh iuk amé' dat, pad lun rayeh baweh ineh matot kudeng Paulus uendeh ngerarak. Idi ieh nengecuk nelun pebunu' ineh nguit ni Paulus remuat rat arangdeh, pad ieh semuet bang libung lun pebunu'.
11 Malem nebpa idi Tuhan netuped iringneh idi nepebala, "Do' iko lutep niat. Mepad kudeng iko pangeh nemaré kali' ratnan Ui déi' Yerusalim, kudeng ineh teh do' iko maré kali' ratnan Ui déi' Rum pana'."
12 Kenebpa idi tuda'-tuda' lun Yahudi nepegayam idi nepebulung, kebaladeh, na ideh sikal kuman idi ngirup pad macing Paulus pitayendeh.
13 Idi kinula' lemulun luk nepebulung ineh mela apat ngepulu' burur.
14 Idi ideh iné' matun imam-imam rayeh idi lun rayeh baken teh, keburi'deh, "Kai pangeh nepebulung, idi kai na sikal kuman anun-anun kareb nateh kai ngaté ni Paulus.
15 Ngaceku ineh do' muyuh idi lun tebubpun besara' ineh ngelio kuan lun rayeh baweh ineh, pad ieh miak nguit ni Paulus temurun kuan muyuh, ayuneh muyuh pian ngelio kekamenneh dengan megala'. Iamo' kai ini pangeh temina' ngaté neneh kareb nateh ieh macing."
16 Iamo' kareb anak pinaken Paulus luk deléi neninger ratnan gayam ineh, idi ieh iné' semuet bang libung lun pebunu' idi nemaré kali' ni Paulus.
17 Idi Paulus nenawar seburur lun rayeh lun pebunu' ineh idi nepebala, "Itenmu anak adi' ini kuan lun rayeh baweh; ngaceku inan aceh bala luk badénneh neneh."
18 Idi ieh nenguit anak adi' ineh amé' matun lun rayeh baweh, keburi'neh, "Paulus luk tinutup ineh nenawar negku idi nemutuh nguit anak adi' ini matun namu, ngaceku inan aceh bala luk badénneh namu."
19 Idi lun rayeh baweh ineh pana' nengimet ticu'neh, idi nenguit neneh amé' setau' idi nengitun neneh, "Anunké luk belénmu negku?"
20 Idi keburi'neh, "Lun Yahudi pangeh nepegayam sikal mutuh namu nguit ni Paulus temurun nebpa amé' matun tebubpun besara', ayuneh ideh sikal ngelio do'-do' ratnan kekamenneh.
21 Iamo' aleg iko ninger baladeh, ngaceku inan mela apat ngepulu' burur luk ngabang neneh, idi luk pangeh nepebulung na sikal kuman idi ngirup pana' pad macing Paulus pitayendeh. Idi nekini amungdeh ineh temina' nganét balamu.
22 Idi kebala lun rayeh baweh ineh, "Aleg mada' nelun baken ratnan iko pangeh nengelio bala ini kuanku." Idi ieh nengecuk anak adi' ineh muli'.
23 Idi lun rayeh baweh ineh nenawar dueh burur lun rayeh lun pebunu' ineh idi nepebala, "Uen medueh ngamung dueh ngeratu lun pebunu' luk miak amé' déi' Kaisaria, dengan tudu' ngepulu' lun maya' kuda, idi dueh ngeratu lun ngimet busu, kareb pun rudap malem ini.
24 Idi uen ngamung tuda'-tuda' kuda, idi miak nganau' ni Paulus luundeh, idi nguit neneh dengan do' kuan Pilik, ieh ineh Lun luk Ngimet Ukum."
25 Idi ieh nengayud aceh surat, kudeng ini balaneh:
26 "Tabi' rat negku, Klaudius Lisias macing inan Lun luk Ngimet Ukum, ieh ineh Pilik luk pelaba buren.
27 Lun ini pangeh kikem lun Yahudi, idi kareb uned ideh sikal ngaté neneh, idi ui nacing dengan bawehku idi nemuit neneh, ngaceku ui pangeh neninger ieh ini lun Rum.
28 Ui sikal kali' punneh lemulun ineh nengadu' neneh, idi ui nenguit neneh temurun amé' matun tebubpun besara'deh.
29 Idi ui nekali' neneh ini inadu' ratnan tuda'-tuda' bala ratnan ukumdeh ineh, iamo' na luk idi sebuleng adu' pana' luk petulu dengan ukum pitayen idi uen nutup.
30 Idi kareb ui pangeh bida' ratnan aceh gayam lun Yahudi luk perurum sikal ngaté neneh, idi ui petacu nemaré neneh namu, idi nengecuk bunu'neh ngadu' neneh pa kiungmu."
31 Lun pebunu' ineh nengalap ni Paulus maya' kudeng luk icuk kuandeh, idi ideh nenated neneh kareb malem amé' déi' Antipatris.
32 Kenebpa lun luk nenalan kukud nelemubed iné' bang libung lun pebunu', iamo' lun luk maya' kuda ineh nemaya' ni Paulus.
33 Ideh nenguit neneh nacing déi' Kaisaria, idi ideh nemaré ni Paulus bang palad Lun luk Ngimet Ukum, dengan surat ineh teh.
34 Lun luk Ngimet Ukum ineh nemaca' surat ineh, idi ieh nengitun neneh bawang sapeh luk inanneh. Kareb ieh nekali' idi Paulus ineh lun Kilikia,
35 idi keburi'neh, "Ui sikal ngelio balamu, kareb bunu'-bunu'mu macing tungé'." Idi ieh nengecuk nedeh ngimet ni Paulus bang ruma Raca' Herodés.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA