Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sug Paulus esa deseino len laugwanohob, kaba, en auweila len toutou. Hanoba en enara dou len, endagai: Indagunerij, indagtorij, dan decinaga dau sug nosa terimda edebeij iteitogini, kaba, aremer hom emagunya dau dan deseino Allah touwero. Doba dan indoc ouma debin dan dag indan geicara esogwa deisa men gomnomna augwan dag misenohob.

² Sug Gembala Gesa Taij Moho Agas, moho Ananias, en ouman dag gin, kaba, en arougb leng lesa deinyor Paulus ingga, endagai: Yen yoto en mer an gin, anai en ereiyara namcirohob.

³ Dangga Paulus owun en moho an gin namcir, endagai: Ban beigtou sugini naugb ban bogod aremer naugb dan, aimo dau Allah men gomnomna an dan toua. Doba sug ban barougb lusud naugb len loto dan dag gin, kaba, ban bedreg dau Allah men gomnomna gin touohob. Dangga hang, Allah emeic mor mor dag misen dou ban toues. Anai ban bedag sud hom gedig lusud leiya en maga debin dous.

⁴ Doba sug leng lesa deinyor Paulus graga len louman dau gin, kaba, len lenara debin en, lendagai: Wui. Ban beic Allah men Gembala Gesa Taij Moho Agas en moho bacecimohoba?

⁵ Sug Paulus ouman dau gin, kaba, en ousa len merir an ucugb, endagai: Indagunerij, indagtorij, dan demecinaga endag sud hom gin, kaba, Gembala Gesa Taij Moho Agas ingginero. Hang dan demenara gouji dou en, anai Allah en dougwo gini se Surad Injil Meb Mohon deb sug nosa touohob, endagai: Gareg en edag mougt naugb yenohob, kaba, yen yemecic en moho gohw genes touwero.

⁶ Sug Paulus ousa en mer an gin dou len dauwohob, kaba, en eija, doba ligbum dau Majelis gin, kaba, len dau leng Saduki. Dara ligbum, kaba, len dau leng Parisi toua. Hanoba en enara se mer goubesa dou len laugwan, endagai: Dani dau leng Parisi. Dara dan injemouwer, kaba, len laugwan toua dau leng Parisi. Dangga dagiro, naugwe hang, yen yahacugb gogom debin dan dag gina? Anai dan toua indoc ebdebin an lusud dag Lona Sug Ouwedoc gin, kaba, len laugwan lemeisa dau gomom ucugb toues.

⁷ Sug Paulus enara dangga dou len inegohob, kaba, leng Saduki dara leng Parisi lebiji naugb len lenara laisedim namcir.

⁸ (Anai leng Saduki, kaba, len lauwam an endag lusud lemeisa daugomom ucugb deitero. Dara len loudesa dag malaikad dara merna mog mog toua ingmaro. Doba leng Parisi, kaba, len merdoc ebdebin an homoi gin terimda. Hang Majelis laugwan lakebim dag hwai icira toua.)

⁹ Doba sug leng Saduki dara leng Parisi merir eisaugwim dag gin terimda, kaba, leng meru ouforoho se Musa men gomnomna dau leng Parisi merug hosa len leisa lesa. Hanoba len lenara lagod dougwo len merir namcir, lendagai: Emen emoudesa endag gin, kaba, malaikad era merna mog mog ingma lenara dou enohobei? Anai emen emecinaga, doba en emedreg dau gomnomna hom touwero.

¹⁰ Doba sug len lenara merir edregim medam namcir dag gin, kaba, leng sadodor meren mougt mera graga, en ahau endag cum, kaba, len leic Paulus anim dangga. Hang en arougb men sadodor naugb len ledahwan Paulus dau len ingga merufu dig meren tueda.

¹¹ Doba se loba ingga, kaba, maman Adehsud en en besa desij Paulus. Hanoba en oho mer debin en, endagai: Ban baiyan abdocesem. Anai ban beic abus naugb ban bos badi dan dou leng se Yerusalemohob. Hang dan douwan naugb ban bos badi dan indoho dou leng se cinogo Roma dangga toua.

¹² Dangga se loneinda deit, kaba, leng Yahudi merug hosa lacinim hom. Hanoba len lohw merdocedoum naugb sug len leic gomom dou Paulus toua. Sug len lehilon ucinohob, kaba, len louwara debin gin toua dag len lemetara dara lemegara touwero, terimda len leic gomom dou Paulus dauwahabi, len lemet dara lemeg deit.

¹³ Dara leng lohw merdocedoum dag gin, kaba, edreg dau merug sud hwai touohob.

¹⁴ Sug len louwara debin ginohob, kaba, len leihwedaud gembala gesa taij meren mougtir dara leng Yahudi meren mougtir gus len laugwan toua. Sug len ledebeij lenohob, kaba, len lenara dou len, lendagai: Emen emoucimdeb, hanoba emen emouwara debin gin toua namcirohob, dag emen emetara dara emegara touwero. Doba emen emehig dau terimda emen emeic gomom dou Paulus dauwahabi, emen ememet dara ememeg deit.

¹⁵ Hang emen emouwan naugb yeni dara Majelis yen yaugwan yog surad dou leng Roma meren mougt mera graga. Hanoba yen yerba mohoisa en, yendag en ahwan Paulus aud yen deit, dauntoba yen yehilon en an aremer gin deigeigouhw deitahabi. Dangga sug en ahwan en aud yen sugini, kaba, emen emesedeb naugb emeic gomom dou en sungga dougwohob.

¹⁶ Doba Paulus medamouwa meisi en ouman dau sug len lohw merdocedoum naugb sug len leic gomom dou Paulusohob. Dangga hang, en emeihweda se sadodor meren tu naugb en eden aremer gin dou Paulus toua.

¹⁷ Sug Paulus en ouman dau gin, kaba, en eija leng sadodor meren mougt hom. Hanoba en enara dou en, endagai: Ban bahwan godeh hom gini dou mougt merahabi. Anai aremer hom inggebga naugb sug en ens dou en toua.

¹⁸ Dangga sug mougt ingga ahwan godeh aud mougt mera gragohob, kaba, en enara dou en, endagai: Sud hom, moho Paulus, gedig en eigtou se tu gesisug sugin, kaba, en eija dan. Hanoba en acgeij dan naugb dan dahwan godeh hom gini aud ban toua. Anai en enara dou dan dag aremer hom inggebga naugb sug godeh gini ens dou ban touahabi.

¹⁹ Sug mougt mera ouman dau gin, kaba, en os godeh hom ingga mesira. Hanoba en augwohosa dou enin naugb eijidougwo en toua, endagai: Ban bouwan benara eisaugb ara dou dana?

²⁰ Dangga godeh hom ingga enara dou en, endagai: Leng Yahudi meren mougtir lohw merdocedoumohob naugb sug len lacgeij ban. Dauntoba lonehibi, kaba, ban bahwan Paulus deseino Majelis naugb len lehilon en an aremer graga augwan deigeigouhw deitahabi. Doba augwan gin, kaba, dag len lerba mohoisa ban dous.

²¹ Hang ban bemobsara dou len an areg len lacgeij dau ban gin touwero. Anai lona gin, kaba, lusud merug edreg dau sud hwai len lesedebohob naugb sug len leic gomom dou en se ucina mogumsi. Dara len louwara debin gin touohob dag len lemetara dara lemegara touwero, terimda len leic gomom dou Paulus dauwahabi, len lemet dara lemeg deit toua. Dangga len leigtou naugb sug ban bousa len merir an gin dous, anai len lesedeb naugb enohob.

²² Sug mougt mera graga ouman dau ginohob, kaba, en oungben Paulus medamouwa meisi dougwo namcir, endagai: Areg ban ben dou dan gini, kaba, ban bemen dou leng gus hom touwero. Sug en oungben en dougwohob, kaba, en arougb godeh ingga beihweda.

²³ Sug godeh ingga eihwededau enohob, kaba, mougt mera graga en eija men gedeijan lahwai naugb en arougb lan, endagai: Yan yasedeb sadodor merug huntun hwai. Dara leng leisa kuda, kaba, yan yauci merug dag sud homoi sisedeisu. Dara leng los kebtemaga naugb lesara, kaba, yan yasedeb merug huntun hwai. Dangga edebeij loyeiyo, kaba, yen yesedeb naugb yen yededau sugin toua.

²⁴ Dara yan yasedeb kuda maga hosa naugb Paulus sug en eisa. Hanoba yan yahwan en aud w Gubernor Piliks dig Kaisareada, kaba, yen yesedougwo en dara en mena agau aud en toua.

²⁵ Sug mougt mera graga arougb lan an dag ginohob, kaba, en og surad naugb Piliks en toua. Dara areg en og deinaugb en, kaba, dag gini:

²⁶ Surad gini dau dang, Klaudius Lisias, naugb bang, w Gubernor Piliks, gedig ban aboho eb taiba augwan namcir, dara dan dou ban toua.

²⁷ Sud hom gedig dan desa en aud ban gin, kaba, leng Yahudi lagaigeij enohob. Hanoba len louwan leic gomom dou en toua. Doba sug dan douman dag maman Roma maman mamoho aiga en touohob, kaba, dan desan indan sadodor naugb emen emeigdoc en dau len merisira, dauntoba len lemeic gomom dou enero.

²⁸ Sug dan deigdoc en dau len merisira mesohob, kaba, dan dahwan en aud meren Majelis toua. Anai dan douwan decinaga dau areg len lahacugb gogom debin en an gini meijouhw augwan asesahabi.

²⁹ Doba sug dan dahwan en aud Majelis lenohob, kaba, dan douman. Doba areg len lahacugb debin en gin, kaba, emedeinyum naugb sug maman maic gomom dou en, era mouf en se tu gesisug touwero. Anai areg len lahacugb debin en gin, kaba, eisaugb lenin meren gomnomna dous.

³⁰ Doba sug dan douman dag leng Yahudi merug hosa lohw merdocedoumohob naugb sug len leic gomom dou en, kaba, dan dogod deinaugb en naugb dan desa en aud ban sungga dedemeda. Hanoba dan den dou Majelis dau sug len louwan lerba ara ara debin sud hom gin, kaba, dag len lenin len aud banahabi, len lemderba ara debinim deseino ban toua. Surad gini ouwedoc sugini. Dan den dou ban dag ban abiresi.

³¹ Sug mougt mera og surad dag gini dou len dauwohob, kaba, men sadodor laimo dau areg en arougb len an ingga namcir. Hanoba len lahwan Paulus terimda len ledebeij cinogo hom, moho Antipatris, toua.

³² Se loneinda deit, kaba, sadodor gedig len lec merohora, kaba, len lecicugb dau leng leisa kuda. Hanoba len leihweda se meren tu dig Yerusalemeda. Doba leng leisa kuda gin, kaba, len lahwan Paulus terimda len ledebeij se Kaisarea toua.

³³ Sug len ledebeij Kaisareohob, kaba, leng leisa kuda gin, kaba, len leic mougt mera men surad dou w Gubernor Piliks. Hanoba len larges Paulus se en mesira toua.

³⁴ Sug Piliks ecic surad gin dauwohob, kaba, en eijidougwo Paulus an sug en gun ucan deit. Dangga sug en ouman, doba Paulus endag en gun se leng Kilikia meren hancob, kaba, en enara dou en, endagai:

³⁵ Eigouhw naugb leng loho las ban deseino dan len toua lenahabi, dan demogod aremer naugb ban toua. Sug Piliks enara dangga dou Paulus dauwohob, kaba, en arougb men sadodor naugb len lahwan en se mougt mera medam, moho Herodes, men tu gouji homahabi, len lemesedougwo en sungga toua.

Kisah Para Rasul

Video Kisah Para Rasul 23

Ikuti Kami:

KONTAK | PARTISIPASI | DONASI