Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sasudah tu si Paulus barangkek dari Atena, inyo taruih ka Korintus.

² Tibo disinan inyo basuwo jo surang urang Yahudi, nan banamo si Akwila, nan barasa dari nagari Pontus. Si Akwila baru tibo pulo jo bininyo si Priskila, dari Italia. Mangkonyo inyo datang ka Korintus, dek karano kaisar Klaudius lah mamarentahkan, supayo kasadonyo urang Yahudi musti kaluwa dari nagari Roma. Mako payilah si Paulus untuak manamui si Akwila nan balaki bini tu,

³ muloi dari sajak itu, mako tinggalah si Paulus jo si Akwila, sambia samo-samo bakarajo jo inyo, dek karano mato pancariannyo samo jo si Paulus, iyolah mambuwek kemah.

⁴ Tapi, di satiyok ari Sabat, si Paulus payi bacurito-curito ka rumah ibadaik, untuak ma usawokan supayo urang-urang Yahudi maupun urang-urang Yunani, buliah picayo kapado Isa Almasih.

⁵ Sasudah si Silas jo si Timotius tibo dari Makedonia, mako si Paulus mampagunokan kasadonyo wakatunyo, untuak mambaritokan firman Allah kabake urang-urang Yahudi, baraso Isa Almasih tu adolah Rajo Panyalamaik nan dijanjikan dek Allah.

⁶ Tapi, dek karano urang-urang tu tatap juwo manyolang inyo, sarato jo mancacek inyo, mako si Paulus mangipehkan kabuik nan di bajunyo sabagai tando, untuak mamparingekkan kasalahan urang-urang tu. Si Paulus mangatokan, "Jikok angku-angku cilako, itu salah di angku-angku sandiri! Ambo lapeh tangan! Muloi dari sajak kiniko ambo ka payi kabake urang-urang nan indak urang Yahudi."

⁷ Mako barangkeklah si Paulus maninggakan urang-urang tu, inyo manompang tingga di rumah nan di subalah rumah ibadaik tu. Rumah tu adolah rumah urang nan indak urang Yahudi, tapi inyo manyambah kapado Allah. Namonyo si Titius Yustus.

⁸ Tapi Krispus, kapalo rumah ibadaik tu, inyo sarato jo kasadonyo kaluarganyo, bi picayo kapado Tuhan Isa Almasih. Sambuah pulo lai urang-urang Korintus nan lainnyo, nan mandanga barito nan dibawok dek si Paulus, inyo bi picayo kapado Isa Almasih, mako inyo tu dipamandikan.

⁹ Pado suatu malam, dalam suatu pangliyatan, Tuhan bakato kabake si Paulus, "Janlah takuik! Mangecek sajolah taruih, jan anok sajo.

¹⁰ Dek karano Aden ka tatap ado samo-samo jo angkau. Indak ka surang juwo doh urang, nan ka bisa mangarajokan nan jahek kabake angkau, dek karano sambuah urang nan di kota ko adolah umaik-Den."

¹¹ Dek karano itu, si Paulus manatap di Korintus tangah duwo tawun lamonyo, inyo ma ajakan firman Allah kabake urang-urang nan disinan.

¹² Kutiko Galio manjadi gubenur di Akhaya, urang-urang Yahudi basatu malawan si Paulus, inyo nak ka mambawok si Paulus ka pangadielan.

¹³ Urang-urang tu manuduah si Paulus, jo tuduahan nan bakcando iko, "Urang ko lah mampangaruahi urang nan banyak, inyo manyuruahkan supayo manyambah Allah jo caro nan balawanan jo paratuaran Nabi Musa!"

¹⁴ Kutiko si Paulus nak ka manjawab, Galio lah labiah dawulu bakato kabake urang-urang Yahudi, "Oih urang-urang Yahudi! Jikok nan dikadukan ko adolah suatu palanggaran atau suatu kajahatan, iyo lah sapatuiknyo ambo manarimo pangaduan angku-angku ko.

¹⁵ Tapi kiniko nan angku-angku kadukan adolah, patangkaran tantang kato-kato, tantang namo-namo, sarato jo paratuaran angku-angku sandiri! Jadi angku-angku sajolah nan samustinyo manyalasaikan. Ambo indak basadiyo doh manyidangkan parkaro-parkaro nan saroman iko!"

¹⁶ Mako di usielah dek Galio urang-urang tu kaluwa.

¹⁷ Dek karano itu, urang-urang tu manangkok si Sostenes, kapalo rumah ibadaik tu, mako inyo tanganilah di adok-an meja pangadielan. Tapi nan Galio indak paduli doh jo kajadian tu.

¹⁸ Sasudah kajadian tu, lamo juwo lai si Paulus tingga di Korintus. Kamudian inyo mangatokan salamaik tingga, kabake urang-urang ba iman nan disinan, mako barangkeklah inyo balayie jo si Akwila, sarato jo si Priskila ka Siria. Tibo di Kengkrea si Paulus mancukua abuaknyo, nan salamo ko lah dipadiyakannyo panjang, dek karano baitulah janjinyo kapado Tuhan.

¹⁹ Kutiko lah sampai di Efesus, si Paulus maninggakan si Akwila jo si Priskila, nan inyo sandiri payi masuak ka rumah ibadaik, sambia batuka pandapek jo urang-urang Yahudi nan ado disinan.

²⁰ Urang-urang tu mamintak, kok dapek si Paulus agak lamo tingga jo inyo disinan, tapi si Paulus indak namuah.

²¹ Biyapun baitu, dikutiko ka barangkek, si Paulus mangatokan, "Jikok Allah mangijinkan, ambo ka babaliak baliak kamari." Sasudah bakato bakcando itu, inyo barangkek dari Efesus.

²² Baru lah turun di Kaisarea, inyo payi ka Yerusalem, untuak mambari salam kabake jamaat nan disinan, sudah tu inyo taruih ka Antiokhia.

²³ Sasudah manatap disinan babarapo lamo, inyo barangkek pulo ka daerah Galatia jo Frigia, untuak manguwaikkan iman urang-urang nan disinan.

²⁴ Samantaro itu, tibolah ka Efesus surang urang Yahudi nan layie di Aleksandria, namonyo si Apolos. Inyo santiang mangecek, inyo sabana paham tantang isi Alkitab,

²⁵ inyo lah di aja untuak mangatawui pangajaran tantang Isa Almasih. Jo sumangaik nan manjadi-jadi, inyo ma ajakan sacaro taliti tantang Isa Almasih, biyapun, hanyo caro dipamandikan Nabi Yahya sajo baru nan dikatawuinyo.

²⁶ Tapi jo sacaro barani si Apolos muloi babicaro di rumah ibadaik. Dikutiko si Priskila jo si Akwila mandanga pangajarannyo, mako dibawoklah inyo dek si Akwila jo si Priskila ka rumah. Disinanlah si Akwila jo si Priskila manarangkan kabake inyo, sacaro nan labiah tapek, tantang rancana Allah untuak manyalamaikkan umaik manusia malalui Isa Almasih.

²⁷ Kamudian si Apolos bamukasuik nak payi ka Akhaya. Mako dibuweklah surek untuak sudaro-sudaro nan ba iman di Akhaya, dek urang-urang nan ba iman kapado Isa Almasih nan di Efesus, supayo urang-urang tu namuah manarimo si Apolos. Dikutiko si Apolos tibo di Akhaya, dek karano rahmaik nan dari Allah, ruponyo inyo manjadi urang nan sangaik paguno, dek urang-urang disinan nan lah picayo kapado Isa Almasih.

²⁸ Dek karano, jo sacaro sangaik bawibawa, si Apolos mangalahkan urang-urang Yahudi, dikutiko badebaik-debaik di adok-an urang nan banyak. Inyo manunjuakkan bukti-bukti malalui ayaik-ayaik Alkitab, baraso Isa Almasih tu adolah Rajo Panyalamaik, nan lah dijanjikan dek Allah.

Kisah Para Rasul

Video Kisah Para Rasul 18

Ikuti Kami:

KONTAK | PARTISIPASI | DONASI