Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pangeh ineh Paulus nenalan rat Atina idi iné' déi' Korintus.
2 Idi ieh nepapu' seburur lun Yahudi ngadanneh Akila, luk tinganak déi' bawang Pontus, luk nacing baruh rat Italia dengan awanneh Priskila, ngaceku Klaudius raca' Rum pangeh nengecuk nelun Yahudi remuat rat bang bawang Rum. Idi ieh iné' matun nedidueh.
3 Kekamendeh mepad, idi ieh netudo dengan didueh idi ideh pad-pad ngakem, ngaceku ideh lun luk mileh nganau' lepo kibung.
4 Idi anid-anid Aco luk inan Mudeng Paulus pegayam bang ruma' sembayang, idi nengubuk nelun Yahudi idi lun Grika pana'.
5 Kareb Silas idi Timotius ineh nacing rat Makedonia, idi Paulus megéi' mada' bala ineh teh, idi nemaré kali' kuan lun Yahudi ratnan Yésus ineh Keristus.
6 Kareb ideh sikal metueh rat neneh idi nenguyo neneh, idi ieh nengegkar ayungneh, kebalaneh, "Kudeng muyuh na ngalap ulun, muyuh sebuleng mabeh ineh. Ui na mabeh ineh. Rat pad sini ui amé' nelun pupu baken."
7 Idi ieh nenecan nedeh, idi iné' tudo bang ruma' Titus Yustus, ieh ineh selemulun luk sembayang inan Allah; idi ruma'neh pekatu dengan ruma' sembayang.
8 Krispus, lun rayeh ruma' sembayang ineh, dengan amung uang tetek ruma'neh manu nan Tuhan, idi mula' lun Korintus pana' luk neninger bala Tuhan petacu manu idi rireb peh.
9 Idi Tuhan nepebala ni Paulus kareb malem aco bang aceh luk sinierneh, "Aleg iko matot, iamo' pebala iko idi aleg pirud teh.
10 Ngaceku Ui idi denganmu, idi seburur lemulun pana' nateh luk miak ngakem namu pad ngedereh namu; ngaceku mula' pupuKu bang bawang ini."
11 Idi Paulus netudo déi' selak anem bulan kinioneh, idi nemada' bala Allah kuan lemulun ineh.
12 Kareb Galio mangun ku lun luk ngimet déi' bawang Akaya, idi lun Yahudi neperanga' ngakem ni Paulus, idi nenguit neneh amé' bang besara',
13 kebaladeh, "Lemulun ini ngecuk lemulun sembayang inan Allah maya' dalan luk na petulu dengan ukum."
14 Kareb Paulus sikal pebala, idi Galio nepebala nelun Yahudi ineh, "O lun Yahudi, kudeng matu bala ini ratnan ngelaba ukum idi ratnan nganau' luk dat, miak ui ninger bala muyuh.
15 Iamo' kudeng kedaluh ini ratnan bala idi ngadan-ngadan idi ukum muyuh, do' muyuh sebuleng mutut amung ineh. Ui ara' mangun ku lun luk mutut besara' luk kudeng ineh!"
16 Idi ieh nemasut lemulun ineh rat bang besara' ineh.
17 Idi amung-amungdeh nedupeh ni Sostenis, lun rayeh ruma' sembayang ineh, idi nemebal neneh pa kiung besara' ineh. Iamo' Galio ungeng ratnan ineh.
18 Paulus netudo déi' Korintus tuda'-tuda' io teh. Pangeh ineh ieh nenalan maya' kapal dengan Priskila idi Akila. Kareb nateh ieh nenalan, idi ieh nenganau' aceh jani' déi' Kenkria, idi nengiki uluhneh.
19 Ideh nacing déi' Epesus, idi Paulus nenecan nedidueh déi', iamo' ieh sebuleng petacu nesemuet bang ruma' sembayang, idi nepesaad nelun Yahudi.
20 Ideh nemutuh neneh tudo mio sesuut, iamo' ieh ara'.
21 Iamo' kareb ieh nenecan nedeh, idi ieh nepebala, "Pad baré Allah mo' idi ui lemubed amé' nemuyuh teh." Idi ieh nenalan maya' kapal rat Epesus.
22 Kareb ieh nacing déi' Kaisaria, idi ieh numak idi nepetabi' nelun sidang ineh. Pangeh ineh ieh iné' déi' Antiokia.
23 Kareb ieh pangeh netudo déi' tuda'-tuda' aco kinioneh, idi ieh iné' aput bawang Galatia idi Prigia idi nengepicet anu amung-amung lun manu ineh.
24 Idi seburur lun Yahudi ngadanneh Apolus, luk tinganak déi' bawang Iskandria, nacing déi' Epesus. Ieh ineh selemulun luk mileh mada' idi luk do' kali' Surat Allah.
25 Ieh pangeh bida' ratnan Dalan Tuhan, idi dengan niat luk matu ieh nepebala idi metueh mada' ratnan Yésus, sagan pana' ieh sebuleng nekali' rereh Yahya mo'.
26 Ieh nengimun pebala dengan mekuu' bang ruma' sembayang. Kareb Priskila idi Akila neninger bada'neh, idi didueh nenguit neneh muli', idi nemada' Dalan Allah neneh dengan megala'.
27 Apolus pian amé' déi' bawang Akaya, idi lun manu déi' Epesus nengedengan neneh idi nemaré surat kuan kinanak-kinanakdeh déi' Akaya ineh, idi nengecuk nedeh nganak neneh. Kareb ieh nacing ieh nengedengan nedeh luk pangeh manu ngaceku ratnan katu Allah.
28 Idi dengan ilehneh ieh nengelaya' amung-amung kedaluh lun Yahudi pa kiung lun mula', idi nengelio rat bang Surat Allah ratnan Yésus ineh Keristus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA