Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naopu etu i Paulus nompalasi ngata Atena pade nalaumo i'a mpaka ri ngata Korintus.

² Ri setu i'a nosintomu ante samba'a tau to Yahudi nggari Propinsi Pontus to nosanga ka Akwila. Akwila ante rongona i Priskila lako narata ri ngata Korintus nggari Propinsi Italia. Ira nolinja mpaka ri Korintus sabana i Klaudius, Magau Roma, nomparenta pura-pura tau to Yahudi kana mompalasi ngata Roma ri Propinsi Italia etu. Jadi nalaumo i Paulus nantunggai ira romba'a,

³ pade i'a neto'o ri ja'i ira sabana mata mpopaelo i Paulus nasimbayu ante mata mpopaelo ira, etumo nowia tenda. Ira tolumba'a nokarajaa mpasanggani-nggani.

⁴ Pade ri Eo-eo Mpenonto nalaumo i Paulus ri sapo mpodade nto Yahudi notesa nosinjula pekiri ante tau-tau nasiromu ri setu, nabeloka tau to Yahudi, nabeloka tau to Yunani. I'a nompasimbuku manggeni ira momparasaya i Pue Yesus.

⁵ Sangga naratapa i Silas bo i Timotius nggari Propinsi Makedonia, nikabasaka i Paulusmo panggawiana nowia tenda etu, pade eo-eo i'a nompatolele Tesa nu Alatala ka tau to Yahudi. Nipatudukina ka ira, "Yesusmo Magau to Mompakasalama to nijanji Alatala."

⁶ Tapi tau to Yahudi etu batena nangewa Paulus pade nanguli sinja'I i'a. Jadi i Paulus nombawurenggenaka pakeana ante nanguli, "Salamu muposala mboto! Etu da'a salaku! Nompamula we'i-we'i aku malau mompatolele Tesa nu Alatala ka tau-tau da'a to Yahudi!"

⁷ Naopu etu i Paulus nompalasi ira pade nalau neto'o ri sapo ri sinjori nu sapo mpodade etu. Pue njapo etu nosanga ka i Titius Yustus. I'a da'a to Yahudi tapi i'a nomparasaya Alatala.

⁸ Topanggeniaka sapo mpodade etu to nosanga ka i Krispus ante pura-pura ira saongu njapo nomparasaya i Pue Yesus. Pade nadea tau-tau to Korintus ntanina nangepe kareba to nikeni i Paulus etu, pade ira wo'u nomparasaya pade nidiu ewa tandaina ira topomparasaya i Pue Yesus.

⁹ Naria sambengi i Paulus nanggita saongu panggita. Riara mpanggitana etu i Pue nanguli ka i'a, "Ne'e maeka! Ne'e menonto mompatolele Tesaku,

¹⁰ sabana damadeapa tau ri ngata e'i kana momparasaya Aku. Ne'e maeka, sabana Aku mosanggani-nggani ante iko. Da'a ria samba'a tau mamala mowia anu maja'a ri ja'imu."

¹¹ Sabana etu i Paulus neto'o ri ngata Korintus sampae santongo kasaena pade nompatuduki Tesa nu Alatala ka tau-tau ri setu.

¹² Tempo i Galio najadi gubernur ri Propinsi Akhaya etu, tau-tau to Yahudi nosintuwu nangewa i Paulus. I'a nisoko ira pade nikeni ri ngayo Gubernur Galio etu ala ratangara.

¹³ Ira nompangadu i'a iwe'i: "Tau e'i nanggeni tau dea mombasomba Alatala ante pepatuduki nontani nggari Atura-atura agama to nipapola I Musa ka kami!"

¹⁴ Iwetu i Paulus madota mesono, nangulimo Gubernur Galio, "E, tau-tau to Yahudi! Ane to nipangadu komi e'i saongu peliunaka atura Roma bara saongu kaja'ana, masipato aku mosabara mangepe tesa pepangadu komi e'i.

¹⁵ Tapi e'i aga posisala pombarata ewa tesa-tesa pade sanga-sanga pade atura-atura agama komi mboto! Etu kana rapasiayu komi mboto. Aku e'i da'a madota mombatangara parakara ewa e'i!"

¹⁶ Naopu etu Gubernur Galio nompopalai ira nggari peto'o mpotangara etu.

¹⁷ Naopu nesuwu nggari setu todea etu nanjoko topanggeniaka sapo mpodade nto Yahudi to nosanga ka i Sostenes, pade i'a niboba ira ri ngayo peto'o mpotangara. Tapi Gubernur Galio da'a ntoto nipariara nta'ina powia ira etu.

¹⁸ Naopu etu danasaepa i Paulus neto'o ri ngata Korintus. Naopu etu nopasabimo i'a ka topomparasaya-topomparasaya ri setu pade nosumombamo i'a mpaka ri Propinsi Siria nosanggani-nggani ante Priskila bo Akwila. Da'apa ira nosumomba, ri ngata Kengkrea, i Paulus nombagari wo'ona to nipalambana najadi nandoe nantuki ada nto Yahudi, sabana naria pojanjina ri ngayo i Alatala.

¹⁹ Riara posumomba ira etu ira nesai ri ngata Efesus. Ri setu i Paulus nompalasi ira Priskila bo Akwila pade nalaumo i'a njamba'ana nesua ri sapo mpodade notesa nosinjula pekiri ante tau-tau to Yahudi ri setu.

²⁰ Ira to Yahudi nerapi ala i'a meto'o masae ante ira, tapi i'a da'a madota.

²¹ Nopasabimo i'a ka ira pade nanguli, "Ane rapodota Alatala, aku kana manjili wo'u wemai." Naopu notesa iwetu nosumombamo i Paulus nggari ngata Efesus sampe narata ri ngata Kaisarea.

²² Sangga naratapa ri ngata Kaisarea, nantendemo i'a mpaka ri ngata Yerusalem ala mombawai tabe ka topomparasaya ri setu. Naopu etu pade notuamo i'a mpaka ri ngata Antiokhia.

²³ Naopu i'a neto'o bara sakuya kasaena ri setu, nalau wo'umo i'a mpaka ri Bagia Galatia bo Frigia ala mompakaroso pomparasaya topomparasaya i Pue Yesus ri setu.

²⁴ Tempo Priskila bo Akwila naria ri Efesus naratamo samba'a tau to Yahudi ri setu nggari ngata Aleksandria ri tana Masir, sangana Apolos. I'a samba'a tau napande notesa, pade i'a mpu'u-mpu'u nangginjani isi Buku Nagasa.

²⁵ I'a nipatuduki ntau tesa i Pue Yesus. Jadi tempo i'a narata ri ngata Efesus notesamo i'a ante rarana newoya-woya. Nipatudukina ka tau-tau tesa Yesus etu ante nanoto, naupa to ninjanina nggari tesa etu aga pepatuduki Yohanes Topediu.

²⁶ Ante kabiana Apolos nompamula notesa ri sapo mpodade nto Yahudi. Tempo i Priskila bo Akwila nangepe i'a, ira nompakeni i'a mpaka ri sapo ira. Pade ri setu ira notarangga mpakanoto ka i'a tesa Alatala anu da'apa ninjanina.

²⁷ Naopu nggari setu Apolos nompakatantu malau mpaka ri Propinsi Akhaya. Jadi topomparasaya i Pue Yesus ri ngata Efesus etu nantulungi i'a ante nantulisi sura ka topomparasaya-topomparasaya ri Akhaya ala ira madota mantarima Apolos ri setu. Jadi tempo Apolos narata ri Propinsi Akhaya etu, pepatudukina mpu'u-mpu'u nantulungi tau-tau to najadi topomparasaya i Pue Yesus nggari towe belo nu Alatala.

²⁸ Ante tesana to nakuasa Apolos nombadagi pura-pura tesa to Yahudi ri ngayo todea. Nipakanotona ka ira nggari Buku Nagasa, Yesusmo Magau to Mompakasalama to nijanji Alatala.

Kisah Para Rasul

Video Kisah Para Rasul 18

Ikuti Kami:

KONTAK | PARTISIPASI | DONASI