Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Radu jak seno Paulus ninggalko Atena rik mik Korintus.

² Di dudi ia betungga jama sai jelma Yahudi gelarni Akwila, asal jak negeri Pontus. Akwila ampai gaoh ratong jak Italia jama inggomni Priskila. Tian ratong mik Korintus mani Kaisar Klaudius radu ngayun sunyinni ulun Yahudi luah jak Roma. Paulus mik napol tian rua,

³ radu tinggal di dudi jama tian rik beguai jama-jama tian, mani mata pencarian tian gegoh jama Paulus, yakdo nyani kemah.

⁴ Kidang unggal rani Sabat, Paulus mik ngicik-ngicik di lamban ibadah untuk nyani jelma-jelma Yahudi maupun jelma-jelma Yunani, percaya jama Isa.

⁵ Radu jak Silas rik Timotius sampai jak Makedonia, Paulus makai seluruh waktuni untuk ngabarko kabar jak Allah jama jelma-jelma Yahudi bahwa Isa anodo Raja Penyelamat sai dijanjiko ulih Allah.

⁶ Kidang ulihni ulun-ulun terus gaoh nantang rik ngereneh, maka Paulus ngibasko harbuk jak kawaini sebagai tanda untuk ngingokko kesalahan tian. Ia cawa, "Kik keti celaka, salahmu tenggalan! Nyak lepas culuk! Mulai tano nyak haga mik jama jelma-jelma lain Yahudi."

⁷ Raduni Paulus ninggalko tian rik mik tinggal di lamban sai di kebelah lamban ibadah udi. Lamban udi lamban sai jelma lain Yahudi, kidang ia nyumbah Allah. Gelar ulun udi Titius Yustus.

⁸ Kidang Krispus, kepala lamban ibadah udi jama seluruh keluargani percaya jama Tuhan Isa. Rik lamon juga jelma-jelma Korintus barehni ngedengi kabar sai disampaiko Paulus, rik tian percaya jama Isa raduni dibaptis.

⁹ Pada suatu bingi di delom suatu pengliakan, Tuhan cawa jama Paulus, "Dang rabai! Cawado terus rik dang ngehema.

¹⁰ Mani Nyak menyertaimu. Mak sai jelma pun dapok ngelakuko sai jahat jama niku, mani lamon jelma di kota inji yakdo jelma-jelma-Ku."

¹¹ Ulihni seno Paulus tinggal di Korintus sai setengah tahun sakani rik ngajarko cawa Allah jama tian.

¹² Waktu Galio jadi gubernur Akhaya, jelma-jelma Yahudi besatu nantang Paulus rik ngusung ia mik pengadilan.

¹³ Tian ngajuko pengaduan inji, "Jelma inji mempengaruhi ulun lamon in nyumbah Allah jama cara sai betentangan jama hukum Musa!"

¹⁴ Reno Paulus haga ngejawab, Galio radu cawa jama ulun-ulun Yahudi, "Hui, jelma-jelma Yahudi! Kik sai diaduko inji suatu pelanggaran atau suatu kejahatan, sangun sepatutni nyak sabar ngedengi pengaduanmu inji.

¹⁵ Kidang inji pertangkaran mengenai cawa-cawa rik gelar-gelar rik hukum-hukummu tenggalan! Jadi keti sai harus nyelesaikoni. Nyak bekeberatan ngadili hal-hal injuk inji!"

¹⁶ Raduni Galio nguser tian mik luah.

¹⁷ Maka tian nangkok Sostenes, kepala lamban ibadah, rik mukul ia di hadap mija pengadilan. Kidang Galio sama sekali mak peduli hal seno.

¹⁸ Radu jak seno Paulus masih mesaka tinggal di Korintus. Raduni ia ngucakko selamat tinggal jama ulun-ulun percaya di dudi, raduni belayar jama Priskila rik Akwila mik Siria. Di Kengkrea, Paulus nyukor buokni sai radu ditagankoni jadi kejung ulihni nazarni jama Tuhan.

¹⁹ Waktu sampai di Efesus, Paulus ninggalko Priskila rik Akwila, raduni kuruk mik lamban ibadah rik betukor pikeran jama ulun-ulun Yahudi di dudi.

²⁰ Tian ngilu in ia tinggal lebih mesaka jama tian, kidang ia mak haga.

²¹ Walaupun injuk reno, pada waktu haga berangkat, ia cawa, "Kik Allah ngizinko, nyak haga muloh luot mik dija." Radu jak cawa injuk reno, ia berangkat jak Efesus.

²² Radu jak regah di Kaisarea, ia mik di Yerusalem untuk ngeni salam jama jemaah di dudi, raduni terus mik Antiokhia.

²³ Radu jak tinggal di dudi pira-pira saka, ia berangkat lagi napol daerah Galatia rik Frigia untuk nguatko iman jelma-jelma percaya.

²⁴ Sementara udi, ratongdo mik Efesus sai jelma Yahudi kelaheran Aleksandria, gelarni Apolos. Ia pandai ngicik rik paham nihan tentang isi Alkitab,

²⁵ rik radu dididik untuk mengenal ajaran tentang Isa. Maka jama semangat sai bekobar-kobar ia ngajar teliti nihan mengenai Isa, walaupun ampai baptisan Yohanes gaoh sai dikenalni.

²⁶ Apolos bani mulai cawa di lamban ibadah rik waktu Priskila rik Akwila ngedengi pengajaranni, tian ngusung ia mik lamban. Di dudi tian nerangko jama ia lebih tepat lagi mengenai rencana Allah untuk nyelamatko manusia liwat Isa.

²⁷ Raduni Apolos bemaksud mik Akhaya. Maka ulun-ulun sai percaya jama Isa di Efesus nulis surat jama puari-puari sai percaya di Akhaya in tian haga nerima Apolos. Rik waktu Apolos sampai di Akhaya, tulunganni ternyata beguna nihan jama ulun-ulun sai ulihni rahmat Allah radu percaya jama Isa.

²⁸ Mani jama wibawa nihan Apolos ngalahko ulun-ulun Yahudi di delom perdebatan-perdebatan di hadapan umum. Rik ia ngebuktiko jama ayat-ayat jak Alkitab bahwa Isado Raja Penyelamat sai dijanjiko.

Kisah Para Rasul

Video Kisah Para Rasul 18

Ikuti Kami:

KONTAK | PARTISIPASI | DONASI