Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Paulus de 'o Barnabas 'o Ikonium ma kotaka yaika de yowosangoli 'o Yahudioka manga lo-lomu ma woaka, de yodotokoli yosidemogaroku sigado 'o Yahudioka de ko 'o Yahudiokawa manga gudai yongaku 'o Yesusika.

² Ma 'o Yahudioka gee koyongaku-ngakuwa yosisau-sauku ko 'o Yahudiwa ma nyawaka so ma rai 'ona yakidu'uduku 'o nyawa gee yongaku-ngaku 'o Yesusika.

³ De 'o Paulus de 'o Barnabas 'o do'ingo yogogere ge'enaka. De 'ona yomoroini yobi-bicara ma ngale ma Jou. So ma Jou mita wosidumutu 'ato gee yosiha-habari ma ngale 'awi dora ge'ena ma goungu; ma ngekomo wakikula 'o kuasa la yodiai 'o no-nako 'ihera-herangi de 'okia sonaa kobiasawa.

⁴ Duga ma kota ma nyawa go'ona koyomakadaenuwa; munuka yomoteke 'o Yahudi ma nyawaka, de munuka 'o su-sulokika go'ona.

⁵ Ge'enaka de 'o Yahudioka de manga balu-balusu de ko 'o Yahudiokawa ma nyawa yomarimoi ma ngale yakisikisaa de yakiriteto 'o su-suloko go'ona.

⁶ Ma, 'o su-suloko go'ona yomanakokau, so yosikaie 'o Listra de 'o Derbe ma kotade, ge'ena la 'o Likaonia ma daeraaka de ge'ena ma date-dateoka.

⁷ Kadaku de yosihabarioli 'o Habari ma Owa ge'ena.

⁸ 'O Listra ma kotaka wimoi wolugu-lugu kawosidoboanosi, so 'una koma'iwasi wotagi sababu 'awi dou kaifoloi koimagakunuwa.

⁹ 'O nyawa gu'una wogogerie wosigisene 'o Paulus wodotoko. 'O Paulus wimake 'ato 'o nyawa gu'una wongaku so 'idadi wisi'aiki, so 'o Paulus wilega-lega 'unaka.

¹⁰ De kawongosekau waamo-amokie, "Noma'oko nomaboootie!" De wolugu-lugu gu'una woma'oko kawomapalitangie deika wotagi.

¹¹ 'O nyawa yoku-kudai kayamakeka 'okia naga 'o Paulus wodiai de 'ona yosigasoko de 'o Likaoniaka manga demo, "'O gomanga ma dutu 'i'utikou 'o duniaka 'imadiai 'isoka 'o nyawa!"

¹² Ge'enaka de 'o Barnabas 'una wisironga 'o Zeus, de 'o Paulus 'una wisironga 'o Hermes, sababu 'una wobi-bicara.

¹³ 'O gomanga gee yosironga 'o Zeus, gee ma woa 'o kota ma bionoka. Ma gomanaga wotowo-towo gu'una woboa wo'asa 'o sapi ma nau-nauru de 'o bunga-bunga 'o kota ma ngorana ma amokino. 'Una womau womasimoteke de 'o nyawa yoku-kudai go'ona yositedene 'o su-suba 'o su-sulokika go'ona.

¹⁴ 'O Barnabas de 'o Paulus gee yogi'isenoka 'ato yomau koge'ena yodiai, de yongamo de manga baju yaraca-racanga de kayoowa-owara 'o nyawa yoku-kudai manga sigoronaka de kayongosekau,

¹⁵ "'Etei, 'ido'oa so kone'ena niodiai? Ngomi ne'ena ka 'o nyawa biasa mita 'isoka ngini 'Esa moi! Ngomi ne'enaka dau miaino ge'ena ma ngale miositotara 'o Habari ma Owa nginika la niamada 'okia naga gee ma faedaa koi'iwa ne'ena, la niosikaika ma Jo'oungu ma Dutuka gee wowango-wango. 'Una ge'ena ma Jo'oungu ma Dutu gee 'o diwanga de 'o dunia de 'o ngooto de ma dodaka 'iodumu wosidadi-dadi.

¹⁶ Ma sirasi ma Jo'oungu ma Dutu kawakisimadaka 'o nyawa-nyawa yo'ahu moteke ka moi-moi manga di-dibangi sababu kowinakowasi.

¹⁷ Ma kowamongoruwa womasinyata, ma ngekomo wodiai 'okia sonaa yaowa-owa. 'Una winikula 'o besaka daku 'o diwanguku, de 'o tonaka ma hasili gee ma 'orasuku. 'Una winikula 'o 'inomo de nia singina wosisanangi."

¹⁸ Duga ngaro 'o su-suloko koge'ena yongose ma kaisusasi yakitawanono 'o nyawa-nyawa gee yositedene manga su-suba 'o su-suloika.

¹⁹ Ma 'o Yahudioka yamuruo naga dau 'o Antiokhiade gee 'o Pisidia ma daeraade de mita 'o Ikoniumie yoboade 'o Listraka yakibaja de yakisisau-sauku 'o nyawa yoku-kudai go'ona so ma rai yakidomoteke 'onaka. 'Ona wiriteto 'o Paulus, ge'enaka de wi'asa 'o kota ma dudunika. 'Ona yongose 'una wosongenokau,

²⁰ momongo gee 'o nyawa yongaku-ngaku yoma'okode wisigilolitino de womomiki so wotagioli 'o kotaka. Ma ngorumika de wotagi 'o Derbesa yomatuono de 'o Barnabas.

²¹ 'O Derbe ma kotaka 'o Paulus de 'o Barnabas yositotara 'o Habari ma Owa ge'ena, de 'o nyawa manga gudai yongaku 'o Yesusika. Ge'ena 'iduanga de yolio 'o Listrako 'asa de yosikaisa 'o Ikoniumisa, ge'enaka de 'o Antiokhiako gee 'o Pisidiaka.

²² Ma kota-kotaka ge'ena 'o nyawa yongaku-ngaku 'o Yesusika manga singina yosikuata de yakidongose la 'uwa yomaogoro yongaku 'o Yesusika. 'Ona yongose 'ato, "Ngone salingou 'isira pokasangisarasi 'asa deika pamao ma Jo'oungu ma Dutu wi Dunia ma Sungi ma sanangi." Koge'ena 'o su-suloko manga do-dotoko 'o nyawa yongaku-ngakuka ma kota-kotaka ge'ena.

²³ De 'o jamati 'isinoimika 'o Paulus de 'o Barnabas yakigoraka 'o jamati ma balusu. 'Asa de yolahidoa de yopuasa ma ngale yakisisarakani 'o jamati ma balu-balusu go'ona ma Jouka gee 'ona wingaku-ngaku.

²⁴ Ge'ena 'iduanga de 'o Paulus de 'o Barnabas yakilolitokasi 'o Pisidia ma daeraaka 'asa de yosikaie 'o Pamfilia ma daeraade.

²⁵ De gee yosihabarioka ma Jo'oungu ma Dutu wi demo 'o Perga ma kotaka, 'asa de yosikauku 'o Ataliaku.

²⁶ Ge'enaka deika yosidetoli 'o Antiokhiasa. Ge'enau ma kotaka ma sira 'ona yakisisarakani ma Jo'oungu ma Dutuka la wakisibarakati la yomanarama manga manarama gee ne'ena 'ona yosiduangokau.

²⁷ 'O Antiokhiaka yototarisa, de yakilomuno 'o jamati 'asa de yosijarita 'iodumu gee ma Jou wodiaiokau ma ngekomo 'ona. De yosijarita mita kokia ma Jo'oungu ma Dutu 'o ngekomo wokula sigado ko 'o Yahudiokawa ma yongaku 'o Yesusika.

²⁸ Ge'ena ma kotaka 'o Paulus de 'o Barnabas manga do'ingoka yogogere de 'o nyawa yongaku-ngaku.

Kisah Para Rasul

Video Kisah Para Rasul 14

Ikuti Kami:

KONTAK | PARTISIPASI | DONASI