Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Laing songon i ma di Ikonium. Kehe ma si Paulus dohot si Barnabas tu bagas paribadatan jana songon i ma pangkobari ni halahi di kota i mambaen bahat halak Jahudi dohot angka bangso na asing gabe porsaya tu Jesus.

² Tapi dijajang halak Jahudi na so ra porsaya i ma angka bangso na asing na so Jahudi i, anso goyak roha ni halahi mida angka na porsaya i tu Jesus.

³ Jadi gabe honok do si Paulus dohot si Barnabas tinggal disi. Jana di bagasan habaranion dihatahon halahi do taringot tu Tuhan i. Dipatanda Tuhan i muse do antong na tutu jamita ni halahi taringot tu holong ni rohana i; dilehen Ia do gogo tu halahi laho mambaen tanda hahomangan dohot angka pangalaho na so jungada masa.

⁴ Tapi marsalisi pandapot ma halak kota i na sada tu na asing; adong na mamihak tu halak Jahudi, adong muse na mamihak tu rasul i.

⁵ Jadi satahi ma halak Jahudi i rap dohot angka hatobangon ni halahi dohot sudena angka bangso na asing na so Jahudi laho mamparkanciti jana mandangguri rasul na dua i dohot batu.

⁶ Diboto rasul na dua i do pangalaho i, gabe martabuni ma halahi tu Listra dohot tu Derbe, i ma kota na di Luat Likaonia, dohot tu luat na humaliang i.

⁷ Dijamitahon halahi ma mangulahi disi Jamita Na Denggan i.

⁸ Di Listra adong ma sada bayo na pangpangon dioban tubu, na so unjung dope malo ia mardalan hara ni galena patnia i.

⁹ Juguk ma bayo i disi manangi-nangihon si Paulus na mandok hata i. Diida si Paulus porsaya do bayo i, jadi tarpamalum do ia. Jadi ditatap si Paulus ma tusia,

¹⁰ jana dipagogo si Paulus ma sorania mandok hata, "Tigor ma ho jongjong!" ning ia. Mangambur ma bayo i jongjong lalu mardalan.

¹¹ Dung diida halak na nibaen ni si Paulus i, marsurahi ma halahi di hata Likaonia, "Ma mijur angka debata tu tano on marrupa jolma," ninna halahi.

¹² Dung i digoari halahi ma si Barnabas, si Zeus jana si Paulus digoari halahi Hermes, harana ia do antong na sai mangkatai.

¹³ Ro ma malim ni Debata Zeus na sian bagas parsombaan na di jolo ni kota i, dioban ia ma angka lombu dohot bunga-bunga tu lambung horbangan ni kota i. Giot dohot ia marsomba rap dohot halak na bahat i pasahatkon haul tu rasul na dua i.

¹⁴ Dung dibege si Barnabas dohot si Paulus na giot baenon ni halahi i, diparsibakkon halahi ma pakean ni halahi marlojongi tu tonga-tonga ni halak na bahat i, marsurak ma halahi,

¹⁵ "Biasi baenonmunu songon i, hamu ale angka dongan? Laing jolma do hami songon hamu! Na giot manjamitahon Jamita Na Denggan i do hami dison tu hamu angka dongan, anso ditadingkon hamu sudena pangalaho na so marguna on boti anso ro hamu mandapotkon Debata na mangolu i, i ma sitompa langit dohot tano on dohot laut dohot sude na adong di bagasanna.

¹⁶ Anggo na salpu i dipadiar Debata do angka bangso marsibaen rohana be na mangolu i.

¹⁷ Tapi nada lupa Ia mangalehen angka bukti taringot tu diriNia, markite-hite na mambaen na denggan. Dilehen Ia do udan tu hamu sian langit i dohot suha ni tano marguru tu hatihana. Dilehen Ia do balanjo di hamu jana dipasonang Ia do rohamunu."

¹⁸ Tapi haru didok rasul i pe hata na songon i, laing maol do hasundatan halahi jolma na bahat i pasahat haul tu halahi.

¹⁹ Jadi ro ma halak Jahudi tu Listra sian Antiokia na di Pisidia songon i na sian Ikonium mangirang-irangi halak na bahat i anso mamihak tu halahi. Didangguri halahi ma si Paulus dohot batu, dung i disarat halahi ma ia tu balian ni kota i. Diambang halahi na dung mate ia,

²⁰ tapi dung jongjong angka na porsaya i disi mangkaliangi ia, jongjong ma ia masuk mangulahi tu kota i. Ancogotna i kehe ma ia dohot si Barnabas tu Derbe.

²¹ Dijamitahon si Paulus ma dohot si Barnabas Jamita Na Denggan i di Derbe jana bahat ma halak gabe porsaya tu Jesus. Dung i mangulahi ma halahi tu Listra, sian i tu Ikonium lopus tu Antiokia na di Pisidia.

²² Dipapos halahi ma roha ni angka na mangihutkon Jesus, jana dipaingot halahi ma angka na mangihutkon Jesus i anso tongtong porsaya tu Jesus. "Angkon jolo bahat do taononta parkancitan baru pe anso maruli hita hatuaan ni Harajaan Ni Debata," ninna rasul i mamodai angka na mangihutkon Jesus di angka kota nangkinan i.

²³ Diangkat si Paulus dohot si Barnabas ma di angka parlagutan i angka pangituai ni ganop parlagutan. Dung jolo martangiang dohot puaso, dipasahat halahi ma angka pangituai i tu Tuhan na nihaporsayaan ni halahi i.

²⁴ Dung i didatdati si Paulus ma dohot si Barnabas pardalanan ni halahi i, disalpui halahi ma Pisidia lopus lalu halahi tu Pamfilia.

²⁵ Jadi dung dijamitahon halahi hata ni Debata di Perga, kehe ma halahi tu Atalia,

²⁶ sian i markapal ma halahi tu Antiokia. Disi ma halahi na salpu i dipasahat tu Debata na mangkaholongi halahi, laho mangkarejohon tohap na dung nipasidung ni halahi saonnari.

²⁷ Dung lalu halahi di Antiokia, dipalagut halahi ma angka dongan na di parlagutan i. Dibaritahon halahi ma sude na dung dibaen Debata markite-hite halahi. Laing dipaboa halahi ma sanga na bia dibaen Debata laho mangungkap dalan anso laing dohot halak na asing na so Jahudi mangkaporsayai Jesus.

²⁸ Honok do si Paulus dohot si Barnabas tinggal di kota i rap dohot angka na porsaya i.

Kisah Para Rasul

Video Kisah Para Rasul 14

Ikuti Kami:

KONTAK | PARTISIPASI | DONASI