Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Déi' Ikonium pana' Paulus idi Barnabas iné' bang ruma' sembayang lun Yahudi idi nepebala kudeng ineh pad pelaba ula' lun Yahudi idi lun Grika pana' manu peh.
2 Iamo' lun Yahudi luk na manu nengagau niat lun pupu baken ineh, pad ideh museh idi sikal metueh ratnan lun Kristen ineh.
3 Idi rasul-rasul neketecan déi' tuda'-tuda' ioneh. Didueh nemada' dengan mekuu' ratnan Tuhan. Idi Tuhan nengegala' ratnan bala didueh ratnan katuNeh matu, idi Ieh nemaré lalud nedidueh, pad didueh nenganau' tanu' idi kekamen luk nan mawa.
4 Iamo' lun bang bawang ineh nepebabpat, ieh ineh sebabpat pamung dengan lun Yahudi idi luk baken dengan rasul-rasul.
5 Idi lun pupu baken dengan lun Yahudi idi lun rayeh-rayeh nepamung sikal ngedereh rasul-rasul idi mitung nedidueh ku batu.
6 Kareb didueh nekali' ratnan ineh idi didueh neburo iné' déi' Listra idi Derbi déi' bawang Likonia, idi libut-libut bawang ineh teh.
7 Idi déi' teh didueh nemada' Bala luk Do' ineh.
8 Déi' Listra inan aceh lemulun luk meliai rat isuut, idi luk na tupu nekali' nalan.
9 Ieh neninger bala Paulus, idi Paulus nekali' neneh manu merapet miak nalan,
10 idi kebala Paulus dengan bala luk rayeh, "Tuped iko!" Idi ieh nesikau'-sikau' idi petacu nalan.
11 Kareb lun mula' nekali' luk inau' Paulus, idi ideh nengitang dengan buri' lun Likonia, "Allah-allah pangeh netemurun kuan tau nemaya' ayu lemulun."
12 Idi ideh neneten Barnabas ineh Sius, idi Paulus ineh Hermis ngaceku ieh luk megéi' pebala.
13 Idi imam Sius, luk kuan ruma' akang pa atun bawang ineh, nenguit sapi' idi busak kuan anid-anid tanga' bawang ineh, idi sikal maré luk barénneh kuan lun mula' ineh.
14 Kareb Barnabas idi Paulus neninger ratnan luk pian ruendeh, idi didueh nenarak ayung didueh idi nupun semuet arang uned lun mula' idi nengitang,
15 kebala didueh, "O amung-amung muyuh, anunké punneh muyuh nganau' kudeng ini? Kai ini pana' lemulun teh mepad kudeng muyuh, idi kai nguit kuan muyuh Bala luk Do', pad muyuh miak teketed ratnan luk mo'-mo' ini idi lumi nan Allah luk mulun, idi luk nemudut langit, tana', idi abpa' rayeh dengan amung uangneh.
16 Idi mon Allah nemaré amung-amung pupu nalan maya' piandeh sebuleng.
17 Iamo Ieh megéi' ngegala' laludNeh, ratnan Ieh nganau' luk do' idi maré kuan muyuh udan rat déi' langit idi bua' bang kareb luk petulu. Idi Ieh ngebor nemuyuh ku akan idi awang teh."
18 Idi dengan bala ineh pana' mesusa' teh luun rasul ineh nemebpeng nelun mula' ineh pad ideh na maré luk baréndeh kuan didueh.
19 Iamo' lun Yahudi nacing rat Antiokia luk déi' Pisidia idi Ikonium; idi ideh nengubuk nelun mula', pad ideh nemitung ni Paulus ku batu idi nengeruid neneh rat bang bawang ineh, idi ideh nengerawé neneh naté.
20 Iamo' kareb lun manu ineh netuped iringneh, idi ieh netumui idi nesemuet bang bawang. Idi kenebpa ieh nemaya' ni Barnabas lemubed amé' Derbi.
21 Paulus idi Barnabas nemada' Bala luk Do' déi' Derbi, pad mula' lemulun manu. Pangeh ineh, idi didueh nelemubed iné' Listra, Ikonium, idi Antiokia luk déi' Pisidia.
22 Didueh nengepicet anu lun manu ineh, idi nengecuk nedeh lutep bang anu, kebala didueh, "Idi na miak na tau medereh semuet bang Imet Allah."
23 Idi didueh nemili' lun rayeh-rayeh bang anid-anid sidang. Idi dengan sembayang idi mawa', didueh nemaré nedeh bang palad Tuhan luk inandeh manu.
24 Pangeh ineh didueh nelemaba bawang Pisidia, idi didueh nacing déi' Pampilia.
25 Didueh nemada' bala Allah déi' Perga, idi iné' déi' Atalia,
26 idi rat déi' didueh nenalan maya' kapal macing déi' Antiokia, su luk inan didueh atun biré bang palad Allah, kuan kekamen luk pangeh inau' didueh ineh.
27 Kareb didueh nacing déi' Antiokia, idi didueh nengamung nelun sidang ineh idi nemada' nedeh ratnan amung-amung luk inau' Allah kuan didueh, idi kudeng apeh Allah nengukab tanga' anu kuan lun pupu baken.
28 Idi mio didueh netudo déi' dengan lun manu ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA