Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq Ikonium Paulus dait Barnabas ẽndah lumbar ojok balẽ ibadah Yahudi, dait ngajahang sehingge luwẽq dengan Yahudi dait dengan bangse-bangse lain jari percaye lẽq Deside Isa.

² Laguq dengan-dengan Yahudi saq ndẽq mẽlẽ percaye, hasut dengan bangse-bangse lain, sehingge miaq ie pade gedek lẽq dengan-dengan saq percaye tipaq Deside Isa.

³ Keranaq nike Paulus dait Barnabas ngonẽq ndot lẽq derike. Dait ie pade bani gati bebaos mengenai Tuhan. Make Ie ẽndah neguqang berite saq ie pade sampẽang mengenai rahmat-Ne, Ie ngicanin ie pade kuase jari ngelaksaneang keajaipan-keajaipan dait hal-hal saq luar biase.

⁴ Laguq penduduk kote nike ndẽq patuh sopoq kance saq lainne; araq saq bepihak lẽq dengan-dengan Yahudi dait araq saq bepihak lẽq rasul-rasul nike.

⁵ Terus dengan-dengan Yahudi dait pemimpin-pemimpinne bareng-bareng kance dengan bangse-bangse lain besepakat jari nyiksaq dait melẽwas rasul-rasul nike kadu batu.

⁶ Laguq rasul-rasul nike sadar lẽq keadaan nike, terus nyingkir ojok Listra dait Derbe, kote-kote lẽq Likaonia, dait ojok daẽrah sekiterne.

⁷ Lẽq derike ie pade ngabarang malik Kabar Solah nike.

⁸ Lẽq Listra araq sopoq dengan mame saq naẽne kẽpaq lẽman ie tebijeang, sehingge ie ndẽq uwah tao lampaq sẽngaq naẽne ndẽq kuat.

⁹ Dengan nike tokol lẽq derike dengahang Paulus bebaos. Paulus serioq bahwe dengan nike percaye dait bau teselahang. Make Paulus merhatiang ie.

¹⁰ Dait siq suare saq belẽq Paulus bebase, "Silaq nganjeng saq solah!" Dengan nike nyelontak nganjeng terus lampaq.

¹¹ Waktu dengan luwẽq serioq napi saq sampun telaksaneang siq Paulus, ie pade bekuih kadu base Likaonia, "Dẽwe-dẽwe sampun turun ojok dunie kadu awak manusie."

¹² Terus Barnabas ie pade aranin Zeus, dait Paulus ie pade aranin Hermes, sẽngaq ie saq bebaos.

¹³ Imam dẽwe Zeus, saq taoq ibadahne araq lẽq julu kote, dateng jauq sampi mame dait kembang-kembang ojok jebak belẽq kote. Ie mẽlẽ milu kance dengan luwẽq nike ngaturang kurban tipaq rasul-rasul nike.

¹⁴ Waktu Barnabas dait Paulus pirengang napi saq gen telaksaneang siq dengan-dengan nike, ie pade ngeroẽk-roẽk kelambine sambil ie pade pelai ojok tengaq-tengaq dengan luwẽq nike, beterus nyurak,

¹⁵ "Hai, kembẽq side pade ngelaksaneang hal niki? Tiang pade niki manusie ẽndah pade maraq side! Tiang pade dateng ojok deriki jari nyampẽang Kabar Solah tipaq side, adẽq side pade tetẽh hal-hal saq ndẽq araq manpaatne niki, dait bebalik tipaq Allah saq idup, saq jariang langit dait gumi, segare dait selapuq isine.

¹⁶ Lẽq waktu saq laẽq Allah menengang bangse-bangse idup menurut kemẽlẽq ie pade sopoq-sopoq.

¹⁷ Laguq Allah nẽnten lupaq ngicanin bukti-bukti mengenai diriq-Ne siq ngelaksaneang saq bagus. Ie ngicanin side ujan lẽman langit dait hasil tanaq lẽq musimne. Ie ngicanin keloran lẽq side dait nyenengang angende."

¹⁸ Laguq siq ucapan-ucapan nike masih sengke ẽndah rasul-rasul nike segah dengan-dengan nike jauq kurban tipaq ie pade.

¹⁹ Dengan-dengan Yahudi saq dateng ojok Listra lẽman Antiokia lẽq Pisidia dait lẽman Ikonium pengaruhin dengan luwẽq nike sehingge dengan-dengan nike bepihak lẽq ie pade. Terus ie pade pelẽwas Paulus kadu batu, dait orosne ojok luah kote. Ie pade paran Paulus sampun ninggal,

²⁰ laguq waktu dengan-dengan saq percaye lẽq derike nganjeng lẽq sekeliningne, ie ures dait tame malik ojok kote. Jemaqne ie berangkat ojok Derbe bareng kance Barnabas.

²¹ Lẽq Derbe Paulus dait Barnabas nyampẽang Kabar Solah nike dait luwẽq dengan jari percaye lẽq Deside Isa. Sesampun nike ie pade tulak ojok Listra, beterus ojok Ikonium, Antiokia lẽq Pisidia.

²² Lẽq kote-kote nike ie pade neguqang angen pengiring-pengiring nike dait nasẽhat ie pade adẽqne tetep lẽq dalem iman, dait bebase bahwe jari tame ojok dalem Kerajaan Allah ite harus ngalamin luwẽq sengsare.

²³ Dait lẽq sebilang jemaah, Paulus dait Barnabas ngangkat pemimpin-pemimpin umaq jemaah-jemaah nike, terus siq do'e dait puase, ie pade nyerahang pemimpin-pemimpin nike ojok Tuhan saq ie pade percaye nike.

²⁴ Sesampun nike Paulus dait Barnabas ngelanjutang kelampan ie pade liwatin daẽrah Pisidia dait dateng lẽq Pampilia.

²⁵ Dait sesampun ie pade nyampẽang Manik Allah lẽq Perga, ie pade lumbar ojok Atalia.

²⁶ Lẽman derike ie pade belayar tulak ojok Antiokia. Nike kote taoqne ie pade teserahang laẽq tipaq rahmat Allah, adẽq ie pade ngelaksaneang pegawẽan saq mangkin sampun ie pade tutuqang.

²⁷ Sewaktu dateng lẽq Antiokia, ie pade ngumpulang dengan-dengan lẽman jemaah nike, terus nyeriteang selapuq saq sampun tekaryeang siq Allah langan ie pade. Ie pade nyeriteang ẽndah berembẽ Allah sampun bukaq langan adẽq dengan bangse-bangse lain beriman dalem Deside Isa.

²⁸ Lẽq kote nike Paulus dait Barnabas ngonẽq ndot kance dengan-dengan percaye.

Kisah Para Rasul

Video Kisah Para Rasul 14

Ikuti Kami:

KONTAK | PARTISIPASI | DONASI