Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu nike Raje Herodes mulai keras lẽq anggote-anggote jemaah.

² Siq prẽntahne, Yakub, semetonne Yahya tematẽq kadu klẽwang.

³ Sewaktu Herodes serioq bahwe perbuatanne nike nyenengang angen dengan-dengan Yahudi, ie piaq malik maraq nike; ie suruq dengan bau Petrus ẽndah. Hal nike telaksane waktu Hari Raye Ruti Ndẽq Beragi.

⁴ Sesampun tebau, Petrus tetamaq ojok dalem bui. Empat regu tentere tetugasang jari jagaq Petrus lẽq derike -- sopoq-sopoq regu berisi empat tentere. Sesampun perayaan Paskah inggas, baruq Herodes gen ngadilin Petrus lẽq julun dengan luwẽq.

⁵ Jari Petrus tetahen lẽq bui; laguq jemaah do'eang ie pacu-pacu tipaq Allah.

⁶ Lẽq kelem sendẽqman Herodes jauq Petrus lẽq julun dengan luwẽq, Petrus mesarẽ tetaliq kadu due rantẽ besi lẽq antare due tentere pengawal. Lẽq lawang bui, pengawal-pengawal lain ẽndah kenyeke jagaq bui.

⁷ Selung-selung malaẽkat Tuhan nganjeng lẽq derike dait araq sopoq cahaye saq besinar lẽq dalem kamar bui nike. Malaẽkat nike dodoq Petrus jangke ie ngase. Beterus manik malaẽkat nike, "Hai, becat ures!" Waktu nike ẽndah rantẽ besi nike teriq lẽman ime Petrus.

⁸ Sesampun nike malaẽkat nike bemanik, "Kadu kelambinde dait taliq sepatunde." Make Petrus ngengadu kelambine dait naliq sepatune. Beterus malaẽkat nike bemanik malik, "Kadu jubahde, dait turut tiang."

⁹ Make Petrus milu bareng malaẽkat nike sugul lẽman bui. Laguq Petrus ndẽq sadar bahwe napi saq kenyeke telaksaneang siq malaẽkat nike siq malaẽkat nike tetu-tetu telaksane. Petrus paran nike cume sopoq penyerioqan.

¹⁰ Sesampun ie pade liwatin taoq penjagaan saq penembẽq dait saq kedue, ie pade dateng lẽq lawang besi, saq nuju ojok kote. Lawang nike kebukaq mẽsaq, terus ie pade sugul dait lampaq langan sopoq pengorong. Selung-selung malaẽkat nike bilin Petrus.

¹¹ Sesampun nike Petrus baruq sadar lẽq napi saq sampun telaksane lẽq diriqne, terus ie bebase, "Mangkin tiang nenaoq bahwe Tuhan tetu-tetu sampun ngirim malaẽkat-Ne jari bẽbasang tiang lẽman kuase Herodes, dait lẽman selapuq hal saq gen telaksaneang siq bangse Yahudi tipaq tiang."

¹² Sesampun ie sadar lẽq keadaan nike, Petrus lumbar ojok balẽ Mariam, inaqne Yahya saq tesebut ẽndah Markus. Lẽq derike luwẽq dengan bekumpul dait kenyeke bedo'e.

¹³ Petrus ngetok lawang jebak, terus sopoq dengan pelayan nine aranne Rode, dateng jari bukaq jebak.

¹⁴ Langsung ie tandaq suare Petrus. Lantaran cemohne, ie becat-becat tame malik ndẽqne bukaqang lawang juluq, terus badaqang lẽq dengan-dengan lẽq derike bahwe Petrus araq lẽq luah.

¹⁵ "Side jogang!" basen ie pade. Laguq Rode pagah bebadaq bahwe nike tetu-tetu Petrus. Make ie pade bebase, "Nike malaẽkatne!"

¹⁶ Laguq Petrus terus doang ngetok lawang. Make sewaktu ie pade bukaq lawang, dait serioqne Petrus, ie pade bengaq gati.

¹⁷ Petrus ngebẽng tande kadu imene adẽq ie pade tenang, beterus ie nyeriteang berembẽ Tuhan sampun gadingang ie sugul lẽman bui. Sesampun nike ie bebase, "Sampẽang hal niki tipaq Yakub dait semeton-semeton saq lain ẽndah." Beterus Petrus bilin taoq nike dait lumbar ojok taoq saq lain.

¹⁸ Jemaq kelẽmaqne araq keributan lẽq antare tentere pengawal. Ie pade bingung gati mikirang napi saq sampun telaksane tipaq Petrus.

¹⁹ Terus Herodes mrẽntahang dengan boyaq Petrus, laguq ie pade ndẽq iniq ndait ie. Jari Herodes mrẽntahang adẽq pengawal-pengawal nike teketuan terus tematẽq. Sesampun nike Herodes lumbar lẽman Yudea ojok Kaisarea dait ndot lẽq derike.

²⁰ Herodes menggah gati lẽq dengan-dengan Tirus dait Sidon. Keranaq nike ie pade bareng-bareng ngadep Herodes. Mule-mule ie pade kẽdẽq Blastus, saq jari kepale istane Herodes, sehingge ie bepihak lẽq ie pade. Sesampun nike ie lumbar ngadep Herodes, terus tunas bedamẽ, sẽngaq negeri ie pade beharep sepenoqne lẽq keloran lẽman negeri Herodes.

²¹ Lẽq sopoq jelo saq sampun tetentuang, Herodes kadu kuace kerajaanne, terus melinggih lẽq kursi kerajaan dait mulai pidato lẽq julu rakyat.

²² Rakyat saq kenyeke dengahang pidato nike bekuih-kuih, "Niki suare Dẽwe, ndẽqne suare manusie!"

²³ Lẽq waktu nike ẽndah malaẽkat Tuhan tamper Herodes, sẽngaq ie ndẽq hormatin Allah. Herodes tekaken siq longe, terus ninggal.

²⁴ Make Manik Allah sayan nyebar dait sayan luwẽq tedengah siq dengan.

²⁵ Sesampun Barnabas dait Saulus nutuqang tugasne, ie pade tulak lẽman Yerusalem dait jauqne Yahya saq tesebut ẽndah Markus, bareng kance ie pade.

Kisah Para Rasul

Video Kisah Para Rasul 12

Ikuti Kami:

KONTAK | PARTISIPASI | DONASI