Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ko wakutu intua ki Raja Herodes nomangkoidon momogutuí kom bayongan jama'at.
2 Sia in nomarentah nokirata ko'i Yakobus inta ki utat i Yohanes
3 Naonda ing kinota'auannya kon oaíidnya tatua mokosanang kong gina im bayongan intau Yahudi, umurannya bo inaidan onu inta diaí mopia tatua; sia noki domok domandon ko'i Petrus sim bonuon kom ponjara. Wakutu intua Singgai Poramean Roti Diaí Koragi.
4 Kom bonu im ponjara tatua ki Petrus iḷukadan in tontara opat norogu. Kon torogu opat in tontara. Sim makusud monia aka mopaḷutdon kon singgai im Paskah, yo adilondon i Herodes in sia kon tayowon intau moaíntoí.
5 Daí ki Petrus sinahang kom bonu im ponjara, ta'e umuran sambayagan im bayongan jama'at simbaí tantuí in sia tuḷungan i Allah.
6 Doḷom wakutu in diaípa dinia i Herodes in sia kon tayowon intau moaíntoí, ki Petrus sinokig in rante bo pinoposiug kon sigad in tontara doyowa inta moḷukadmai ko'inia. Bo ḷolingkop im ponjara tatua iḷukadan doman in tontara mita ibanea.
7 Indoianmai no'isindogbií magií malaekat i Tuhan kon tua bo nonimbayag kom bonu im ponjara. Malaekat tatua noguḷung ko'i Petrus sahinggai in no'i bangon. Bo malaekat tatua noguman, "Hei, ḷagidon pobangon!" Daí kon dodaipa doman intua bo notontak in rante uatoi inta pinotokig kon limanya.
8 Onda intua malaekat tatua noguman, "Pakeídon ḷambung bo sapatumu." Daí pinakeí doman i Petrus in ḷambung bo sapatunya. Malaekat tatua bui noguman, "Pakeí domandon in jubahmu bo koligai dudui ko'inakoí."
9 Bo dinumudui ing ki Petrus kom malaekat tatua iḷumuai nongkon ponjara tatua. Ta'e diaíbií kinota'auannya kon onu inta inaidan malaekat tatua in totu-totu'ubií nobalií. Kainia kamai daí tongaíbií naí oyuíon in no'iḷabotmai kom matanya.
10 Bo naonda ing kinotaliban monia in tampat poḷoḷukadan inta muna bo induanya mosia no'idapotdon in ḷolingkop uatoi. Ngara tatua daḷan mopobayak ing kotaí. ḷolingkop tatua nobukat tontanií, bo iḷumuai im mosia nongin lorong. Bo malaekat baḷuídon nonaḷaímai ko'i Petrus.
11 Bain kon tua bo kinota'auannya onu inta nobalií ko'inia, bo sia noguman, "Tana'a makow kinota'auankudon kong ki Tuhan totu-totu'ubií nopotabaí im malaekat-Nya moposaḷamat ko'inakoí nongkon kawasa i Herodes bo nongkon rupa-rupa inta mora'at inta popoaíid in intau Yahudi ko'inakoí."
12 Bo naonda ing kinomangaleannyadon intua komintan, sia minayak im baḷoi Maria, ki inaí i Yohanes inta dinonoi ki Markus. Kon tua mobarong totok intau noyosipun bo mosambayang.
13 No'iyaputmai kon tua, sia nonangkokok kon ḷolingkop, daí inangoi bo inindoian in tobatuí bobantung bobay inta ki Rode in tangoinya. Munapabií sinarapnya mongo ki ine in nonangkokok tatua.
14 Ta'e baḷuínyadon kinota'auan kong ki Petrus intua. Tongaí lantaran kinoliuan pia ing ginanya, daí diaípabií binukatannya in ḷolingkop tatua, minayakpabií in sia bo noguman kom bayongan intau inta noyosipun kon tua kong ki Petrus tua kon ḷuai.
15 Intau mita kon tua diaíbií nopirisaya sedang bo siningogbií monia nana'a in sia, "Degaí bo binombuḷowbií in ikow nion!" Ta'e ki Rode umuran moguman kon totu-totu'ubií ki Petrus intua kon ḷuai. Daí kai monia doman, "Malaekatnyabií intua!"
16 Bo tantuídon ing ki Petrus nonangkokok. Daí naonda im binukatan monia in ḷolingkop, bo noko'ontongdon ko'i Petrus, mosia komintan nongoherang.
17 Ta'e ki Petrus nonuḷadaí in noguman kom baí mosia kibio-bioímaidon, onda intua ino'umanyadon kong ki Tuhanbií in nodia ko'inia iḷumuai nongkon ponjara. Bo sia noguman doman, "O'umanpa ko'i Yakobus bo ko'i utat mita naton onu inta ain nobalií tana'a ko'inakoí." Onda intua iḷumuaidon in sia bo minayak in tampat ibanea makow.
18 Nobangon monik doḷo-doḷom noributdon totok in tontara mita inta noḷukad ko'inia. Mosia nobingung totok bo nosiliboían mongo onu in nobalií ko'i Petrus.
19 Bo pinokitayak i Herodes kon intau mita tatua ing ki Petrus, ta'e diaí no'ulií monia. Daí pinokipirikisadon i Herodes in tontara mita inta moḷoḷukad, nopaḷut makow bo pinokilimod nodait im mosia. Onda intua ki Herodes minayakdon nongkon Yudea bo nogutun tongonumai nosinggai kong Kaisarea.
20 Ki Herodes totok sinumoru' kon intau mita in Tirus bo Sidon. Manangka intua noyotakin im mosia minayak kon tayowon i Herodes. Muna mosia nodondo'uḷug ko'i Blastus, inta nobali itoi kon istana i Herodes, daí sinuḷungannya im mosia. Onda intua minayak im mosia ko'i Herodes bo nopo'igum simbaí moyodamedon, sing ka'anon intau mita kon lipuí monia tongaíbií mo'ulií nongkon butaí inta kom bonu ing kakuasaan i Herodes.
21 Kon tobatuí singgai inta ain sinantuí, ki Herodes nogiḷambungdon, in ḷambung raja bo ilimituí kon tampat pomomarenta'annya bo nosingog kon tayowon intau mobarong tatua.
22 Daí intau mita moaíntoí kon tua totok momaḷuí im moguman, "Singogbií in dewa na'a, de'emanbií singog in intau!"
23 Bo kon dodaipa doman intua sinokap im malaekat i Allah in sia sin totokdon mopo'ompaímai ko'i Allah. Pangabisannya minatoi in sia bo kina'an in oḷuasi mita.
24 Daí totokdon no'ihabar magií makow im pirman i Allah sahingga in nobayongdon totok intau nopirisaya.
25 Naonda in nopaḷutdon in oaíidan i Barnabas bo i Saulus, mosia nobuidon nongkon Yerusalem bo nodia ko'i Yohanes Markus noyotakin monia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA