Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Bei nai teuk ndia dale na boe, Mane Herode sa mulai tunindeni hataholi salani kala.

² Hu no ndia paleta na de ala do'dolisa Yakobis, fo Yohanis tolanoo na ninik tafaina.

³ Lelek fo Herodes nita ndia tatao-nono'in ndia nandaa no hataholi Yahudi la dale na boema, ana tao seluk leondiak. Nadenu hataholi la leu ho'u Petrus boe. Dede'ak ndia ana da'di la'e Fai Matua Loti Ta Pake Lalu Tei ka.

⁴ Ala ho'u la Petrus boema, ala taon leo bui dale neu. Ala fe soldadu bubuak ha lanea Petrus nai bui dale bubuak esa soona, soldadu ha. Feta Paskah basa boema, besa ka Herodes palisak Petrus dede'a na nai lea matan.

⁵ Da'di ala huku lahele Petrus neme bui dale. Tehu hataholi salani kala hule-haladoi te'e-te'e neu Lamatua ka soaneu Petrus.

⁶ Sanga balahaa fo Herodes palisak Petrus dede'a na nai lea matan boema, le'odaek ndia Petrus sungu no nanapa'ak ninik namosina dua nai solda'du mana manea dua tala'da. Solda'du mana manea fe'e kala boeo, bei lanea lahele nai uma bui lelesu nala.

⁷ No kaiboik, Lamatua ka ata nusa so'dan esa napadeik nai kama ndia dalek, de masa'ak esa nangale'o nai kama ndia dalek. Ata nusa so'dak ndia kakakuk Petrus losa ana fo'a. Boema ata nusa so'dak ndia nafa'dan nae, "Wei, fo'a lai lai leona!" No hatematak ndia boe, namosina nanapa'ak nai Petrus lima na, tu'dahenin.

⁸ Basa ndia boema, ata nusa so'dak ndia nafa'dan nae, "Pake o bualo'am ma pa'a o ta'bu ei ma tali na leona." Boema Petrus ana pake bualo'an ma ana pa'a ta'buei na tali na. Basa ndia boema, ata nusa so'dak ndia nafa'dan nae, "Pake o buapapake ma, ma pa'a o tabu ei ma tali na." Boema Petrus pake buapapake na, ma ana pa'a tabu ei na tali na. Basa boema, ata nusa so'dak ndia nafa'da selu kana nae, "Pake o ba'du manalu ma fo tunga au leona."

⁹ Boema Petrus tunga ata nusa so'dak ndia de ala kalua leme bui dale mai. Tehu Petrus ta name'da hata fo ata nusa so'da ka taon ndia nde bee na, hata esa ana da'di te'e-te'e. Petrus naedaenga manda'dik ndia ka'da ninitak esa mesa kana ndia.

¹⁰ Lelek ala la'oseli mamana nanea makasososa ka ma kadua boema, ala losa lelesu besi fo lelesu ndia nasale leo kota neu. Lelesu ndia ana soi aon de ala kalua leo deak leu, boema ala la'ok tunga mangalolok esa. No kaiboik, ata nusa so'dak ndia la'oela Petrus.

¹¹ Basa ndia besa ka Petrus name'da hata da'din so, boema ana kokolak nae, "Besak ia au bubuluk te'e-te'e, Lamatua ka haitua ata nusa so'da na mai fo ana soi-po'i au eme Herodes koasa na, ma neme basa hata fo leoina Yahudi la sanga taon neu au a."

¹² Petrus bubuluk basa manda'dik ndia boema neu leo Maria uman neu. Maria ia Yohanis inan, fo loke Yohanis soona lae, Markus boe. Hataholi makadotok lakabubua lai uma ndia de ala hule-haladoi.

¹³ Petrus dedelu lelesu manai dea ka, boema ina mana malalau esa na'de Rode, ana mai soi lelesu a.

¹⁴ Tutika nalelak Petrus hala na. Hu ka nde namahoko nanseli, de ana fali lai-lai leo dalek neu, te ana ta soi lelesu a fa. Neu boema nafa'da hataholi manai sila la nae, Petrus nai deak.

¹⁵ Boema laen lae, "O mamulu ia do!" Tehu Rode nahele ka'da, tete'e ka, Petrus nde ndia. Boema lae, "Petrus ata nusa so'da na nde ndia."

¹⁶ Ndia te Petrus dedelu nahele lelesu a. Ala soi lelesu a de lita Petrus boema, ala dodoo doa kana.

¹⁷ Petrus nababa'a lima fo daenga bedenge, de basa boema ana tuis, tao tao leo beek de Lamatua ka ana kalua ndia neme bui dale mai. Boema nafa'das nae, "Mafa'da dede'ak ia neu Yakobis ma tolanoo fe'e kala boe." Basa ndia boema, Petrus la'oela mamanak ndia, de neu leo mamana fe'ek neu.

¹⁸ Balahaa fafaik boema, tasi'bu da'di nai solda'du mana manea la dalek. Lapangamak lanseli la'eneu hata fo ana da'di neu Petru sa.

¹⁹ Boema Herodes nadenu hataholi neu sanga Petrus, tehu ala ta hapu fan. Da'di Herodes fe paleta fo latane solda'du mana manea sila la fo tao lisas. Basa ndia boema, Herodes la'oela Yudea de neu leo neme Kaisarea, faik de'ubee dale na.

²⁰ Ndia te, Herodes namanasa mangalalau hataholi Tiru sala ma hataholi Sido nala. Hu ndia de, hataholi sila la basa-basas mai de lasale lan. Makasososa na ala fufu'di Blastus, fo ndia malangan nai Herodes uma mane na, de nalosa Blastus no kasa. Basa ndia boema leu leo Herodes leu fo loke dame, nana hataholi sila la nusa na, lamahena hapu nana'ak neme Herodes nusa na mai.

²¹ Neu faik fo laketu basa ka boema, Herodes pake papake matua-mademan de nangatuuk neu kandela paletan lain, boema ana mulai kokolak nai lau nala matan.

²² Laun mana mamanenek sila la lalo ma lae, "Nitu lalai sa halan ia, te hataholi daebafak halan ta ia fa!"

²³ No hatematak ndia boe, Lamatua ka ata nusa so'da na fapa Herodes, nana ana ta fe ha'da-holomata neu Manetualain fa. Boema kalati kala la'a Herodes de maten.

²⁴ Boema Manetualain dede'a-kokolan boetai namaloa ka, ma boetai natea-nahele.

²⁵ Barnabas no Saulus tao lakababasak sila belaba'un boema, lo Yohanis Markus de ala la'oela Yerusalem.

Kisah Para Rasul

Video Kisah Para Rasul 12

Ikuti Kami:

KONTAK | PARTISIPASI | DONASI