Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Di hatiha i mamungka ma Raja Herodes mamparkanciti piga-piga halak sian ruas ni parlagutan.

² Hara ni parentania, dibunu ma si Jakobus anggi ni si Johannes dohot podang.

³ Dung diida Raja Herodes na sonang do roha ni halak Jahudi mida pambaenannia i, gabe didatdati ia ma mambaen na songon i, disuru ia muse ma ditangkup si Petrus. Hatiha Ari Pesta Roti Na So Marragi ma i dipajadi.

⁴ Dung ditangkup si Petrus, dipamasuk halahi ma ia tu hurungan. Diparentahon ma opat rombongan tentara manjago si Petrus di hurungan i. Opat halak ma tentara i sapunguan. Dung sidung Ari Pesta Paskah pe anso adilan ni Raja Herodes si Petrus di jolo ni halak na bahat.

⁵ Jadi ditahan ma si Petrus di hurungan i; tapi anggo angka anggota ni parlagutan i, sai torus do halahi marsitutu manangiangkon si Petrus tu Tuhan.

⁶ Borngin i andorang so paadopon ni Raja Herodes si Petrus tu jolo ni halak na bahat, modom ma si Petrus laing dirante di antara ni dua halak tentara panjago i. Laing dijagoi tentara na asing i do sude pintu ni hurungan i.

⁷ Jadi ompot ma jongjong Surusuruan Ni Tuhan disi, jana gabe ro ma sinondang na torang di bagasan kamar ni hurungan i. Dihutur-hutur surusuruan i ma si Petrus lopus tarsunggul. Dung i didok surusuruan i ma, "Ompoti ma ngot!" Manigor talgang ma rante i sian tangan ni si Petrus.

⁸ Dung i didok surusuruan i ma tusia, "Hohosi ma ho jana pake ma sipatumi!" Dibaen ia ma songon i. Didok surusuruan i ma muse, "Pake ma bajumu jana ihutkon ma au!"

⁹ Diihutkon si Petrus ma surusuruan i ruar sian hurungan i. Tapi nada diboto si Petrus hape na tutu do tarjadi na nibaen ni surusuruan i. Ning rohania bagi na songon parnidaan sajo do na masa i.

¹⁰ Dung disalpui halahi panjago na parjolo dohot na paduahon, lalu ma halahi tu pintu bosi, i ma haruaran tu kota i. Mungkap sandiri ma pintu i, haruar ma halahi, dibolus halahi ma sada dalan na sompit. Jadi tompu ma ditadingkon surusuruan i si Petrus.

¹¹ Dung i pe anso tarhalak si Petrus jana diboto ia ma aha na tarjadi i tusia, gabe didok ia ma, "Saonnari pe anso tangkas huboto na tutu situtu do hape ditongos Tuhan i surusuruanNia paluahon au sian kuaso ni Raja Herodes dohot sian sasude na giot baenon ni halak Jahudi i tu au."

¹² Dung diboto si Petrus na songon i pangalahona, kehe ma ia tu bagas ni si Maria, inang ni si Johannes na nigoaran muse si Markus. Madung bahat disi marlagut halak jana martangiang.

¹³ Ditektek si Petrus ma pintu i sian ruar, jana ro ma sahalak naposo dadaboru na margoar si Rode laho mangungkap pintu i.

¹⁴ Manigor ditanda ia ma sora ni si Petrus. Hara ni jop ni rohania, diompoti ia ma masuk mangulahi so jolo dibuka ia pintu i; dipaboa ia ma tu halak na disi, na di jolo ni pintu i do si Petrus.

¹⁵ Jadi didok halahi ma tu dadaboru i, "Na lalaen do ho!" Tapi laing digogohon ia do mandok, na tutu do i. Jadi didok halahi ma, "Surusuruannia do da i!"

¹⁶ Jadi laing dipupu si Petrus ma manektehi pintu i. Jadi dung dibuka halahi pintu i, diida halahi ma tutu si Petrus, homang sajo ma roha ni halahi.

¹⁷ Jadi dihiap si Petrus ma halahi anso hohom dung i dibaritahon ia ma tu halahi pardalanna na diparuar Tuhan i ia sian hurungan i. Jadi ning ia ma, "Paboa hamu ma jolo on tu si Jakobus dohot tu angka dongan na asing i." Dung i kehe ma si Petrus manadingkon inganan i tu inganan na asing.

¹⁸ Manyogotna i masa ma hagaoran di tonga-tonga ni angka tentara na manjago i. Sapasapa ma halahi aha do na dung tarjadi tu si Petrus.

¹⁹ Disuru Raja Herodes ma na manjalahi si Petrus, hape nada dapot halahi be ia. Jadi diparentahon Raja Herodes ma anso nipareso angka tentara panjago i lalu nibunu. Dung i kehe ma Raja Herodes sian Judea tu Kaisarea, disi ma ia maringanan sanga na sadia honok.

²⁰ Muruk sajo ma roha ni Raja Herodes mida halak Tirus dohot halak Sidon. Jadi rap kehe ma halahi mangadop tu Raja Herodes. Jolo dielek halahi ma si Blastus kapala ni bagas godang ni raja i, anso mamihak tu halahi ia. Dung i kehe ma halahi mangadop tu si Herodes mangidohon anso mardame, angke sian harajaan ni Raja Herodes do haroroan ni panganon tu luat ni halahi.

²¹ Di sada ari na dung ditontuhon, dipake Raja Herodes ma pakean hasangapannia, juguk ma ia di habangsa ni harajaannia i marpidato di jolo ni rayatnia.

²² Marsurahi ma rayat na umbege pidatonia i mandok, "Hata ni debata do on, nada hata ni jolma be da i!" ning halahi.

²³ Santongkin i manigor ro ma Surusuruan Ni Tuhan manampeleng si Herodes, hara ni na so nihormatannia Debata. Dipapangani binga ma ia lalu mate.

²⁴ Mur rarat ma hata ni Debata jana mur gogo.

²⁵ Dung sidung tohap na nikarejohon ni si Barnabas dohot si Saulus, mulak ma halahi sian Jerusalem, dioban halahi ma si Johannes Markus rap dohot halahi.

Kisah Para Rasul

Video Kisah Para Rasul 12

Ikuti Kami:

KONTAK | PARTISIPASI | DONASI