Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rasul-rasul dait dengan-dengan saq percaye lẽq selapuq wilayah Yudea pirengang bahwe dengan bangse-bangse lain ẽndah sampun nerimaq Manik Allah.

² Beterus sewaktu Petrus lumbar ojok Yerusalem, dengan-dengan Yahudi saq sampun percaye nike, ngewade Petrus.

³ Ie pade bebase, "Kembẽq side lumbar ojok balẽ dengan-dengan saq ndẽqman besunat? Malahan side ẽndah bekelor bareng kance ie pade!"

⁴ Keranaq nike Petrus jelasang lẽq ie pade selapuq saq telaksane lẽman penembẽqne. Petrus bebase,

⁵ "Tiang kenyeke bedo'e lẽq kote Yope, beterus tiang serioq sopoq penyerioqan. Tiang serioq araq selembar lakar saq gamber teturunang lẽman langit, begantung lẽq keempat bucune, beterus ndot lẽq sedin tiang.

⁶ Sewaktu tiang perhatiang lẽq dalemne, tiang serioq binatang-binatang benaẽ empat, binatang-binatang gamang, binatang saq ngumang dait kedit-kedit liah.

⁷ Beterus tiang dengah suare saq bemanik tipaq tiang, 'Silaq ures Petrus! Sembelẽh nike dait kelorang!'

⁸ Laguq tiang bejawab, 'Nẽnten Tuhan! Tiang nẽnten uwah ngelorang saq najis atao haram!'

⁹ Laguq suare nike bemanik malik lẽman langit, 'Barang saq sampun tenyatayang halal siq Allah ndẽq kanggo teparan haram.'

¹⁰ Tiang serioq hal nike jangke telu kali, terus selapuqne kerangkatan malik ojok sorge.

¹¹ Tepat waktu nike ẽndah telu dengan lẽman Kaisarea, saq teutus ojok tiang dateng lẽq balẽ taoq tiang madẽq.

¹² Beterus Roh Allah manikang tiang ndaq ragu-ragu lumbar bareng ie pade. Semeton saq enem dengan niki ẽndah milu bareng tiang ojok Kaisarea, dait tiang pade selapuq tame ojok dalem balẽne Kornelius.

¹³ Beterus Kornelius nyeriteang lẽq tiang pade berembẽ ie serioq sopoq malaẽkat nganjeng lẽq balẽne dait bemanik, 'Suruq dengan lumbar ojok Yope ngempoh sopoq dengan mame aranne Simon Petrus.

¹⁴ Ie gen nyampẽang tipaq side berite saq gen nyelametang side dait selapuq dengan saq araq lẽq balẽnde.'

¹⁵ Beterus Petrus bebase malik," dait lẽq waktu tiang mulai ngeraos, "Roh Suci turun ojok atas ie pade, pade maraq saq telaksane lẽq ite laẽq waktu penembẽqne.

¹⁶ Beterus tiang inget, Junjungan Saq Mulie sampun bemanik, 'Yahya baptis dengan kadu aiq, laguq side pade gen tebaptis kadu Roh Suci.'

¹⁷ Jari, lamun Allah ẽndah ngicanin ie pade paice pade maraq saq Ie icanin tipaq ite sewaktu ite baruq percaye lẽq Junjungan Saq Mulie Deside Isa Almasih. Segerah tiang bau segah Allah!"

¹⁸ Sesampun pirengang hal nike, ie pade ndẽq ngeraos malik. Beterus ie pade mulieang Allah. Basen ie pade, "Lamun maraq nike dengan bangse-bangse lain ẽndah teicanin kesempatan siq Allah jari betobat dait nerimaq idup kekel."

¹⁹ Sesampun Stepanus tematẽq, dengan-dengan saq percaye lẽq Deside Isa mulai teaniaye, sehingge ie pade bepencar-pencar ojok mbẽ-mbẽ. Araq saq pelai jangke dateng Penisia, dait araq ẽndah saq jangke dateng Siprus dait Antiokia. Laguq ie pade beriteang Kabar Solah tipaq dengan-dengan Yahudi doang.

²⁰ Laguq lẽq antare ie pade, saq asalne lẽman Siprus dait Kirene, araq ẽndah saq lumbar ojok Antiokia. Ie pade beriteang Kabar Solah mengenai Deside Isa, Junjungan Saq Mulie, tipaq dengan-dengan Yunani.

²¹ Kuase Junjungan Saq Mulie araq lẽq ie pade sehingge luwẽq dengan jari percaye dait nyerahang diriqne tipaq Junjungan Saq Mulie.

²² Cerite-cerite mengenai peristiwe-peristiwe niki tedengah ẽndah jangke ojok jemaah lẽq Yerusalem. Make ie pade ngutus Barnabas ojok Antiokia.

²³ Dait sewaktu Barnabas dateng lẽq derike, dait serioq rahmat Allah tipaq dengan-dengan nike, ie gembire gati. Beterus ie tunas adẽq ie pade pacu-pacu setie lẽq Junjungan Saq Mulie siq sepenoq angenne.

²⁴ Barnabas niki dengan saq solah dait tekuasein siq Roh Suci dait kuat imanne. Dait luwẽq dengan dateng tipaq Junjungan Saq Mulie.

²⁵ Beterus Barnabas lumbar ojok Tarsus boyaq Saulus.

²⁶ Sesampun bedait kance Saulus, ie jauq Saulus ojok Antiokia dait setaun penoq ie pade bekumpul kance jemaah lẽq derike sambil ngajahang luwẽq dengan. Lẽq Antiokia nike dengan-dengan saq percaye lẽq Deside Isa penembẽqne tesebut dengan-dengan Nasrani.

²⁷ Lẽq mase nike araq pire nabi rauh lẽman Yerusalem ojok Antiokia.

²⁸ Lẽq antarene araq sopoq dengan aranne Agabus. Siq pimpinan Roh Allah ie benubuat bahwe lẽq seantẽro dunie gen araq bahle kelapahan saq belẽq. (Dait hal nike mule telaksane ẽndah lẽq waktu Kaisar Klaudius mrẽntah.)

²⁹ Make selapuq pengiring Deside Isa nike sepakat jari ngirim sumbangan tipaq semeton-semeton saq ndot lẽq Yudea; sopoq-sopoq ngirim menurut kemampuanne.

³⁰ Kesepakatan nike telaksaneang ẽndah, beterus Barnabas dait Saulus teutus jari ngatongang sumbangan nike ojok pemimpin-pemimpin jemaah.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI