Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tarbege ma tu angka rasul dohot tu angka na porsaya di sude Luat Judea hape na dung dohot do angka bangso na asing manjagit hata ni Debata.

² Jadi dung manangkok si Petrus tu Jerusalem hona hata ma ia dibaen halak Jahudi na porsaya i. Didok halahi ma,

³ "Biasi kehe ho tu bagas ni halak na so marsunat? Mangan muse dope ho rap dohot halahi!"

⁴ Jadi gabe dipatorang si Petrus ma tu halahi sudena na masa i sian mulana. Ning ia ma,

⁵ "Na martangiang do au di Jope, jadi tompu ma songon na mago rohangku, huida ma sada parnidaan. Huida ma ro tarsongon sada abit na bidang mijur sian langit, na gantung di suhi-suhi na opat i, jana so ma di lambungku.

⁶ Jadi dung huligi tu bagasan, huida ma angka binatang si opat pat, angka binatang na manjurur dohot angka unggas na riar.

⁷ Dung i hubege muse ma sora na mandok tu au, 'Jongjong ma ho, Petrus! Parsamboli ma i jana papangani!'

⁸ Tapi hualusi ma, 'Nada le Tuhan! Nada unjung dope hupangan sipanganon na haram sanga na hodar.'

⁹ Tapi didok sora i ma sian langit mangulahi, 'Sanga aha na dung dihalalkon ni Debata ulang ma didok i na haram.'

¹⁰ Jabat tolu noli huida pangalaho i jana ujungna diangkat ma sudena i tu langit.

¹¹ Jadi hatiha i ma sitolu halak na sian Kaisarea na disuru mandapotkon au lalu di bagas parbornginanki.

¹² Dung i disuru Tondi i ma au rap kehe dohot halahi so pola ganggu rohangku. Dohot do dongan sionom halak on rap dohot au tu Kaisarea, jana rap masuk do hami tu bagas ni si Kornelius.

¹³ Dung i dipajojor si Kornelius ma tu hami na niidania ro sahalak surusuruan jongjong di bagasnia mandok, 'Suruhon ma halak tu Jope mamiohon bayo na margoar si Simon Petrus.

¹⁴ Paboaonnia ma tu ho barita na paluahon ho rap dohot hamu na sabagas.'

¹⁵ Jadi di na hupungka mandok hata, ro ma Tondi Parbadia tu halahi tudos tu na masa tu hita nabaruon di mulana i.

¹⁶ Jadi tarsingot ma tu rohangku, na jungada didok Tuhan i, 'Si Johannes mandidihon dohot aek, tapi anggo hamu nipandidihon dohot Tondi Parbadia.'

¹⁷ Jadi tangkas do, dilehen Debata muse do tu halak na so marugamo Jahudi silehen-lehen na sarupa songon na nilehenNia tu hita di na tahaporsayai Tuhan Jesus Kristus. Antong, bia ma he pangalarangku di Debata!"

¹⁸ Jadi dung dibege halahi hata nangkinan i, nada be sai dialo halahi si Petrus. Dung i dipuji halahi ma Debata. Didok halahi ma, "Antong dipadohot Debata do halak na so marugamo Jahudi laho paubahon roha sian angka dosana be anso mangolu halahi."

¹⁹ Dung hona bunu si Stefanus, mamungka ma diayak-ayak sanga ise na porsaya tu Jesus, jana gabe marserak ma halahi sanga na tu dia. Adong ma na kehe lalu tu Punisia, adong muse ma na lalu tu Siprus dohot Antiokia. Hum tu halak Jahudi do dijamitahon halahi barita na sian Debata i. (Kota Antiokia di Luat Siria)

²⁰ Tapi adong do sian angka na porsaya i na marasal sian Siprus dohot sian Kirene na kehe lopus tu Antiokia. Jana dijamitahon halahi do Jamita Na Denggan bahaso Tuhan do Jesus i dohot tu angka halak Junani.

²¹ Jadi didongani tangan ni Tuhan do halahi mambaen bahat halak gabe porsaya jana pasahatkon dirina tu Tuhan.

²² Lalu do angka barita taringot tu angka na masa on lopus tu parlagutan na di Jerusalem. Jadi gabe disuru halahi ma si Barnabas tu Antiokia.

²³ Jana dung lalu si Barnabas disi, diida ia ma sanga na bia pamasumasu ni Debata di halahi, gabe jop sajo ma rohania. Dung i dipaingot ia ma halahi anso tongtong marsihohot tu Tuhan i.

²⁴ Na dengganan do roha ni si Barnabas on jana na nirajaan ni Tondi Parbadia boti porsaya situtu do ia tu Tuhan, jadi gabe bahat do halak na mangihutkon Tuhan i.

²⁵ Dung i kehe ma si Barnabas tu Tarsus manjalahi si Saulus.

²⁶ Dung marsuo ia dohot si Saulus, dioban ia ma si Saulus tu Antiokia, disi ma halahi sataon rap dohot parlagutan na di kota i, jana laing mangajari ma halahi tu halak na bahat. Di Antiokia on ma halak na porsaya tu Jesus na parjolo situtu digoari halak Kristen.

²⁷ Jadi marroan ma angka panurirang sian Jerusalem hatiha i tu Antiokia.

²⁸ Jadi jongjong ma sahalak sian halahi na margoar si Agabus. Dipatubu Tondi i ma tu rohania laho paboahon na giot masa haleon potir di tano on sudena. (Jana tutu do masa haleon potir di hatiha ni Kesar Klaudius mamarenta.)

²⁹ Jadi saroha ma sudena angka na porsaya i tu Jesus laho manongos pangurupion tu angka dongan na tinggal di Judea; marguru tu gogona be ma ditongos.

³⁰ Dipatulus be do tahi i, jana si Barnabas ma dohot si Saulus disuru halahi manaruhon pangurupion i tu angka pangituai ni parlagutan i.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI