Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Suro-suro i Pue Yesus pade topomparasaya ri njumaongu ngata ri Yudea nangepe tau-tau da'a to Yahudi wo'u nomparasaya Tesa nu Alatala.

² Tempo i Petrus nalau mpaka ri ngata Yerusalem, tau-tau to Yahudi to nomparasaya i Pue Yesus nanjalaraka i'a.

³ Ira nanguli, "Nokuya komi nalau ri sapo ntau da'a to Yahudi, ira tau da'a nisuna? Nokuya komi nanggoni mpasanggani-nggani ante ira?"

⁴ Nangepe tesa etu, notesamo i Petrus ka ira pura-pura anu najadi nompamula nggari pamulana. Niulina, Tempo aku nosambaya ri ngata Yope, aku nanggita saongu panggita. Riara panggitaku etu nikitaku sangaya ewa sabala kae tarapaal nabini niulunjaka nggari langi natiloe ri siduna patanjidu nitu'u ri ngayoku.

⁵ (11:4)

⁶ Riara nu kae tarapaal etu nikitaku mpengele binata nokada patanggada, pade binata-binata naila, binata-binata nenjoyo, pade tonji-tonji naila.

⁷ Pade niepeku suara nanguli ka aku, 'Anumo, pekanggoremo, Petrus! Sambalemo binata e'i pade konimo!'

⁸ Tapi nesonomo aku, 'Da'a, Pue! Da'apa sanggani aku nanggoni to nakapali pade natantoru ewa etu!'

⁹ Tapi notesa wo'umo suara nggari langi etu karongganina, 'Nuapa to niuli Alatala namala rakoni, ne'e muuli nakapali!'

¹⁰ Tolunggani etu najadi, pade kae etu neore bali mpaka ri langi.

¹¹ Ewa nisuka tempona etu wo'u, tolumba'a tau nggari ngata Kaisarea to nipakau i Kornelius ri ja'iku narata ri sapo peto'oku etu.

¹² Pade Nosa Nagasa nu Alatala nompakau aku malau mpasanggani-nggani ante ira ante da'a ria kakini-kini raraku. Jadi nalaumo aku, pade onomba'a topomparasaya nggari Yope e'i nantuki aku mpaka ri Kaisarea, pade kami pura-pura nesua ri sapo i Kornelius.

¹³ Naopu etu i Kornelius nantesa ka kami iwenu i'a nanggita samba'a malaeka nekanggore riara njapona pade nanguli, 'Pakaumo tau mpaka ri ngata Yope mompokio samba'a tau nosanga ka i Simon Petrus.

¹⁴ I'a kana manguli ka iko kareba to mompakanoto iwenu komi saongu njapo mamala rapakasalama.'"

¹⁵ Pade i Petrus nompapola tesana, "Tempo aku danotesa ka ira, nana'umo Nosa Nagasa nesua ri ja'i ira nasimbayu ewa najadi ante kita ri pamulana bopia.

¹⁶ Ri setu nitora nu raraku tesa i Pue Yesus to nanguli, 'Yohanes nombadiu tau ante ue, tapi komi kana radiu ante Nosa Nagasa nu Alatala.'

¹⁷ Sampesuwu-sampesuwuku, nanotomo Alatala nombawai Nosa Nagasana ka ira tau da'a to Yahudi nasimbayu ewa niwaina ka kita tempo kita nomparasaya i Pue Yesus Kristus. Sabana etu da'a namala aku mombatondo patuju nu Alatala!"

¹⁸ Tempo ira to nasiromu ri setu nangepe tesa i Petrus, mana ira nebali. Ira aga nosanggani-nggani nantoiya Alatala. Niuli ira, "Ane iwetu, tau-tau da'a to Yahudi wo'u nipaloga Alatala majea nggari silaka-silaka ira pade mantarima katuwua mabelo sampe ri kasae-saena!"

¹⁹ Naopu i Stefanus namate niparunju watu, nadea topomparasaya i Pue Yesus nalai niraga nosimpoga'a-ga'a mpaka ri umba-umba ngata. Naria to nalai sampe ri Bagia Fenisia, pade naria wo'u nalai mpaka ri Lewuto Siprus bo ngata Antiokhia. Ira nompatolele Kareba Belo nggari ja'i Alatala ri ngata-ngata nikalau ira, tapi aga ka tau-tau to Yahudi.

²⁰ Tapi nggari topomparasaya i Pue Yesus etu naria ira nggari Lewuto Siprus pade ngata Kirene to nalau mpaka ri ngata Antiokhia pade nompatolele Kareba Belo i Pue Yesus ka tau-tau da'a to Yahudi wo'u.

²¹ Kuasa i Pue naria nomporoa ira sampe nadea to Antiokhia nomparasaya pade nombajuju katuwu ira ka i Pue Yesus.

²² Kareba ewa nuapa to najadi ri ngata Antiokhia etu natolele wo'u mpaka ri ja'i ntopomparasaya i Pue Yesus ri ngata Yerusalem. Nangepe kareba etu, ira nompakau i Barnabas mpaka ri ngata Antiokhia.

²³ Sangga narata i Barnabas ri setu pade nikitana iwenu Alatala nombawai rasi ka ira etu, nadamba mpu'u rarana. Jadi niulina ka ira, "Komi kana maroo mantuki i Pue Yesus ante mpu'u-mpu'u rara!"

²⁴ Barnabas e'i, i'a samba'a tau to nabelo rarana, pade to naponu ante Nosa Nagasa nu Alatala, pade i'a samba'a tau mpu'u-mpu'u nomparasaya i Pue Yesus. Etu sampe nadea tau ri Antiokhia nomparasaya i Pue Yesus.

²⁵ Naopu etu nalaumo i Barnabas mpaka ri ngata Tarsus nopaelo i Saulus.

²⁶ Sangga nosirata i'a ante i Saulus, nikenina i'a mpaka ri ngata Antiokhia. Pade ri setu sampae kasaena ira nasiromu mpasanggani-nggani ante topomparasaya pade nompatuduki tau dea. Ri ngata Antiokhia etumo tau-tau nomparasaya i Pue Yesus pamula-mulana niuli tau to Karistee.

²⁷ Ri tempo etu wo'u naria bara sakuya mba'a nabi nggari Yerusalem notua mpaka ri ngata Antiokhia.

²⁸ Ri tatongo ira naria samba'a tau nosanga ka Agabus. I'a nekanggore ri tatongo ira pade ante pekeniaka Nosa Nagasa nu Alatala i'a nombaboto kana majadi nggapurina ri ntiku-ntiku dunia oromate to neliu-liuna. (Oromate etu mpu'u-mpu'u najadi tempo Magau Klaudius najadi Magau nto Roma.)

²⁹ Nangepe etu pura-pura topomparasaya i Pue Yesus ri Antiokhia etu nompakatantu mombawai petulungi ira ka sampesuwu-sampesuwu ira riara i Pue to neto'o ri Bagia Yudea. Ira newai nantuki pompakulena samba'a bo samba'a.

³⁰ Sintuwu ira etu nipajalamo, pade i Barnabas bo i Saulus nipakau ira manggeni pewai ira etu ka topanggeniaka topomparasaya i Pue Yesus ri Bagia Yudea etu.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI