Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Rasul-rasul ras kalak si nggo tek i belang-belang Judea megi maka si labo kalak Jahudi pe nggo ngaloken Kata Dibata.
2 Kenca mulih Petrus ku Jerusalem, kalak Jahudi si nggo tek mandang ia nina,
3 "Kam nggo kesilang i rumah kalak si labo kalak Jahudi dingen langa isunatken, janah nggo pe kam man ras ia."
4 Emaka ituriken Petrus kerina si nggo jadi, i bas pemenana nari nina,
5 "Asum ertoto aku i kuta Jope sanga aku lolah rempet kualoken sada pengenehenen. Kuidah lit nusur bagi selambar uis mbelang, irakut i bas empatna sukina, janah ngadi i lebe-lebengku.
6 Kupepayo isina janah kuidah i bas rubia-rubia si empat nahe, rubia-rubia si meliar, si njoler ras perik-perik si meliar.
7 Jenari kubegi sora erkata man bangku nina, 'O Petrus kekeken, geleh jenari pan rubia-rubia enda!'
8 Tapi ningku, 'Lang Tuhan, lang. La pernah kupan pantangen ntah pangan si la bersih rikutken aturen agama.'
9 Ngerana sora e i langit nari nina, 'Kai si nggo ikataken Dibata bersih, ula ikatakenndu meluat!'
10 Si enda jadi seh telu kali, kenca bage mulihken bungkusen ndai irintak ku langit.
11 Paksa e pe telu kalak si isuruh ndahi aku i Kesarea nari nggo seh i rumah inganku kesilang.
12 Jenari nina Kesah Si Badia man bangku, 'Berkatlah ras kalak e. Ula kam sangsi!' Seninanta si enem enda pe ikut ras aku ku Kesarea, janah rada kami ku rumah Kornelius si ndilo aku.
13 Ituriken Kornelius man kami, maka nggo idahna malekat tedis i bas rumahna, janah nina malekat e man bana, 'Suruh kalak ku Jope ngelegi Simon si igelari Petrus.
14 Ia pagi nehken Berita man bandu, gelah arah Berita e terkelin kam ras isi jabundu.'
15 Janah kenca kubenaken ngerana, nusur Kesah Si Badia man kerina kalak si pulung i rumah Kornelius bagi nai tangtangna Kesah Si Badia nusur man banta.
16 Jenari kuinget kai si nggo ikataken Tuhan, 'Johanes mperidiken alu lau, tapi kam pagi iperidiken alu Kesah Si Badia.'
17 Nggo tangkas maka Dibata mereken PemereNa man si labo kalak Jahudi la lit kurangna ras si IberekenNa man banta asum tangtangna nai kita tek man Tuhan Jesus Kristus. Dage, banci kin kuambati Dibata?"
18 Kenca ibegi kalak e siikataken Petrus, sinik ia. Jenari ipujina Dibata nina, "Man si labo kalak Jahudi pe nggo ibereken Dibata dalan jera gelah dat kegeluhen."
19 Kalak si nggo tek man Jesus merap erkiteken peniksan si jadi kenca Istepanus ibunuh. Piga-piga kalak seh ku Penike, Kiperus ras Antiokia. I je iberitakenna Berita kerna Jesus man kalak Jahudi saja.
20 Tapi piga-piga kalak si seh ku Antiokia e, eme kalak Kiperus ras kalak Kireni meritaken Berita Si Mehuli kerna Tuhan Jesus man si labo kalak Jahudi pe.
21 Tuhan nampati kalak e i bas dahinna. Emaka nterem kal kalak tek dingen ngendesken dirina man Tuhan.
22 Perpulungen si i Jerusalem megi berita kerna kai si nggo jadi i Antiokia, emaka isuruhna Barnabas ku jah.
23 Kenca seh Barnabas i Antiokia, meriah kal ukurna ngidah lias ate Dibata si nggo seh man kalak e. Iajukna perpulungen e gelah tetap erkiniteken man Tuhan.
24 Perbahan merandal kal Barnabas bage pe ia dem alu Kesah Si Badia dingen nteguh kinitekenna, emaka nterem kalak tek man Tuhan.
25 Jenari berkat Barnabas ku Tarsus ndarami Saul. Kenca jumpa, rada ia ku Antiokia.
26 Sada tahun dekahna ia ras perpulungen e, janah i bas sada tahun e nterem kalak iajarina. I Antiokia me tangtangna ajar-ajar e igelari Kristen.
27 Paksa si e reh piga-piga kalak nabi i Jerusalem nari ku Antiokia.
28 Sekalak i bas si reh e tedis, gelarna Agabus. Alu kuasa Kesah Si Badia ernubuat ia maka lanai ndekahsa jadi me kelihen si mesangat i belang-belang doni. (Kelihen e jadi asum Klaudius jadi Kaisar Roma.)
29 Emaka ersada arih ajar-ajar guna mpepulung penampat rikut ngasup e sekalak-sekalak guna nampati senina-senina si ringan i Judea.
30 Kenca ipepulungna, ikirimkenna duit e man pertua-pertua arah Barnabas ras Saul.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA