Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Kaisarea ma kotaka wimoi wi ronga 'o Kornelius. 'Una 'o Italia manga solodado 'o bolu moi ma kapita.

² 'Una woloa-loa de ma Jo'oungu ma Dutu wisingou-ngounu, de 'awi woa ma dodaku yoodumu wisuba-suba ma Jo'oungu ma Dutuka. 'Una wakiriwo 'o Yahudioka yosusa-susa manga gudai, de kaitaurika wolahidoa ma Jo'oungu ma Dutuka.

³ Ma moi ge'ena poilia 'o takoro sa'ange 'o wange daingikau de wamake 'iwai-waiti 'o mo-make ma sigoronaka, ge'ena la ma Jo'oungu ma Dutu wi mala'ekati moi 'iboa de wi'asoko, "Ee Kornelius!"

⁴ 'O Kornelius wodi-diriidi 'o mala'ekati ge'ena 'ena kawimodo-modongika de kawongosekau, "'Okia naga 'Aba?" 'O mala'ekati ge'ena 'isango, "'Ani lahidoa ma Jo'oungu ma Dutu wadawongokau, de ma Jo'oungu ma Dutu 'awi singina yadaene 'o nyawa yosusa-susa nakiriwokau. De 'una kawonisi-singina.

⁵ So ne'ena nakisuloko 'o nyawa yotagi dakuie 'o Yope ma kotade la wi'asoko 'o Simon gee wi ronga ma dutu 'o Simon Petrus.

⁶ 'Una womasido-dogumika wimoi 'o haewani ma kai woma-manaramoka wi ronga 'o Simon, gee womanoa 'o ngooto ma batingoka."

⁷ Gedagee 'o mala'ekati 'ibi-bicara 'o Korneliusika 'itagioka de 'o Kornelius waki'asoko 'awi ro-riwo wi woaka yamididi de 'awi solodado wimoi woloa-loa.

⁸ 'O Kornelius wosijarita 'onaka 'okia naga gee wamakekau, ge'enaka de wakisuloko yotagi dakuie 'o Yope ma kotade.

⁹ Ma wangede yaruange go'ona manga do-dagi ma sigoronaka rekeni ya'adonoka 'o Yope ma kotaka, de 'o wange 'ikorona 'o Petrus wodoa 'o woa ma dekude ma ngale womalahidoa.

¹⁰ Ge'enaka de wisawini 'imeki, so womau wo'odomo. 'O 'inomo yodiai ma gu-gudaioka, de wamake 'o mo-make moi.

¹¹ 'Una wamake 'o diwanga 'ipelenga, de 'okia naga moi 'isoka 'o mosa 'ingoa-ngoata 'isidelika ma libuku soatoka de 'iwora 'o duniaku.

¹² Ma dodaka doka 'o sagala haewani ma dou ngai soatoka de 'o sagala haewani 'imatoba-tobaka de 'o namoro kopapi-piarawa gee.

¹³ Ge'enaka de naga 'o 'ilingi 'ingose 'unaka, "Ee Petrus! Tagi natoaka de na'odomo!"

¹⁴ 'O Petrus wongose, "Ko'uwa Jou! Koma'iwasi ta'odomo 'okia naga gee mia bo-bosono, de mia ge-gemono moteke 'o Yahudioka mia 'adati."

¹⁵ Ma 'o 'ilingi ge'ena 'ingoseli 'unaka, "'Okia naga gee ma Jo'oungu ma Dutu wongose 'ato kaidadi nia'odomo, ge'ena 'uwa niamaoku nia bo-bosono."

¹⁶ 'O mo-make ge'ena 'isigali sigado ma sa'ange, ge'enaka de 'o mosa ge'ena 'isidoa 'o sorogaade.

¹⁷ 'O Petrus kowosido-dogumuwa watibangi 'okia ma dumutu 'o mo-make ge'ena. 'Una womatiba-tibangi de 'o nyawa gee 'o Kornelius wakisulo-suloko yamake 'o Simon gee 'o haewani ma kai woma-manarama wi woa, de 'ona ge'ena 'o ngorana ma bionokau.

¹⁸ Ge'enaka de 'o nyawa yaki'asokino de yosano, "Naga? 'o woa ma gikiri wimoi womasidodo-dogumika wi ronga 'o Simon Petrus?"

¹⁹ 'O Petrus kawomatibangiosi womau wanako 'o mo-make ge'ena ma ngale, de 'o Ngomasa 'Itebi-tebini 'ingose 'unaka, "Ee Petrus, 'o nyawa yaruange naga ninonu.

²⁰ Tagi no'uti nomatai-taiti, de 'uwa ni singina 'ikapula nakimoteke 'ona, sababu 'ona ge'ena ngoi takisuloko."

²¹ So 'o Petrus wo'utiku de wongose 'onaka, "Ngoiou ninonu 'Esa moi. 'Okiau niadumutu niaino?"

²² 'Ona yosango yongose 'ato, "Ma kapita 'o Kornelius wosuloko miaino. 'Una ge'ena 'o nyawa ma owa de wosingou-ngounu ma Jo'oungu ma Dutuka, de 'o Yahudioka yoodumu posironga wihoromatioka. Ma Jo'oungu ma Dutu wi mala'ekati moi wisuloko 'una woga'asoko, 'Aba, noboa 'awi woaka, sababu wolahidoa de ma Jo'oungu ma Dutu wopalusokau, ma ngale wisuloko wosigisene 'okia naga gee dua, 'Aba, nosidemo 'unaka."

²³ Ge'enaka de 'o Petrus wongose 'ato, "Nou niowosamino, la nimatoobiri ne'enaka." De 'ona yomatoobiri ge'enaka. Ma bibinie 'o Petrus womomikie de wotagi de de 'ona yomatuono. Yamuruo naga yongaku-ngaku 'o Yope ma kotaku daku mita yomoteke.

²⁴ 'Ona yotagi 'o wange moi de 'o obiri moi de yototara 'o Kaisareaku. Kadau yota-tamaau 'o Kornelius de wi riaka dodoto de wi giamanai waki'aso-'asokino.

²⁵ Gee 'o Petrus wototarou 'o Kornelius wi woaka de 'o Kornelius wisoboika de wisuba.

²⁶ Ma 'o Petrus wiriwo wi'oko de wongose, "Noma'okode! Ngoi ma sirete mita ka 'o nyawa."

²⁷ Kayomakaka'ilingosi de 'o Kornelius, de 'o Petrus wowosama 'o woa ma dodaka. Ge'enaka dau 'una wakimake manga gudaioka yomalomunou.

²⁸ Ge'enaka de kawongosekau 'onaka, "'Esa moi riaka dodoto, ngini ma sirete nianako 'o Yahudioka mia 'agama ma 'adati koisidabiwa ngomi 'o Yahudi ma nyawa mimakalilara bolo mimagiamanai de 'o nyawa ma somoa. Duga ma Jo'oungu ma Dutu wosidumutokau ngoino 'ato nago'onaka bato ngoi koidadiwa tamaoku yomediri bolo 'ai bo-bosono.

²⁹ Ge'enau so gee 'Aba noga'asoko la toboa, ngoi 'ai singina koitubusowa taino. So ne'ena ngoi tomau tanako, 'ido'oa so noi'asoko toboa?"

³⁰ 'O Kornelius wosango, "'O wange sa'ange 'ipasa-pasa poilia done ma 'orasi kone'enau naga, ngoi tolahidoa ma gu-gudaioka 'o woaka 'o takoro sa'ange 'o wange 'alo, de tomanako 'ena 'o mala'ekati 'isoka 'o nyawa wimoi woma'okodeu 'ai bionoka. 'O nyawa gu'una 'awi pakeangi 'ileto-letongo.

³¹ 'Una kawongosekau ngoino, 'Ee Kornelius! Ma Jo'oungu ma Dutu wadawongokau 'ani lahidoa de kawongano-nganono 'ani singina ma 'ofi ma ngale notabariwo 'o nyawaka.'

³² De 'ingoseli ngoino, 'So, nakisuloko 'o nyawa yotagi 'o Yope ma kotade wi'asoko 'o nyawa wimoi wi ronga 'o Simon Petrus, 'una womasido-dogumika wimoi 'o haewani ma kai woma-manarama wi woaka wi ronga 'o Simon. 'O woa ge'ena 'o ngooto ma batingoka.'

³³ Ge'enau so ngoi tosijai-jai takisuloko ni'asoko 'Aba. De ngona noboa ne'enano de 'ani singina 'isa-sanangi. So ne'ena ngomi mioodumu mimalomunou ne'enaka ma Jo'oungu ma Dutu wi bionoka, ma ngale miosigisene 'iodumu gee ma Jo'oungu ma Dutu wosuloko nosidemo ngomino."

³⁴ Ge'enaka de 'o Petrus wongose, "Ne'ena ngoi tanako 'itiaiokau ma Jo'oungu ma Dutu kowoiri-irikuwa 'o nyawa.

³⁵ 'O nyawa gee yodiai yadae-daene de ma Jo'oungu ma Dutu wisitede-tedene de wisingou-ngounu, 'ona ge'ena ma Jo'oungu ma Dutu wakidawongo. 'Una kowoiri-irikuwa 'o nyawa kiano naga bato.

³⁶ 'Esa moi ngini nianakokau 'o Habari ma Owa gee ma Jo'oungu ma Dutu wositota-totara 'o Israel ma nyawaka. Ma Habari ma Owaka ge'ena 'ingose 'ato 'o nyawa yomakatiai de ma Jo'oungu ma Dutu, ma ngekomo ma Yesus Kristus. 'Unau ge'ena 'o nyawa poodumu nanga Jou.

³⁷ Ngini nianako 'okia naga gee 'idadi-dadiokau 'o Yudeaka yakilolituku 'ikurue 'o Galileaka, gee 'ipasano 'o Yohanes wositotara 'o go-gosiki.

³⁸ Ngini nianako ma Jo'oungu ma Dutu wiirikokau 'o Yesus 'o Nazaretino, de wisikuata de 'o Ngomasa 'Itebi-tebini ma kuasa. Nianako mita 'o Yesus wokadagi woki-kiloliti ma ngale wodiai yaowa-owa. 'Una wakisi'aiki 'o nyawa 'iodumu gee 'o Tokata ma Koana yakiparetano, sababu ma Jo'oungu ma Dutu naga de de 'una.

³⁹ Ma nyawa ngomiou ma sirete miamake-make 'okia sonaa moi-moi wodiai 'o Yahudioka de 'o Yerusalem ma daeraaka. Ngaro koge'ena ma 'ona wisidele 'o salipoka de wito'oma.

⁴⁰ Duga 'o wange sa'angeka de ma Jo'oungu ma Dutu wisimomikoli ngaro wosongenukou ma, de wisidumutu 'o nyawaka,

⁴¹ ma ko 'o nyawa 'iodumikawa, duga ka ngomino gee ma Jo'oungu ma Dutu miirikokau ma sirasi ma ngale miodadi sakisii. Ngomi mimasido'odomo de mimasido'okere de de 'una gee womomikieli de.

⁴² De 'una wosuloko ngomi miosihabari 'o Habari ma Owa ge'ena 'o nyawa-nyawaka, de miosisakisii 'ato 'unau ge'ena ma Jo'oungu ma Dutu wigoraka wodadi Hakimi 'o nyawa kayo'ahu-'ahuosi de gee yosonge-songenokau.

⁴³ 'Unau ge'ena gee 'o nabii yoodumu yositota-totara yongose 'ato, nago'ona yongaku 'unaka 'asa manga sowonoka yakisipidili de to 'una 'awi kuasa."

⁴⁴ 'O Petrus kawobi-bicarasi de 'o Ngomasa 'Itebi-tebini 'i'uti de yakiparetano 'o nyawa yoodumu gee yosigise-gisene ma habari ge'ena.

⁴⁵ 'O Yahudioka yongaku-ngaku 'o Yesusika gee 'o Petrus wimote-moteuku 'o Yopeku daku, kayoki-kiliri yamake ma Jo'oungu ma Dutu wokula 'o Ngomasa 'Itebi-tebini 'o nyawa ma somoaka ko 'o Yahudiokawa.

⁴⁶ Sababu yo'isene ko 'o Yahudiokawa yobicara de 'o demo 'irupa-rupaka de yosiare-arene ma Jo'oungu ma Dutu sababu yamake 'awi kuasa, ge'enaka de 'o Petrus wongose,

⁴⁷ "Bika niakilega! 'O nyawa-nyawa no'ona yamakekau 'o Ngomasa 'Itebi-tebini 'isoka ngoneli. So dua 'o nyawa kayosingelokasi? yaki'osiki de 'o 'akere?"

⁴⁸ So 'o Petrus wosuloko 'ona yaki'osiki ma ngale yakisikatoomu de ma Yesus Kristus. Ge'ena 'ipasa de 'ona yoga'asoko la 'o Petrus womanoa de de 'ona ma do'ingo 'o wange muruosi naga.

Kisah Para Rasul

Video Kisah Para Rasul 10

Ikuti Kami:

KONTAK | PARTISIPASI | DONASI