Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq Kaisarea araq sopoq dengan mame aranne Kornelius. Ie jari prewire "Tentere Italia."

² Ie dengan saq takut lẽq Allah dait selapuq kadang jarine beribadah tipaq Allah. Ie luwẽq nulung dengan-dengan Yahudi saq miskin, dait ie rajin bedo'e tipaq Allah.

³ Lẽq sopoq jelo kire-kire jam telu kebian, pedas gati ie serioq lẽq dalem sopoq penyerioqan, sopoq malaẽkat Allah rauh dait ngemanikang ie, "Kornelius!"

⁴ Siq rase takut Kornelius perhatiang malaẽkat nike terus bebase, "Araq napi Bapaq?" Jawab malaẽkat nike, "Selapuq do'e dait kemurahan atẽnde nike sampun teterimaq siq Allah dait Allah iling lẽq side.

⁵ Mangkin suruq dengan lumbar ojok Yope ngempoh Simon saq aran lengkapne Simon Petrus.

⁶ Ie kenyeke nyodoq lẽq balẽ sopoq tukang kulit aranne Simon, saq ndot lẽq sedin pesisi."

⁷ Sesampun malaẽkat saq bemanik lẽq Kornelius nike lumbar, Kornelius ngempoh due pelayanne dait sopoq pengawal saq solẽh.

⁸ Kornelius nyeriteang tipaq ie pade napi saq sampun telaksane, terus suruq ie pade lumbar ojok Yope.

⁹ Jemaqne, sewaktu ie pade masih lẽq tengaq langan, dait gen dateng lẽq Yope, Petrus taẽk ojok atas balẽ jari bedo'e.

¹⁰ Beterus ie lapah gati dait melẽt bekelor. Sewaktu keloran kenyeke tesedieang, ie mauq sopoq penyerioqan.

¹¹ Ie serioq langit kebukaq, dait selembar lakar saq gamber teulurang ojok gumi, begantung lẽq empat bucune.

¹² Lẽq dalemne araq segale macem binatang benaẽ empat, selapuq binatang saq ngumang dait kedit-kedit saq liah.

¹³ Terus araq suare bemanik lẽq ie, "Petrus, ures! Silaq sembelẽh dait kelorang!"

¹⁴ Petrus bejawab, "Nẽnten, Tuhan! Nẽnten uwah tiang ngelorang napi-napi saq haram atao najis."

¹⁵ Laguq suare nike bemanik malik lẽq ie, "Napi saq sampun tenyatayang halal siq Allah, ndaq side anggep haram!"

¹⁶ Hal nike telaksane terus jangke telu kali, beterus lakar nike kerangkatan ojok sorge.

¹⁷ Petrus bingung mikirang napi arti penyerioqanne nike, sewaktu Petrus mikir-mikir, dengan-dengan saq tesuruq siq Kornelius boyaq balẽ Simon sampun araq lẽq julu lawang.

¹⁸ Terus ie pade ngempoh dengan dait beketuan, "Napi lẽq deriki araq temuẽ saq madẽq, aranne Simon Petrus?"

¹⁹ Dait sewaktu Petrus masih doang berusahe nenaoq arti penyerioqanne nike, Roh Allah bemanik lẽq ie, "Hai Petrus, araq telu dengan kenyeke boyaq side.

²⁰ Silaq aruan turun ojok bawaq, dait ndaq ragu-ragu milu bareng ie pade, sẽngaq Tiang saq ngutus ie pade."

²¹ Beterus Petrus turun ojok bawaq, dait bebase lẽq dengan-dengan nike, "Tiang niki saq side pade pẽte, araq keperluan napi side pade dateng?"

²² Jawab ie pade, "Prewire Kornelius ngutus tiang pade ojok deriki. Ie dengan saq solẽh dait takut lẽq Allah, dait tehormatin siq selapuq dengan Yahudi. Langan sopoq malaẽkat, Allah manikang ie pesilaq pelungguh rauh ojok gedẽngne, adẽq ie dengahang napi saq gen pelungguh sampẽang lẽq ie."

²³ Make Petrus suruq ie pade tame adẽqne madẽq lẽq derike. Jemaqne Petrus ures, dait lumbar bareng kance ie pade. Pire dengan semeton seiman lẽman Yope ẽndah milu.

²⁴ Sejelo sesampun nike ie pade dateng lẽq Kaisarea. Lẽq derike ie pade sampun teantih siq Kornelius kance kadang jarine dait selapuq sahabat-sahabat karibne saq sampun tepesilaq.

²⁵ Waktu Petrus dateng, Kornelius lumbar nyambut ie dait sujut lẽq julu Petrus.

²⁶ Laguq Petrus penganjeng ie, beterus bebase, "Silaq side ures, tiang ẽndah manusie biase."

²⁷ Sambil ie bebaos kance Kornelius, Petrus tame ojok dalem balẽ. Lẽq derike ie serioq luwẽq dengan sampun bekumpul.

²⁸ Terus ie bebase lẽq ie pade, "Side pade nenaoq bahwe dengan Yahudi tebalaq siq Hukum Taurat dateng bejangoq atao berubungan kance dengan bangse-bangse lain. Laguq Allah sampun nyatayang lẽq tiang bahwe tiang ndẽq kanggo nganggep sai juaq najis atao haram.

²⁹ Keranaq nike waktu pelungguh pesilaq tiang dateng, tiang ndẽq keberatan dateng. Jari, mangkin niki tiang melẽt nenaoq, kembẽq pelungguh pesilaq tiang dateng."

³⁰ Jawab Kornelius, "Empat jelo saq liwat, kire-kire lẽq waktu maraq niki, tiang kenyeke bedo'e lẽq balẽ jam telu kebian. Selung-selung sopoq dengan mame nganjeng lẽq julun tiang. Kelambi dengan nike putẽq ngempor.

³¹ Ie bemanik, 'Kornelius, Allah sampun nerimaq do'ende dait iling lẽq kemurahan atẽnde.

³² Jari mangkin utus dengan lumbar ojok Yope ngempoh dengan aranne Simon Petrus, ie kenyeke madẽq lẽq balẽ sopoq tukang kulit aranne Simon; balẽne lẽq sedin pesisi.'

³³ Keranaq nike tiang aruan ngutus dengan lumbar pesilaq pelungguh. Dait pelungguh ihlas rauh ojok deriki. Mangkin tiang pade selapuq bekumpul lẽq deriki lẽq arepan Allah jari dengahang selapuq saq Allah manikang lẽq pelungguh umaq tiang pade."

³⁴ Terus Petrus bebase, "Mangkin tiang tetu-tetu sadar bahwe Allah nẽnten bẽde-bẽdeang dengan.

³⁵ Dengan saq takut lẽq Allah dait ngelaksaneang saq kenaq, dengan nike teterimaq siq Allah, ndẽq peduli ie lẽman bangse napi.

³⁶ Side pade sampun nenaoq isi berite saq Allah sampẽang tipaq bangse Israel. Nike Kabar Solah dait damẽ sejahtere langan Deside Isa Almasih, Junjungan Saq Mulie tipaq selapuq dengan.

³⁷ Side pade nenaoq napi saq sampun telaksane lẽq selapuq wilayah Yudea, mulai lẽman Galilea, sesampun baptisan saq teanjurang siq Yahya.

³⁸ Side pade nenaoq bahwe Allah sampun nyuciang dait ngesahang Deside Isa dengan Nazaret nike siq Roh Suci dait kuase. Side pade nenaoq ẽndah bahwe Deside Isa nike lumbar ojok mbẽ-mbẽ jari ngelaksaneang saq solah; Ie nyelahang selapuq dengan saq tekuasein siq Belis, sẽngaq Allah araq bareng Ie.

³⁹ Tiang pade niki saksi-saksi saq sampun serioq mẽsaq selapuq hal saq Ie laksaneang lẽq wilayah Yudea dait lẽq Yerusalem. Timaq maraq nike ie pade pakuq lẽq kayuq salib dait nyematẽq Ie.

⁴⁰ Laguq lẽq jelo saq ketelu Allah ngidupang Ie malik lẽman ninggal dait nyatayang Ie tipaq manusie;

⁴¹ ndẽqne tipaq selapuq dengan, laguq cume tipaq tiang pade saq sampun juluan tepilẽq siq Allah jari saksi-saksi-Ne: Tiang pade bekelor dait nginem kance Ie sesampun Ie idup malik lẽman ninggal.

⁴² Dait Ie ngutus tiang pade beriteang Kabar Solah tipaq dengan-dengan dait ngebẽng kesaksian bahwe Ie saq teangkat siq Allah jari Hakim dengan-dengan saq masih idup dait dengan-dengan saq sampun ninggal.

⁴³ Mengenai Ie selapuq nabi ngebẽng kesaksian, bahwe sai-sai percaye lẽq Ie, ie gen teampunin dosene langan pesẽngan-Ne."

⁴⁴ Sewaktu Petrus masih bebaos, Roh Suci turun nguasein selapuq dengan saq dengah berite nike.

⁴⁵ Dengan-dengan Yahudi saq percaye lẽq Deside Isa dait turut Petrus lẽman Yope, selapuqne bengaq serioq Allah ngicanin ẽndah Roh Suci tipaq dengan bangse-bangse lain.

⁴⁶ Sẽngaq ie pade dengah dengan-dengan nike ngeraos kadu macem-macem base dait mulieang Allah. Terus Petrus bebase,

⁴⁷ "Silaq serioq, dengan-dengan niki sampun nerimaq Roh Suci pade maraq ite. Napi bau dengan halang-halangin ie pade tebaptis siq aiq?"

⁴⁸ Make Petrus suruq ie pade tebaptis siq pesẽngan Deside Isa Almasih. Sesampun nike ie pade tunas adẽq Petrus ndot kance ie pade pire jelo ngonẽqne.

Kisah Para Rasul

Video Kisah Para Rasul 10

Ikuti Kami:

KONTAK | PARTISIPASI | DONASI