Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teopilus saq budiman, lẽq dalem kitab tiang saq penembẽq sampun tiang jelasang selapuqne saq telaksaneang dait teajahang siq Deside Isa lẽman Ie mulai karye-Ne,

² jangke dateng jelone Ie teangkat ojok sorge. Sendẽqman Ie taẽk ojok sorge, langan Roh Suci Ie ngicanin petunjuk-petunjuk tipaq rasul-rasul-Ne saq Ie pilẽq.

³ Sesampun Ie ninggal, sengonẽq petang dase jelo Ie rimpes nyatayang siq care saq nyate gati tipaq rasul-rasul nike bahwe Ie tetu-tetu idup. Ie pade serioq Deside Isa, dait Deside Isa bebaos kance ie pade mengenai Kerajaan Allah.

⁴ Lẽq sopoq jelo sewaktu Deside Isa medaran bareng ie pade, Ie ngicanin prẽntah niki lẽq ie pade, "Ndaq lumbar lẽman Yerusalem. Antih lẽq derike jangke Bapa ngicanin napi saq sampun Ie janjiqang, saq laẽq sampun Tiang badaq side.

⁵ Sẽngaq Yahya baptis kadu aiq, laguq karing pire jelo malik side pade gen tebaptis kadu Roh Suci."

⁶ Sewaktu ie pade bekumpul bareng-bareng kance Deside Isa, ie pade metakẽn lẽq Deside Isa, "Junjungan Saq Mulie, napi mangkin Pelungguh gen piaq malik kerajaan umaq Israel?"

⁷ Jawab Deside Isa, "Bapa Tiang mẽsaq saq nentuang jelo dait waktune. Hal nike ndẽq perlu side pade taoq, sẽngaq nike kuase Bapa.

⁸ Laguq side pade gen nerimaq kuase, sewaktu Roh Suci sampun rauh tipaq side. Dait side pade gen jari saksi-saksi Tiang lẽq Yerusalem, lẽq selapuq wilayah Yudea, lẽq Samaria, dait jangke dateng poton gumi."

⁹ Sesampun Deside Isa bemanik maraq nike, Ie kerangkatan ojok sorge lẽq julu ie pade, dait awan ilipang Ie lẽman penyerioqan ie pade.

¹⁰ Waktu ie pade masih merhatiang andang langit, sewaktu Deside Isa kerangkatan, selung-selung due dengan bekelambi putẽq nganjeng lẽq dẽkẽt ie pade,

¹¹ dait bebase tipaq ie pade, "Hai, dengan-dengan Galilea, kembẽq side pade nganjeng doang lẽq derike serioq andang langit? Deside Isa, saq side pade serioq kerangkatan ojok sorge lẽq julu side pade, gen tulak malik siq care maraq nike ẽndah pade maraq saq side pade serioq."

¹² Beterus rasul-rasul nike tulak ojok Yerusalem lẽman Bukit Zaitun. Bukit nike taoqne kire-kire sopoq kilomẽter jaoqne lẽman Yerusalem.

¹³ Lẽq Yerusalem ie pade lumbar ojok balẽ taoq ie pade mererepan, beterus taẽk ojok kamar saq lẽq atas. Rasul-rasul nike, Petrus dait Yahya, Yakub dait Andreas, Pilipus dait Tomas, Bartolomeus dait Matius, Yakub bije Alpeus, Simon dengan Zelot dait Yudas bije Yakub;

¹⁴ selapuqne tetep sopoq angen bekumpul jari bedo'e. Ie pade bedo'e bareng kance dengan-dengan nine lantong Mariam mamiq bini Deside Isa, dait bareng kance sanak-sanak Deside Isa.

¹⁵ Lẽq sopoq jelo, sewaktu ie pade kenyeke bekumpul -- araq kire-kire satus due pulu dengan luwẽqne -- Petrus nganjeng dait ngeraos. Ie bebase,

¹⁶ "Semeton-semeton! Napi saq tetulis lẽq dalem Kitab Suci, nike harus telaksane. Laẽq langan Daud, Roh Suci sampun benubuat mengenai Yudas, pemimpin dengan-dengan saq bau Deside Isa nike.

¹⁷ Yudas nike salaq sopoq dengan lẽman ite, dait ie ẽndah sampun tepilẽq jari milu begawẽan bareng-bareng kance ite."

¹⁸ (Yudas niki sampun mauq tanaq kuburanne lẽman upaq penghianatanne saq jahat. Ie geriq dait ninggal tianne bedah jangke sugul selapuq isin tianne.

¹⁹ Selapuq dengan saq ndot lẽq Yerusalem nenaoq hal nike. Keranaq nike dalem base ie pade, tanaq nike ie pade aranin Akeldama, saq artine 'Tanaq Daraq'.)

²⁰ "Sẽngaq lẽq dalem Kitab Suci Zabur araq tetulis maraq niki, 'Alurang taoqne ndot jari sepi; ndaq sopoq dengan juaq saq ndot lẽq dalemne.' Araq ẽndah tetulis maraq niki, 'Alurang jabatanne tebait siq dengan lain.'

²¹ Keranaq nike, harus araq sopoq dengan saq milu kance ite jari saksi bahwe Junjungan Saq Mulie Deside Isa sampun idup malik lẽman ninggal. Dengan nike harus salaq sopoq lẽman dengan-dengan saq tetep bareng-bareng kance ite sewaktu ite ngiring Deside Isa ojok embẽ-embẽ, lẽman Yahya mulai baptis dengan jangke waktune Deside Isa teangkat ojok sorge lẽman tengaq-tengaq ite."

²² (1:21)

²³ Beterus dengan-dengan saq araq lẽq derike ngusulang due dengan, Yusup saq tesebut ẽndah Barsabas (ie tesebut ẽndah Yustus), dait Matias.

²⁴ Terus ie pade bedo'e, ie pade matur, "Tuhan, Deside wikan angen selapuq dengan. Yudas sampun lumbar ojok taoq saq sampun tetentuang umaq ie. Jari, mangkin niki tunasang sai lẽq antare due dengan niki saq Deside pilẽq jari teicanin tugas nike gentiq Yudas."

²⁵ (1:24)

²⁶ Sesampun nike kedue aran nike teundi, beterus lẽman undian nike sugul aran Matias. Make ie teangkat jari rasul adẽqne turut bareng-bareng kance solas rasul saq lainne.

Kisah Para Rasul

Video Kisah Para Rasul 1

Ikuti Kami:

KONTAK | PARTISIPASI | DONASI