Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teofilus to nibila, riara bukuku pamulana nitulisiku ka komi ewa pura-pura nuapa to nikawia pade to nipatuduki Yesus nggari pamulana

² sampe I'a neore mpaka ri suruga. Nitulisiku wo'u iwenu I'a nipandasa sampe namate pade iwenu I'a natuwu bali nggari kamatena. Naopu I'a natuwu bali, nadea ngganimo nipopokitana korona ka anaguru-anaguruna to nipelisina bopia, ala ranjani ira mpu'u-mpu'u I'a natuwu bali. Riara tempo patampulu mbengina ira nanggita I'a, pade I'a nompatuduki ka ira ewa Poparenta nu Alatala. Pade ante kuasa Nosa Nagasa I'a nombawai parenta ka anaguru-anaguruna.

³ (1:2)

⁴ Tempo I'a nasiromu ante ira, nitewaina ka ira, "Ne'e komi mompalasi ngata Yerusalem. Popea ntani ruru ri setu sampe Umaku Pue Alatala mompopana'u ka komi Nosa Nagasana to nijanjina, ewa to niuliku ka komi bopia.

⁵ Toramo! Yohanes nombadiu tau ante ue ewa tandaina najeamo ira nggari silaka. Tapi riara bara sakuya mbengipa komi kana radiu ante Nosa Nagasa nu Alatala."

⁶ Tempo anaguru-anaguruna etu nasiromu nosanggani ante Yesus, ira nekutana ri ja'ina, "Pue, iwe'i-we'i Pue mombakabasaka kita, to Israel nggari balita, ala mamala kita momparenta ngatata mboto?"

⁷ Nesonomo Yesus, "Umaku mboto to nakuasa mompakatantu nepia etu majadi. Etu da'a miki ranjani komi.

⁸ Tapi komi kana mantarima kuasa ane Nosa Nagasa nu Alatala mana'u ri ja'i komi. Pade komi kana mompatolele karebaku ka tau-tau ri ngata Yerusalem, pade ri pura-pura Bagia Yudea ante Bagia Samaria, sampe ri umba-umba ri dunia."

⁹ Naopu Yesus notesa iwetu, nateonggotakamo I'a nggari ngayo ira mpaka ri suruga nikita nu mata ira mboto, sampe kulimu nombabungu I'a nggari panggita ira.

¹⁰ Tempo ira danantingoa langi nanggita Yesus neore etu, sampegoli naria romba'a malaeka to nopakea naputi nenggore ri sinjori ira.

¹¹ Nangulimo malaeka etu, "Umba komi, to Galilea! Nokuya komi aga mpanggoremo ri setu nantingoa langi? Yesus to nikita komi neore nggari ngayo komi mpaka ri suruga pani'a kana marata bali ri dunia e'i nasimbayu ewa nikita komi pane'a."

¹² Naopu etu natinggulimo anaguru-anaguru Yesus nggari Bulu Zaitun mpaka ri ngata Yerusalem. Bulu etu kakawaona kira-kira saongu kilo nggari Yerusalem. sampesuwu Yesus.

¹³ Narata ri Yerusalem nalaumo ira ri sapo nipeto'o ira nepone ri tombi kalangana. Sanga nu anaguru-anaguruna etumo: i Petrus, Yohanes, Yakobus, Andreas, i Filipus, i Tomas, i Bartolomeus, i Matius, Yakobus ana Alfeus, i Simon tau to Zelote, pade Yudas ana Yakobus.

¹⁴ Da'a nenonto ira pura-pura nasiromu nosaongu rara nosambaya. Nosanggani-nggani ante ira naria wo'u bara sakuya mba'a besi pade i Maria indo Yesus, ante sampesuwu-sampesuwu Yesus.

¹⁵ Naria saeo ira pura-pura nasiromu kira-kira satu rompulu mba'a kadeana. Ri setu nekanggoremo i Petrus ri tatongo ira topomparasaya i Pue Yesus pade nanguli,

¹⁶ "Sampesuwu-sampesuwu pura-pura, kana nadupamo nuapa to nitulisi riara Buku Nagasa ewa Yudas. Tempo nggaolu Magau Daud nombaboto tesa nggari ja'i Nosa Nagasa ewa Yudas, roata to nanggeni tau nanjoko i Pue Yesus.

¹⁷ Yudas etu samba'a roata, sabana i'a nipelisi i Pue Yesus mboto mokarajaa mpasanggani-nggani ante kita."

¹⁸ (Yudas etu nangoli salimpu tana ante doi to niratana nggari powiana to naja'ana. Ri tana etu i'a namate nanawu. Ta'ina nasemparaka sampe isi rarana nakamburaka nesuwu ri sawalikuna.

¹⁹ Pura-pura tau neto'o ri ngata Yerusalem nangginjani nuapa to najadi etu. Etumo sabana tana etu nipoposanga ira Akeldama, to naria batuana riara basa ira mboto "Tana Nikabubu nu Lei".)

²⁰ Nanguli wo'umo i Petrus, "Riara Buku Mazmur naria tesa nosinggawela ante Yudas iwe'i: 'Palambamo sapo peto'ona majadi maboa. Ne'e rawai tau meto'o riarana.' Pade naria wo'u to nitulisi iwe'i: 'Agina pekatokona raala tau ntanina.'"

²¹ Pade i Petrus nompapola tesana iwe'i: "Sampesuwu-sampesuwu, etumo sabana kita kana mompelisi samba'a tau nggari tatongota mantuki kita mompatolele ka tau i Pue Yesus natuwu bali nggari kamatena. Tau rapelisita etu kana samba'a tau bate-batena nosanggani-nggani ante kami nantuki i Pue Yesus nompamula nggari tempo Yohanes nombadiu tau sampe ri tempo i Pue Yesus neore mpaka ri suruga."

²² (1:21)

²³ Jadi nggari tatongo ira topomparasaya i Pue Yesus etu romba'a tau nipakatantu ira rapelisi manjambei i Yudas, etumo Yusuf Barsabas (i'a wo'u nidae Yustus) ante i Matias.

²⁴ Naopu etu ira nosambaya, "Pue, ninjanimu isi rara nta'i pura-pura manusia. Yudas nalau nompalasi pobagona ewa anagurumu pade namate nalau mpaka ri peto'o to masipato ante powiana. Jadi popokita ka kami isema nggari romba'a tau e'i to nipelisimu manjambei Yudas mokarajaa mosanggani ante kami mompatolele tesamu."

²⁵ (1:24)

²⁶ Naopu ira nosambaya ira nantendeaka nomoro. Sanga i Matias to nawelana. Jadi nompamula nggari eo etu i Matias nireke samba'a nggari sampulu romba'a anaguru i Pue Yesus.

Kisah Para Rasul

Video Kisah Para Rasul 1

Ikuti Kami:

KONTAK | PARTISIPASI | DONASI