Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Angku Teofilus nan baiak budi, Di dalam kitab ambo nan partamu lah ambo tarangkan kasadonyo, apo nan lah dipabuwek, sarato jo apo nan lah di ajakan dek Isa Almasih, sajak Baliau mamuloi karajo Baliau,

² sampai ka ari Baliau di angkek ka sarugo. Sabalun Baliau nayiak ka sarugo, jo kuwaso Roh Allah Baliau lah mambarikan pitunjuak-pitunjuak, kabake rasul-rasul nan Baliau piliah.

³ Sasudah Baliau mati, salamo ampek puluah ari Baliau acok mampanampakkan diri, jo caro nan sangaik jaleh kabake rasul-rasul tu, baraso Baliau, iyo sabana-bana lah iduik baliak. Urang-urang tu lah basuwo bana jo Baliau, Baliau lah ma agiah tawu kabake urang-urang tu, tantang baa caronyo Allah mamarentah sabagai Rajo.

⁴ Dikutiko Baliau bakumpua samo-samo jo urang-urang tu, Baliau lah mambarikan parentah nan bakcando iko, "Jan payi dari Yerusalem. Nantikanlah disinan, sampai tibo wakatunyo Bapak mangirin apo nan lah Baliau janjikan, iyolah, apo nan lah Ambo baritawukan kabake angku-angku dek sari.

⁵ Dek karano, Nabi Yahya mampamandikan urang jo ayie, tapi, indak ka lamo lai angku-angku ka dipamandikan jo Roh Allah."

⁶ Kutiko rasul-rasul tu bakumpua samo-samo jo Isa Almasih, inyo bi batanyo kabake Baliau, "Tuhan, apokoh kiniko masonyo Tuhan ka managakkan baliak karajaan banso Israel?"

⁷ Baliau manjawab, "Bapak Ambo sandirilah nan ka manantukan masonyo. Itu indak paralu doh angku-angku katawui, dek karano itu adolah dalam kuwaso Bapak.

⁸ Tapi, angku-angku ka manarimo kuwaso, jikok Roh Allah lah turun ka diri angku-angku. Mako angku-angku ka manjadi utusan-utusan Ambo di Yerusalem, di wilayah Yudea, di Samaria, sampai ka ujuang bumi."

⁹ Sasudah Baliau bakato bakcando itu, mako Baliau di angkek ka sarugo di adok-an urang-urang tu, mako awan manyawok-i Baliau, sainggo urang-urang tu indak dapek lai maliyek Baliau.

¹⁰ Samantaro urang-urang tu sadang bi mancaliak juwo lai ka langik, kutiko Isa Almasih ta angkek, indak disangko-sangko, ado urang duwo urang nan bapakaian putiah tagak di sabalah urang nan banyak tu.

¹¹ "Oih urang-urang Galilea," kecek urang nan baduwo tu, "baa mangko angku-angku tagak disinan mancaliak ka langik? Isa Almasih nan angku-angku liyek ta angkek ka sarugo tu, Baliau ka babaliak isuak, jo caro nan bakcando angku-angku liyek cako."

¹² Kamudian rasul-rasul tu babaliak ka Yerusalem dari Bukik Zaitun. Bukik tu talatak kiro-kiro sakilo jauahnyo dari Yerusalem.

¹³ Tibo di Yerusalem inyo bi taruih ka rumah tampaik inyo bi manompang, inyo bi nayiak ka biliak nan di ateh. Rasul-rasul tu, iyolah si Petrus, si Yahya, si Yakobus, si Andreas, si Filipus, si Tomas, si Bartolomeus, si Matius, si Yakobus anak Alfeus, si Simon Patriot, si Yudas anak Yakobus;

¹⁴ kasadonyo tu taruih bakumpua sahati untuak badowa. Inyo badowa samo-samo jo urang-urang padusi bagai, tamasuak amai Siti Maryam mandeh Isa Almasih, sarato jo dunsanak-dunsanak Baliau.

¹⁵ Pado suatu ari, kutiko urang-urang tu sadang bi bakumpua -- ado kiro-kiro saratuih duwo puluah urang banyaknyo -- mako tagaklah si Petrus untuak babicaro. Inyo mangatokan,

¹⁶ "Sudaro-sudaro! Apo nan lah tatulih di Alkitab, itu musti tajadi. Sa isuak malalui Nabi Daud, Roh Allah lah banubuat tantang si Yudas, pamimpin urang-urang nan manangkok Isa Almasih.

¹⁷ Si Yudas adolah kanti kito, inyo lah dipiliah pulo untuak sato bakarajo samo-samo jo kito."

¹⁸ (Si Yudas lah mandapek tanah untuak kubuarannyo, dari upah karajonyo nan jahek. Inyo lah mati dek tarambau, paruiknyo pacah, isi paruiknyo lah taborai kaluwa kasadonyo.

¹⁹ Kasadonyo urang nan tingga di Yerusalem tawu tantang kajadian tu. Itulah sababnyo, mangko dalam bahaso inyo, inyo manamoi tanah tu Akeldama, nan aratinyo adolah 'Tanah darah'.)

²⁰ "Dek karano di kitab Zabur ado tatulih nan bakcando iko, 'Biyalah tampaik tingganyo indak ba uni; jan ado surang juwo urang nan tingga di dalamnyo.' Ado pulo tatulih nan bakcando iko, 'Biyalah tampaiknyo di ambiak dek urang lain.'

²¹ Dek karano itu, musti ado agak surang di antaro kito ko nan ka manjadi sasi, baraso Tuhan Isa Almasih lah iduik baliak sasudah mati. Urang tu, mustilah salah surang dari urang-urang nan salamo ko taruih samo-samo jo kito, samaso kito manuruikkan Tuhan Isa Almasih kian kumari, sajak dari Nabi Yahya muloi mampamandikan urang, sampai ka ari Isa Almasih di angkek ka sarugo dari adok-an kito."

²² (1:21)

²³ Mako urang-urang nan ado disinan, ma usulkan duwo urang, nan partamu si Yusuf nan acok pulo di imbau si Barsabas (inyo dinamoi pulo si Yustus), nan kaduwo si Matias.

²⁴ Sudah tu urang-urang tu badowa. Inyo badowa bakcando iko, "Tuhan, Angkau mangatawui isi ati kasadonyo urang. Si Yudas lah baranti dari tugehnyo sabagai rasul, inyo lah mati. Dek karano itu, tunjuakkanlah kabake kami, siya diantaro urang nan baduwo ko nan ka Tuhan piliah, nan ka di agiah tugeh untuak manggantikan si Yudas."

²⁵ (1:24)

²⁶ Sasudah tu, namo urang nan baduwo tu di undi, mako jatuahlah piliahan ka si Matias. Inyo di angkek manjadi rasul, untuak batugeh samo-samo jo rasul nan sabaleh lai.

Kisah Para Rasul

Video Kisah Para Rasul 1

Ikuti Kami:

KONTAK | PARTISIPASI | DONASI