Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teopilus si ihamati. I bas kitapku si pemena nggo kusuratken kerna kerina si ibahan Jesus ras si IajarkenNa, tangtangna nari,

² seh ku warina Ia iangkat ku Surga. Ope denga Ia iangkat ku Surga, i bas kuasa Kesah Si Badia IberekenNa pedah-pedah man kalak si nggo IpilihNa jadi rasul-RasulNa.

³ Empat puluh wari dekahna kenca KematenNa, icidah-CidahkenNa BaNa man rasul-rasul e alu erbage-bage cara guna mbuktiken maka Ia nggeluh. Tangkas idah rasul-rasul e Jesus, janah ngerana Ia ras rasul-rasul e kerina kerna Kinirajan Dibata.

⁴ Sekali asum Jesus pulung ras rasul-rasul e IberekenNa perentah man rasul-rasul e nina, "Ula tadingken Kota Jerusalem tapi timailah pemere si nggo ipadanken BapangKu, sue ras si nggo Kukataken man bandu.

⁵ Johanes mperidiken alu lau, tapi piga-piga wari nari kam iperidiken alu Kesah Si Badia."

⁶ Asum rasul-rasul pulung ka ras Jesus, isungkunna Jesus nina, "O Tuhan, genduari kin atendu manteki kerajan Israel mulihi?"

⁷ Erjabap Jesus man rasul-rasul nina, "Kerna si e BapangKu metehsa; la perlu ietehndu ntah ndigan jadi.

⁸ Tapi ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda."

⁹ Kenca IkatakenNa si e iangkat Ia ku Surga i lebe-lebe rasul e nari, jenari lit embun ngeligeni Ia erbahanca lanai Ia idah rasul-rasul e.

¹⁰ Asum rasul-rasul e natap denga ku langit, kempak Jesus si nggo lawes e, rempet tedis dua kalak dilaki i deherna, uisna mbentar.

¹¹ Nina man rasul-rasul e, "O kalak Galilea, ngkai maka kam tedis natap ku langit? Bagi nggo idahndu Jesus iangkat ku Surga, bage ka Ia pagin reh mulihken."

¹² Kenca bage mulih rasul-rasul e i Uruk Seton nari ku Jerusalem. Uruk e dauhna kira-kira sada setengah kilometer i Jerusalem nari.

¹³ Kenca seh i Jerusalem, lawes ia ku loteng rumah inganna numpang. Kalak enda eme: Petrus ras Johanes, Jakup ras Andreas, Pilipus ras Tomas, Bartolomeus ras Matius, Jakup anak Alpeus, Simon Pejuang ras Judas anak Jakup.

¹⁴ Tutus atena kerina ras-ras ertoto, ikut pe diberu, bage pe Maria nande Jesus ras senina-senina Jesus.

¹⁵ I bas sada wari pulung ka ia kerina, teremna lit seratus dua puluh kalak. Asum e tedis Petrus jenari ngerana ia nina,

¹⁶ "Turang ras senina, arus me jadi kai si isuratken i bas Pustaka Si Badia sue ras si ikataken Kesah Si Badia arah Daud kerna Judas si maba kalak nangkap Jesus.

¹⁷ Judas sekalak anggota terpukta, erkiteken ia pe nggo ipilih Jesus guna muat bagin i bas dahin enda."

¹⁸ (Alu duit si idat Judas arah perbahanenna si jahat itukurna sada lambar taneh. I je me ia ndabuh seh mate. Beltekna mburtas ndaraten tukana.

¹⁹ Kerina anak Kota Jerusalem meteh kerna si e. Emaka i bas cakapna taneh e igelarina "Akeldama" ertina Taneh Dareh.)

²⁰ "Sabap lit tersurat i bas Kitap Masmur, 'Terulang min rumahna, ulanai min lit si ngianisa'. Lit ka pe tersurat, 'Igantiken kalak si deban min jabatenna.'

²¹ Erdandanken si emaka arus itambahi sekalak nari teman kami jadi saksi maka Tuhan Jesus nggo keke i bas si mate nari. Si ipilih e arus pe si rusur ngikut Jesus asum Ia erdalan-dalan ras kita.

²² Eme mulai i bas paksa Johanes ndilo kalak gelah iperidiken seh ku paksa Jesus iangkat i tengah-tengahta nari ku Surga."

²³ Emaka iusulken kalak e dua kalak dilaki, eme Jusup si igelari Barsabas (igelari pe ia Justus) ras si Matias.

²⁴ Jenari ertoto perpulungen e nina, "O Tuhan ItehNdu kap seh ku pusuh peraten manusia kerina. Perbahan si e Tuhan, tuduhken min man kami si apai ipilih Kam i bas si dua kalak enda,

²⁵ lako ngaloken jabaten rasul, guna ndahiken dahin si nggo itadingken Judas, Judas si nggo lawes ku inganna si patut."

²⁶ Jenari itikam tanduk kalak eme guna milih sekalak i bas si dua e. Gelar si terpilih eme Matias. Alu bage Matias me bengket ku bas terpuk rasul si sepulu sada kalak.

Kisah Para Rasul

Video Kisah Para Rasul 1

Ikuti Kami:

KONTAK | PARTISIPASI | DONASI