Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma naga wimoi wi ronga 'o Ananias, ma wekata mi ronga ngo Safira. 'Ona mita manga tonaka yowukunu.

² 'O tonaka ma 'ija ge'ena ma songona 'una wa'ese de ma songonali wokula 'o su-sulokika. 'Una wodiai koge'ena, ma wekata mita manakokau.

³ So 'o Petrus wongose 'o Ananiasika, "Ananias, 'ido'oa so nomasidabika 'o Tokata ma Koana ni singina yapareta sigado ngona noeluku 'o Ngomasa 'Itebi-tebinika, de nomasiriidino ma ngale nomadengoka 'ani tonaka ma 'ija ma songona?

⁴ 'O tonaka ge'ena gee konawukunuawasi ge'ena to ngona. De nawukunokau mita ma pipi ge'ena ka to ngonasi mita. De 'ido'oa so 'ani singinaka koge'ena nodiai? Ge'ena ngona noeluku ko 'o nyawakawa ma 'ena ma Jo'oungu ma Dutuka."

⁵ 'O Ananias kage'ena wo'isenoka de woruba, de kawosongenokau. So 'o nyawa 'iodumu yakimodongo ma sala gee yo'isenoka ge'ena 'idadi.

⁶ So 'o do-dogu'uru yaino 'o Ananias wi songene yasao, deika yosisupu yapo'osuku.

⁷ Poilia 'o takoro sa'ange 'ipasa de ma wekata mowosama. Muna komanakokawa 'okia 'asa kaidadioka.

⁸ De 'o Petrus wosano munaka, "Bika noisidemo 'ania tonaka gee ngona de ni rokata niawukunu ma 'ija kone'ena ma amokoka?" 'O Ananias ma wekata mosango, "Ia, ma 'ija koge'enau."

⁹ De 'o Petrus wongoseli munaka, "'Ido'oa so ngona de ni rokata ka 'o singina moi 'o Ngomasa 'Itebi-tebini niataili niosihaga? Nosigisene! 'Ani rokata wipo-po'osuku yolionou. Ngonali mita dua nisisupu nipo'osuku."

¹⁰ Kage'ena ma 'orasi de kamoruba de mosongenukou 'o Petrus wi bionoka. So gee 'o do-dogu'uru go'ona yowosanga, de mimake muna mosongenukou. Ge'enaka de 'ami maieti ge'ena yosisupu so yapo'osuku ma rokata wi dateuku.

¹¹ So ma rai 'o nyawa yongaku-ngaku go'ona, de mita 'iregu-regu gee yo'ise-'isene 'okia naga 'idadiokau ge'ena yakimodongo ma sala.

¹² Sababu 'o su-suloko manga manarama, so 'o no-nako 'ihera-herangi de 'o hali 'ila-laagomo 'idadi 'o kawasa manga bionoka. Yongaku-ngaku yoodumu ka 'o singina moi yomato-toomu 'o Salomo wi Surabioka gee ma Jo'oungu ma Dutu wi Woaka.

¹³ 'O nyawa 'iregu koyomoroinuwa yomoteke yomalomu de 'o nyawa yongaku-ngaku go'ona. Ma yongaku-ngaku go'ona 'o kawasa posironga yakihoromatioka.

¹⁴ De gee 'ito'ingo de kayokudai monga 'o nyawa 'o nauru de 'o ngeweka yongaku ma Jouka.

¹⁵ De ma rupa koge'enau sigado 'o nyawa yopa-panyake de manga mo-mokuoka bolo de manga dangiroka 'o tapakioka yaki'asano, la dua nako 'o Petrus ge'enano wotoaka ge'ena ngaro ka 'awi gurumini ma eta yakidaene ma manga panyake 'i'aiki.

¹⁶ 'O kota-kotaka gee 'o Yerusalem ma date-dateoka kayotuonou de yopa-panyake de yakitoka-tokata manga gudai yaki'asano so yakisikoki'aiki.

¹⁷ So ma rai 'o 'Imam ma Amoko de wimote-moteke yoodumu ge'ena la 'o Sadukioka 'ikurue yomau yakisangisara 'o su-suloko go'ona sababu yakitu'uduku.

¹⁸ 'O su-suloko go'ona yakitagoko so yakitahanuku.

¹⁹ Ma 'iobiruku de ma Jou wi mala'ekati moi yaino de 'o bui ma ngorana yakokipelenga de yakisisupu 'o su-suloko go'ona. 'O mala'ekati ge'ena kaingosekau 'onaka,

²⁰ "Niotagi ma Jou wi Woaka, ge'enaka niaika de niosigilali niosihabari 'o nyawa-nyawaka 'o sagala moi-moi ma ngale 'o 'ahu ma sungi ge'ena la po'ahu de 'o Yesus."

²¹ De yodomoteke 'o mala'ekati ma demo ge'ena, so 'isori 'ibibini de yotagiokau ma Jo'oungu ma Dutu wi Woaka. Ge'enaka de yokurue yodotoko ge'enaka dau. 'Ena ma 'orasi ge'ena ma 'Imam ma Amoko de wimote-moteke gee yoboa manga lo-lomu ma ngiioka yosi'aturu 'o 'Agamaka ma Hakimi yomalomu de 'o Yahudioka ma balu-balusu. Ge'enaka de 'ona yosuloko 'o nyawa-nyawa yotagi 'o su-suloko yaki'ese 'o buioka la yaki'asa yakisitaari 'onaka.

²² Ma gee yakisulo-suloko go'ona ya'adonika 'o buioka, 'ena 'o su-suloko go'ona koyaki'iwau. So 'ona yolio de yosidemo ge'ena 'o hakimika.

²³ 'Ona yongose yohaki-hakimika, "Ngomi miamake 'o bui ma ngorana yakuci yosidiaioka, de yojaga-jaga go'ona 'o ngoranoka yojagaku. Ma gedagee miapelengaka 'ena komoiwa miakimake ma dodaka."

²⁴ Gedagee ma Jo'oungu ma Dutu wi Woa ma jo-jaga ma balusu de 'o 'imam ma sae-saeke yo'isenoka yosidemo koge'ena, de 'ona yododato de yoherangi.

²⁵ Ge'enaka de wimoi woboa 'o habari wo'asa konee, "Dea-dea, niosigisenosi! 'O nyawa gee ngini niakibui-buika ne'ena 'ona 'o nyawa gudai yakidotoko ma gu-gudaioka ma Jou wi Woaka."

²⁶ So ma Jou wi Woa ma jo-jaga ma balusu de gee wimote-moteke yaika kayaki'esekali 'o su-suloko go'ona. Ma kayakikuatuawau sababu yakimodongo 'o nyawa yoku-kudaika; 'uwa sigado yakiriteto.

²⁷ 'O su-suloko go'ona yakisingosama yakisitaari 'o 'Agamaka ma Hakimika, ge'enaka de ma 'Imam ma Amoko wakipirikisaa.

²⁸ Kawongosekau, "Minitawanonokau koge'ena ma guata 'ato 'uwa niosidotoko ma ngale 'o Yesus, de ne'ena kaniodiaiokauoli. 'Ania do-dotoko ge'ena niosi'omangukou 'o Yerusalemuoka. Deika niongose bari 'o nyawa gu'una wosongene ge'ena ma sababu ngomi."

²⁹ 'O Petrus de 'o su-suloko 'iregu yosango, "'O nyawaka de ma Jo'oungu ma Dutuka, ge'ena ngomi salingou ma Jo'oungu ma Dutuka 'ifoloi midomoteke.

³⁰ 'O Yesus gee ngini winisidelokau 'o salipoka ma ngale winiso-songene, ma ma Jo'oungu ma Dutu, gee to ngone nanga edete de nanga dotumu wisuba-suba, wisimomikokau ngaro wosongenokau ma.

³¹ De ma Jo'oungu ma Dutu wigoraka la wopareta de wi kumati ma ngale wodadi saeke de 'o nyawa wosilaha-laha; la 'o Israeloka yakikula 'o 'orasi yomaogoro 'o sowono yodiai de manga sowono ma Jo'oungu ma Dutu kowosi-singinawau.

³² Ngomiou ma sakisii 'iodumu ge'ena, de mita 'o Ngomasa 'Itebi-tebini gee ma Jo'oungu ma Dutu wokula 'o nyawa-nyawaka gee wisingou-ngounu."

³³ Gedagee 'o 'agamaka ma balu-balusu yo'isenoka ge'ena, de yakito'otasa so 'ona ka 'o singina moi yomau 'o su-suloko yakito'oma.

³⁴ Ma 'o 'Agamaka ma Hakimi wimoi 'o Farisioka ma nyawa wi ronga 'o Gamaliel. 'Una 'o 'agamaka wodoto-dotoko gee 'o nyawa 'iodumu wi'isene. 'Una waie woma'oko de wosuloko 'ato 'o su-suloko yakisisupukasi tai-taiti.

³⁵ Ge'enaka de kawongosekau 'o 'Agamaka ma Hakimika, "'Esa moi 'o Israeloka ma nyawa! Nimatibangi niosidi-diai ma ngale 'okia naga gee dua ngini niadiai 'o nyawaka go'ona.

³⁶ Sababu ma sira 'idadiokau 'o Teudasoka, gee womamaoku 'una 'o nyawa ma amoko, sigado poilia yaratusu soata widomoteke 'una. Ma 'una wito'omaka so wimote-moteke gee yomakati-tingaoka, de wisigaro ge'ena ma kaiisangoka.

³⁷ Ge'ena 'ipasano, ma 'orasi 'o kawasa yakidoimi so manga ronga yosilefo, de 'o Yudasioli 'o Galilea ma nyawa wakibaja 'o nyawa-nyawa so manga gudai widomoteke. Ma 'una mita wito'omaka de wimote-moteke go'ona yomakati-tingaoka.

³⁸ So de 'okia naga 'idadiokau ne'ena, ngoi tinidongose nginika: 'Uwa niakido'oanikia 'o nyawa no'ona, sababu nako manga do-dotoko de manga manarama ge'ena ka 'o nyawaka de yaino, ge'ena manga do-dotoko de manga manarama ge'ena dua kaiisangoka.

³⁹ Ma nako ge'ena la ma Jo'oungu ma Dutuoka de yaino, ge'ena ma raiokau koniaki'akunuwa. Bolo dua poilia ngini ma Jo'oungu ma Dutu winilawani." 'O Gamaliel 'awi demo ge'ena 'o 'Agamaka ma Hakimi yosigisene.

⁴⁰ So yaki'asokino 'o su-suloko go'ona de yakitifo-tifo, de koyosidabiwau yosidotokoli ma ngale 'o Yesus. Ge'ena 'ipasa de yakipidilokau.

⁴¹ 'O su-suloko go'ona yosupu 'ena ka manga morenoka, sababu ma Jo'oungu ma Dutu wamaoku 'ona ge'ena yadaene yakisito-torou sababu 'o Yesus.

⁴² De ka 'o wangeu yosinoimi ma Jou wi Woaka de 'o nyawa manga woa-woaka yosidotoko de yosihabari 'o Habari ma Owa ma ngale 'o Yesus 'una ge'ena 'o Koana 'o Nyawa Wosilaha-laha gee ma Jo'oungu ma Dutu wosijajiokau.

Kisah Para Rasul

Video Kisah Para Rasul 05

Ikuti Kami:

KONTAK | PARTISIPASI | DONASI