Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Laguq araq sopoq dengan mame aranne Ananias. Ie kance seninene aranne Sapira, jual ẽndah tanaq saq jari dowẽn ie pade.

² Kẽpẽng lẽman penjualan nike separone ie adẽqang umaq diriqne mẽsaq dait saq lain ie serahang tipaq rasul-rasul. Ie ngelaksaneang nike tetaoq siq seninene.

³ Make Petrus bebase lẽq ie, "Ananias, kembẽq side alurang Belis nguasein atẽnde, jangke side bani beduste lẽq Roh Suci, secare tedoq-tedoq nahen separo kẽpẽng hasil jual tanaq nike umaq diriqde mẽsaq?

⁴ Tanaq nike jari dowẽn side sendẽqman side jual. Dait sesampun tanaq nike tejual, kẽpẽngne tetep jari dowẽnde ẽndah. Jari kembẽq araq maksut dalem angende jari miaq saq maraq nike? Side ndẽq beduste lẽq manusie, laguq Allah!"

⁵ Sesampun Ananias dengah ucapan-ucapan nike, ie rebaq, beterus ninggal. Selapuq dengan saq dengahang peristiwe nike jari takut.

⁶ Make dengan-dengan bajang dateng bungkus mayit Ananias, beterus jauqne sugul jari tekubur.

⁷ Kire-kire telu jam sesampun nike, seninene tame. Ie ndẽq nenaoq napi saq sampun telaksane.

⁸ Basen Petrus lẽq ie, "Silaq badaq tiang, napi semenẽ ajine tanaq saq tejual nike?" "Tetu, nike ajine," jawab senine Ananias.

⁹ Terus Petrus bebase lẽq ie, "Kembẽq side kance semamende sepakat jari cobe Roh Tuhan? Dengahang! Dengan-dengan saq nguburang semamende sampun tulak. Ie pade ẽndah gen jauq side sugul."

¹⁰ Langsung waktu nike ẽndah senine Ananias rebaq dait ninggal lẽq julun Petrus. Dait sewaktu dengan-dengan bajang nike tame, daitne ie sampun ninggal. Beterus ie pade jauq mayitne sugul dait tekubur lẽq dẽkẽt semamene.

¹¹ Make selapuq dengan-dengan percaye nike dait dengan-dengan lainne, saq dengah mengenai peristiwe nike jari takut.

¹² Lantaran pelayanan rasul-rasul make luwẽq keajaipan dait hal-hal saq luar biase telaksane lẽq antare masyarakat. Siq sopoq angen selapuq dengan percaye bekumpul lẽq Sesangkok Sulaiman lẽq Gedẽng Allah.

¹³ Dait dengan lain ndẽq araq saq bani dateng bekumpul kance dengan-dengan percaye nike. Laguq dengan-dengan percaye nike tehormatin gati siq masyarakat.

¹⁴ Dait sayan ngonẽq sayan luwẽq dengan-dengan saq percaye lẽq Junjungan Saq Mulie -- saq mame-mame dait saq nine.

¹⁵ Malahan ie pade jauq dengan-dengan sakit tetoloq lẽq atas lasah atao tipah, terus tejauq ojok rurung, sendẽq-ndẽqne adẽq ie pade bau kene siq lingonne Petrus lamun ie liwat lẽq derike.

¹⁶ Luwẽq gati dengan-dengan dateng lẽman kote-kote sekiter Yerusalem. Ie pade jauq dengan-dengan saq sakit dait saq tekuasein siq roh-roh jahat. Dait dengan-dengan nike teselahang selapuqne.

¹⁷ Ahirne Imam Agung dait selapuq pengiring-pengiringne, golongan dengan-dengan Saduki, mulai ngelaksaneang niatne lantaran ie pade talon atẽ.

¹⁸ Rasul-rasul nike tebau, terus tetamaq ojok dalem bui kote.

¹⁹ Laguq kelemne, sopoq malaẽkat Tuhan bukaq lawang-lawang bui, terus jauq rasul-rasul nike sugul. Malaẽkat nike bebase lẽq rasul-rasul nike,

²⁰ "Silaq lumbar ojok Gedẽng Allah dait sampẽang lẽq dengan-dengan mengenai idup saq baru niki."

²¹ Beterus rasul-rasul nike patiq pesen malaẽkat nike. Masih aru gati ie pade lumbar ojok Gedẽng Allah, dait mulai ngajahang lẽq derike. Lẽq waktu nike Imam Agung dait pare pengiringne dateng, terus ngaraqang sidang mahkamah kance pare pemimpin Yahudi. Beterus ie pade ngutus dengan lumbar bait rasul-rasul nike lẽman bui adẽqne tejauq ngadep ie pade.

²² Laguq sewaktu dengan-dengan saq teutus nike dateng lẽq bui, ie pade ndẽq ndait rasul-rasul nike lẽq derike. Jari ie pade tulak, terus ngelaporang hal nike lẽq mahkamah. Ie pade matur,

²³ "Sewaktu dateng bui, tiang pade ndait lawang bui nike telenting solah-solah, dait pengawal-pengawal kenyeke bejage lẽq lawang. Laguq waktu tiang pade bukaq lawang nike, tiang pade ndẽq ndait sopoq dengan juaq lẽq dalemne."

²⁴ Sewaktu prewire pengawal Gedẽng Allah dait imam-imam kepale pireng laporan nike, ie pade bingung mengenai rasul-rasul nike, dait takut napi saq gen telaksane.

²⁵ Beterus dateng sopoq dengan mame jauq berite niki, "Pade dengahang! Dengan-dengan saq bapaq-bapaq tahen lẽq bui nike mangkin kenyekene ngajahang dengan luwẽq lẽq Gedẽng Allah!"

²⁶ Beterus prewire pengawal Gedẽng Allah nike bareng kance pengawal-pengawalne lumbar bait rasul-rasul nike malik. Laguq ie pade ndẽq kadu kekerasan, sẽngaq ie pade takut lẽq dengan luwẽq; ndaq-ndaq laun ie pade tepelẽwas kadu batu siq dengan luwẽq nike.

²⁷ Rasul-rasul nike tejauq ngadep mahkamah. Beterus ie pade teperiksaq siq Imam Agung.

²⁸ Ie bebase, "Tiang pade secare teges sampun balaq side pade adẽq ndaq ngajahang dengan kadu pesẽngan nike. Laguq mangkin silaq serioq napi saq side laksaneang! Side pade nyebarang pengajahande nike lẽq selapuq wilayah Yerusalem, dait malahan side pade mẽlẽ nuduh bahwe tiang pade saq jari penyebap Dengan nike ninggal."

²⁹ Jawab Petrus dait rasul-rasul saq lain, "Tiang pade harus turut Allah dait ndẽqne turut manusie.

³⁰ Deside Isa, saq side pade pakuq lẽq kayuq salib, sampun teidupang malik lẽman ninggal siq Allah leluhurte.

³¹ Dait Allah sampun ngicanin Ie kedudukan dait kekuasean saq tinggi sebagẽ Pemimpin dait Juruselamet; adẽq bangse Israel tebẽng kesempatan jari betobat lẽman dose-dosene dait mauq pengampunan.

³² Tiang pade saksi-saksi mengenai selapuqne nike -- tiang pade dait Roh Suci ẽndah saq teicanin siq Allah tipaq dengan-dengan saq turut prẽntah-Ne."

³³ Sewaktu anggote-anggote Mahkamah Agame pirengang ucapan rasul nike, ie pade menggah gati, dait ie pade sepakat gen nyematẽq rasul-rasul nike.

³⁴ Laguq lẽq antare anggote-anggote mahkamah nike araq sopoq dengan Parisi aranne Gamaliel. Ie ahli Taurat saq tehormatin gati siq selapuq dengan. Ie nganjeng terus suruqne dengan jauq sugul rasul-rasul nike semendaq.

³⁵ Beterus ie bebase lẽq Mahkamah Agame nike, "Side pade dengan-dengan Israel! Silaq pikir bagus-bagus napi saq side pade kayun laksaneang lẽq dengan-dengan niki.

³⁶ Sẽngaq laẽq sampun araq Teudas, saq nganggep diriqne dengan hẽbat, jangke kire-kire samas dengan saq jari pengiringne. Laguq ie tematẽq dait selapuq pengiringne ndẽq keruan aningne, dait kegiatanne musnah.

³⁷ Sesampun nike, sewaktu araq sẽnsus, muncul ẽndah Yudas, dengan lẽman Galilea. Lantaran pengaruhne, luwẽq ẽndah dengan saq turut ie. Laguq ie ẽndah tematẽq, dait selapuq pengiringne ndẽq keruan aningne.

³⁸ Jari mangkin lẽman peristiwe niki, tiang bẽng nasẽhat: Sampunang laksaneang napi-napi tipaq dengan-dengan niki, alurang ie pade. Sẽngaq lamun pengajahan dait kegiatan ie pade asalne lẽman manusie, make pengajahan dait kegiatan nike gen musnah.

³⁹ Laguq lamun nike asalne lẽman Allah, side pade ndẽq gen bau ngalahang ie pade. Malahan sang gen nyate bahwe side pade ngelawan Allah." Nasẽhat Gamaliel nike teterimaq siq mahkamah.

⁴⁰ Make rasul-rasul nike tempoh, beterus tepecut dait tebalaq ngajahang malik mengenai Deside Isa. Sesampun nike, baruq ie pade tebẽbasang.

⁴¹ Gembire gati angen rasul-rasul nike bilin Mahkamah Agame nike sẽngaq ie pade sampun teanggep patut siq Allah jari nerimaq hinean lantaran pesẽngan Deside Isa.

⁴² Dait sebilang jelo lẽq Gedẽng Allah dait lẽq balẽ-balẽ dengan, ie pade tetep ngajahang dait beriteang Kabar Solah mengenai Deside Isa, bahwe Ie Almasih.

Kisah Para Rasul

Video Kisah Para Rasul 05

Ikuti Kami:

KONTAK | PARTISIPASI | DONASI