Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba hiza, so samõsa zotõi Anania. Darua ira fo'omonia sotõi Safira lafamawa mbenuara.
2 Bõlinia lataha khõra õsa ba si tõrania labe'e ba danga ndra sinenge. Ilau Anania da'õ ba zaboto ba dõdõ wo'omonia.
3 Imane khõnia Fetero, "He Anania, hana wa õtehe ifatõrõ dõdõu Afõkha, irege falimo'õ ba Geheha Lowalangi, õtaha khõu õsa mbõli mbenua andrõ?
4 Hadia, tenga khõu mbenua andrõ fatua lõ õ'amawa? Ba si manõ gõi me no aefa õ'amawa no khõu mbõlinia. Ba hana wa tumbu ba dõdõu wolau si manõ? Tenga niha nilimou, no Lowalangi!"
5 Ba me irongo wehede andrõ Anania, alau tou ia ba aetu noso. Tobali ata'u fefu niha samondrongo da'õ.
6 Lahalõ mboto Ganania ira ono matua, la'ohe baero ba wogo'o ya'ia.
7 Mato tõlu za aefa da'õ tohare wo'omonia. Lõ i'ila hadia zi no alua.
8 Imane khõnia Fetero, "Tandraigõ ombakha'õ khõgu: Hadia benua andrõ nifamawami fo'omou ha si mane mbõlinia?" Imane fo'omo Ganania, "Ya'ia, si manõ."
9 Imane khõnia Fetero, "Hana wa mamagõlõ ami wo'omou wanandraigõ Eheha Lowalangi? Fondrondrongo! No mangawuli zogo'o fo'omou. La'ohe gõi dania ndra'ugõ baero."
10 Mate gõi wo'omo Ganania me inõtõ da'õ fõna Wetero. Ba me tohare ndraono matua andrõ, lasõndra no mate ia. La'ohe mbotonia baero ba lako'o ba zinga mboto wo'omonia.
11 Tobali ata'u zamati tanõ bõ'õ, me larongo zalua andrõ.
12 Ba halõw̃õ ndra sinenge andrõ alua zagahõlihõli dõdõ ba gotalua niha sato. Ba wa ha sambua dõdõ owulo fefu zamati ba Golayama Zalomo ba Nomo Zo'aya.
13 Ba lõ niha baero si barani owulo si fao niha samati andrõ. Lafosumange zamati andrõ niha sato.
14 Itugu ara itugu ato zamati khõ Zo'aya -- he ira matua, si manõ gõi ndra alawe.
15 Alua gõi zi mane da'e: la'ohe zofõkhõ ba heahea ma ba dufo, la'ohe ba lala, ena'õ he ha gõna ira lumõ Wetero, na itõrõ da'õ.
16 Lõ aetu la'ondrasi niha moroi ba mbanua si fasui Yeruzalema. La'ohe zofõkhõ awõ nira'u wa'abõlõ zi lõ sõkhi. Ba tefadõhõ niha andrõ fefu.
17 Lalau hadia ia ira ere sebua awõ ndra nifahaõnia, ya'ia ndra Sadukai'o bõrõ wa'afõkhõ dõdõra.
18 Lara'u ndra sinenge andrõ ba labe'e bakha ba gurunga.
19 Ba hiza ba zi bongi da'õ, tohare mala'ika Zo'aya samokai mbawa ndruhõ gurunga. I'ohe baero ndra sinenge andrõ. Imane mala'ika andrõ khõ ndra sinenge,
20 "Mi'ae'e ba mizizio ba Nomo Zo'aya ba mi'ombakha'õ ba niha sanandrõsa ba wa'auri si bohou andre."
21 La'o'õ wehede mala'ika andrõ ira sinenge. Sahulõ wongi sibai numalõ ira ba Nomo Zo'aya ba mamahaõ ira ba da'õ. Gasagasa da'õ tohare gõi ndra ere sebua awõ ndra nifahaõnia, lalau rafe si fao ira salaw̃a niha Yahudi. Aefa da'õ lafatenge niha ba wanga'i ira sinenge andrõ moroi ba gurunga ena'õ la'ohe fõnara.
22 Ba me larugi gurunga nifatenge andrõ, la'ila wa lõ ya'ira bakha ba gurunga. Mangawuli ira ba wangombakha da'õ ba rafe.
23 Lamane ba rafe zanguhuku andrõ, "me marugi gurunga, ba ma'ila no tehaogõ tekusi mbawa ndruhõ ba manaro ndra sanaro andrõ ba mbawa ndruhõ. Ba me mabokai mbawa ndruhõ andrõ, samõsa lõ nisõndrama niha bakha."
24 Me larongo da'õ ira hõgõ zanaro Omo Zo'aya awõ ndra ere sebua, abu dõdõra khõ ndra sinenge andrõ awõ wa'ata'u ira hadia zalua dania.
25 Samõsa ndra matua solohe turia imane, "Mifondrondrongo! Niha nibe'emi ba gurunga andrõ, mamahaõ niha sato ira iada'e ba Nomo Zo'aya!"
26 Hõgõ zanaro ba Nomo Zo'aya awõ ndra sanaro tanõ bõ'õ, numalõ wangai mangawuli ira sinenge andrõ. Ba tenga ba wõnu lahalõ ira, bõrõ me ata'u ira ba niha sato; ma dania latebu ira kara.
27 La'ohe ndra sinenge andrõ fõna rafe zanguhuku. Ifareso ira ere sebua.
28 Imane, "No matenaw̃a sibai ami ena'õ bõi mamahaõ ami sanandrõsa ba niha andrõ. Ba hiza, hadia zi no milau! Mifazaewe wamahaõmi da'õ ba zi sagõrõ Yeruzalema, ba mibe'e ba huluma wa bõrõ ndra'aga wa mate niha da'õ."
29 Latema li ira Fetero awõ ndra sinenge tanõ bõ'õ, lamane, "Lõ tola lõ'õ ma'o'õ khõ Lowalangi ba tenga ba niha.
30 Yesu, niforõfami andrõ, no I'orifi Ia mangawuli Lowalangi ndra tuada.
31 Ba no Ibe'e khõ-Nia wetaro awõ kuaso salaw̃a Lowalangi tobali Sondrõnia'õ ba Sangorifi; ena'õ tola lafalalini gera'erara soi Gizera'eli fa tola manema fangefa ira.
32 Samaduhu'õ ndra'aga ba da'õ fefu -- ya'aga awõ Geheha Lowalangi nibe'e Lowalangi ba niha solo'õ oroisa-Nia."
33 Mofõnu sibai ndrotondroto Zanguhuku ba Agama me larongo da'õ, ba ha sara dõdõra wamunu ira sinenge andrõ.
34 Ba hiza ba gotalua ndrotondroto Zanguhuku ba Agama andrõ so zotõi Gamali'eli. Guru agama nifosumange niha sato ia. Muzizio ia ba ifaw̃a'õgõ ena'õ la'ohe baero ndra sinenge andrõ ua.
35 Imane ba rafe Zanguhuku ba Agama andrõ, "Ya'ami ira talifusõ niha Gizera'eli! Mihaogõ wo'angeragõ hadia nilaumi ba niha andre.
36 No irai so mefõna Deoda, sanguma'õ sebua ia, irege so mato õfa ngaotu niha zolo'õ ya'ia. Ba hiza labunu ia ba muzawili fefu zolo'õ ya'ia andrõ ba taya manõ halõw̃õnia.
37 Aefa da'õ ba maoso Yuda banua Galilea me inõtõ latanõ dõi niha ba zura, ba idõnisi niha solo'õ khõnia. Ba hiza no labunu gõi ia, ba fefu zolo'õ khõnia ba ahori muzawili.
38 Era'eragu ba zalua andre: bõi milau hadia ia ba niha andre, akha aefa ira. Bõrõ na moroi ba niha wamahaõ awõ halõw̃õra andrõ ba taya dania.
39 Ba hiza na moroi khõ Lowalangi, ba tebai mikalaisi ira. Ma na'i oroma wa solaw̃a Lowalangi ami." Itema rafe zanguhuku menemene Gamali'eli andrõ.
40 Lakaoni ndra sinenge andrõ labõbõzi ba lategu ira wamahaõ sanandrõsa khõ Yesu. Aefa da'õ awena la'efa'õ ira.
41 Larõi rafe Zanguhuku ba Agama andrõ ira sinenge si fao fa'omuso dõdõ, bõrõ me Itehe Lowalangi te'o'aya ira bõrõ Yesu.
42 Ero ma'õkhõ mamahaõ ira ba Nomo Zo'aya ba ba nomo niha, ba wama'ema Turia Somuso Dõdõ sanandrõsa khõ Yesu wa Ya'ia andrõ Razo Sangorifi si no mufabu'u andrõ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA