Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tapi naria muni saito langgai ntanina nosanga i Ananias, bereina nosanga i Safira. Ira njamboko nompobalu salimpu tanara.

² Bo doi ali ntana nipobalura haitu, sagaa nibolira ka ira mboto, bo sagaa nikeni i Ananias ka suro-suro. Nangulimo i Ananias, "Hitu puramo doi ali ntana nipobalu kami." Poviana haitu nisani nu bereina muni.

³ Nanguli i Petrus ka ia, "Ananias, nakuya iko nompalamba Magau nu Seta nombakuasai raramu sampe nidavaimu Nosa Gasa nu Alatala? Iko nombaboliaka doimu sagaa ka iko mboto.

⁴ Dopame nipobalumu tana haitu, iko mami tupuna. Bo naupu tana haitu nipobalumu, doi ali ntana haitu iko muni tupuna. Nakuya sampe naria patuju riara ntaimu nompovia anu nadaa? Iko ledo aga nodava ka manusia, tapi iko nodava ka Alatala!"

⁵ Naupu i Ananias nangepe tesa i Petrus, kaliu-liu nadunggamo ia bo namate. Bo nakava bara sako-ndua kabilasa nombasompu karobatana, bo nikenira hau ratana ri savalikuna. Pura-pura tona naeka mpuu nangepe anu najadi haitu.

⁶ (5:5)

⁷ Bara talu-jaa kaliuna i Ananias namate, nesua munimo bereina i Safira. Dopa nisanina anu dako najadi.

⁸ I Petrus nanguli ka ia, "Uli ka yaku, tana nipobalumiu njamboko haitu, aga hitu puramo alina?" Nesana i Safira, "Nakana. Tutu puramo alina."

⁹ Nanguli i Petrus ka ia, "Nakuya iko bo bereimu i Ananias nasintuvu nombabagiu Nosa Gasa nu Alatala? Epemo! Tona nombatana bereimu, dako nanjili lako ri dayo. Iko muni rakenira hau ratana ri savalikuna!"

¹⁰ Nangepe tesa haitu, nadunggamo i Safira bo kaliu-liu namate ri ngayo i Petrus. Tempo kabilasa-kabilasa pangane nesua, nikavara i Safira namate munimo. Bo nikenira karobatana hau ri savalikuna bo nitanara ri sinjori dayo bereina i Ananias.

¹¹ Nangepe kajadia haitu, naeka puramo topomparasaya i Yesus bo tona ntanina muni.

¹² Nadea mpuu kabaraka bo tanda-tanda nipokumaaka nipovia nu suro-suro ri mata ntodea. Bo topangoseaka i Yesus nosangu rara nasiromu ri Banua nu Alatala ri Tambale Magau Salomo.

¹³ Tona ntanina anu ledo nomparasaya i Yesus ledo nabia nakava masiromu ante ira, tapi naupa ivesia, topomparasaya gahaitu mpuu-mpuu nipakaoge ntodea.

¹⁴ Kasae-sae katambai-mbai kadea ntopangoseaka i Yesus, langgai bo mombine.

¹⁵ Nanggita kabaraka-kabaraka nipovia nu suro-suro, nadea tona nadua nikeni ante paturu bara ante ompa bo nituu ri dala. Apa nisarumakara ane moliu i Petrus ngena, nau aga vayona mambela sakide, mabelomo ira.

¹⁶ Noumbe-umbe tona nakava lako ri ngata-ngata napara Yerusalem nanggeni tona nadua bo tona nipesua *seta. Bo pura-pura tona haitu nipakabeloramo.

¹⁷ Kaupuna Pakeni *nTopanggeni Pesomba ante roa-roana anu nangoseaka pepatuduki *ntoSaduki, nasiriatimo nanggita kadea ntona nomparasaya i Yesus. Jadi ira nompamula nompandasa suro-suro i Yesus.

¹⁸ Nisakara suro-suro, bo nisuarakara riara ntarunggu ngata.

¹⁹ Tapi bongina haitu saito *malaeka nu Alatala nombaungge vamba-vamba ntarunggu bo nanggeni suro-suro hau ri savalikuna. Nanguli ia,

²⁰ "Koimo, peangga ri doyata Banua nu Alatala bo patolelemo ka todea kareba katuvu nabaru."

²¹ Naupu nangepe tesa haitu, hau mpuumo suro-suro nanturusi anu niuli nu malaeka ka ira. Nasadondo mpuu ira hau ri doyata Banua nu Alatala bo nompamulamo nompatuduki tona ri sia. Tempo haitu Pakeni nTopanggeni Pesomba ante roa-roana nompokio pura-pura pakeni-pakeni *ntoYahudi masiromu ri Polibu Mbaso Agama. Nitudura tona hau mangala suro-suro lako ri tarunggu, rakeni ratangara ri ngayora.

²² Tempo tona nitudu haitu nakava ri tarunggu, ledo nikavara suro-suro ri sia. Jadi nanjilimo ira hau manguli ka *toPolibu Mbaso Agama.

²³ Niulira, "Nakavapa kami ri tarunggu, nikita kami vamba ntarunggu niupi bo nigunji pakabelo-belo bo topojaga-topojaga naria pura ri vamba. Tapi tempo kami nombaungge vamba haitu, ledo ria saitoa tona nikava kami riarana."

²⁴ Nangepe tesa haitu, pakeni ntopojaga Banua nu Alatala bo *balengga-balengga ntopanggeni pesomba, naingu mpuu rarara nompekirika anu najadi ante suro-suro, bo naeka nompekirika anu majadi ngena.

²⁵ Dopa nasae, nakavamo saito langgai nanguli ka ira, "Epe vei! Tona nisuarakamiu riara ntarunggu, hitupa nompatuduki todea ri Banua nu Alatalamo!"

²⁶ Nangepe tesa haitu, pakeni ntopojaga Banua nu Alatala ante pura-pura roana hau nialara mpanjili suro-suro. Tapi ledo niduasira, apa naeka ira ka todea. Niulira bara rarempe ntodea ante vatu ira ane raduasira suro-suro.

²⁷ Suro-suro nikenira nesua nantingayo Polibu Mbaso. Pade Pakeni nTopanggeni Pesomba nomparesa ira, ivei:

²⁸ "Komiu nitagi kami bara ipia, nee mpuu mompatolele pepatuduki i Yesus. Tapi nuapa nipoviamiu? Komiu aga nompatolele pepatuduki haitu ri njumangu ngata Yerusalem, bo niulimiu muni, i Yesus haitu namate nipatesi kami!"

²⁹ Nesana i Petrus bo suro-suro ntanina, "Kami kana mangoseaka parenta nu Alatala, bo ledo parenta nu manusia.

³⁰ Komiu nantudu tona nompatesi i Yesus nombapaku Ia ri kayu salib. Tapi Alatala anu nisomba ntotuata nggaulu, Iamo nompakatuvu i Yesus mpanjili lako ri kamateNa.

³¹ Bo Alatala nompakaoge i Yesus bo nipoponturoNa Ia ri sabingga ngganaNa, bo nidekeiNa ka Ia kuasa momparenta bo mompakasalama kita, ala kita *toIsrael radekei loga majea lako ri dosa-dosata bo raampungi.

³² Kamimo hii sabina pura-pura kajadia haitu, kami bo Nosa Gasa anu nidekei nu Alatala ka pura-pura topangoseaka parentaNa."

³³ Nangepe tesa-tesa nu suro-suro, nadua mpuu rara ntoPolibu Mbaso, sampe ira nasintuvu mompatesi suro-suro haitu.

³⁴ Tapi riara Polibu Mbaso naria saito *toFarisi nosanga i Gamaliel. Ia guru agama mpuu-mpuu nipakaoge ntodea. Ia neangga bo nantudu tona manggeni suro-suro mesuvu ri savalikuna sampalai ala ledo raepera tesana.

³⁵ Naupu haitu niulikana ka toPolibu Mbaso haitu, ivei: "Sampesuvu-sampesuvuku toIsrael! Kita kana mompekiri pakabelo-belo anu rapoviata ka tona hitu,

³⁶ apa bara sako-mpae naliu neumba i Teudas. Pangulina ia tona nabaraka sampe nitasere pataatu tona nangoseaka ia. Tapi ia muni nipatesi bo pura-pura topangoseaka ia nasimpotare.

³⁷ Naupu haitu, tempo nitulisi pura-pura sanga ntona riara buku sensus, neumba munimo i Yudas, tona lako ri bagia Galilea. Ia muni nompadidi todea nangoseaka ia. Tapi ia muni nipatesi bo pura-pura topangoseaka ia muni nagaro.

³⁸ Sabana haitu, kuuli ka komiu, nee rakuya-kuyamiu topangoseaka i Yesus hitu. Palambamo ira, sabana ane pepatudukira bo anu nipoviara aga nopuna lako ri manusia, tantu maopo ngena.

³⁹ Tapi ane pepatudukira bo anu nipoviara nopuna lako nte Alatala, ledo rapakuleta mombadagi ira. Ledo aga haitu! Nee sampe kita mangeva Alatala!" Naupu toPolibu Mbaso nangepe tesa i Gamaliel, nitarimaramo tesana.

⁴⁰ Bo nipokiora suro-suro mesua mpanjili. Nakava ri sia, suro-suro haitu niporo pade nitagi vai: "Tumo mompatuduki kareba i Yesus ka tona!" Naupu sia pade nikabasakamo.

⁴¹ Suro-suro nompalaisi Polibu haitu bo nadamba mpuu rarara sabana ira nireke nu Alatala masipato mombarasai kasusa bo kapari sabana pangoseakara i Yesus.

⁴² Bo eo-eo ri Banua nu Alatala bo muni ri banua-banua ntona, ira nompatolele Kareba Belo bo nompatuduki ka tona i Yesusmo Magau Topepakasalama anu nijanji nu Alatala.

Kisah Para Rasul

Video Kisah Para Rasul 05

Ikuti Kami:

KONTAK | PARTISIPASI | DONASI