Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali i Yesu pasi kami to anaguruNya malinja-linja ndate Yerusalem. Tempo etu kami mangkita samba’a tau to buta yami yako ri kare’enya.
2 Wali kami to anaguru i Yesu mampotanaka resi Ia, kami manganto’o, “Pa’a Guru, i sema to nangika dosa naka pei tau si’i buta yami yako ri kare’enya? Bara ia semo nangika dosa, bara tau tu’anya?”
3 Wali i Yesu mangansono, Ia manganto’o, “Naka pei tau si’i buta, si’a apa ia re’e mangika dosa. Pasi si’a seja apa saba tau tu’anya nangika dosa. Naka pei ia buta see tau boros damangkita palaong to danaika i mPue Allah resi ia.
4 Tempo si’i raporapaka ewa bae eo, apa ane bae eo tau nakoto mapalaong. See naka to tao-tao kita mangika palaong i mPue Allah to nampokau Aku tempo kita tiroowa mangkoto mangika. Apa darata temponya kita tamo maya mangika palaong ri lino si’i. Tempo etu raporapaka ewa raya mburi, apa ane ri raya mburi tau tamo maya mapalaong.
5 Wali tempo Aku re’ewa ri lino si’i, Aku semo to ewa pansona to mampakaremeka to lino jaya to monso.”
6 Wali ojo karoonya i Yesu manganto’o gombo etu, Ia mayua ngeruNya ri tana panewa ngeru etu igalokaNya tana see mawali gege. Panewa roo see Ia mangoko gege etu pei mampalasika ri mata ntau buta etu.
7 Yako etu Ia manganto’oka ngkai etu, “Inta pando’u njo’u limbo to rato’oka Siloam.” (Siloam etu batuanginya ‘Rapokau.’) Wali ngkai buta etu ia yau njo’u limbo etu pei mando’u nja’u ria. Panewa tempo ia mampiyaika muni limbo etu dayau muni njo’u banuanya, tempo etu ia mangkitamo rao.
8 Wali yununya to samba’a lipu mangkita ia tempo ia yau muni. Pasi tau to yusa mangkita seja ia. Tau etu tempo ruyu mananya mangkita ngkai etu mamporapi doi resi tau apa ia buta, tare yusa jaya damangarata doi. Wali tau to mangkita ia tempo ia yau muni etu, sira manganto’o, “Bara si’anya ngkai si’i to tempo ruyu biasa matunda-tunda mamporapi doi resi tau?”
9 Wali re’e tau to manganto’o, “Ia semo.” Pei re’e wo’u tau to manganto’o, “Si’anya. Ia ojo sewaju ta’anya ewa ngkai si’i.” Pei ngkai to owo room rapakatao matanya etu, ia manganto’o, “Monso kojo aku semo tau to nuto’o ngkomi etu.”
10 Wali sira mampotanaka resi ia, “Kesaa to mawali resi korom naka pei korom maya mangkita rao?”
11 Ngkai etu mangansono, “Tau to rato’oka i Yesu, Ia re’e mangika gege yako ri ngeruNya pei mampalasika ri matangku. Panewa roo see Ia manganto’oka aku, ‘Inta pando’u njo’u limbo to rato’oka Siloam.’ Wali aku yau mando’u njo’u ria, panewa aku maya mangkita rao.”
12 Wali ojo karoonya ngkai etu manganto’o anu to mawali resi ia, yununya etu mampotanaka, “Imbare tau to nampakatao korom etu?” Pei ngkai etu manganto’o, “Taa kunsani.”
13 Wali tempo i Yesu mayua ngeruNya ri tana panewa ngeru etu igalokaNya tana see mawali gege, roo see gege etu ipalasikaNya ri mata ntau buta, tempo pangikaNya palaong to etu kono ri Eo Rapandoo. Wali yunu ngkai to rapakatao matanya to buta etu mangkeni ia resi to Yahudi to aliran Parisi.
14 (9:13)
15 Rata nja’u si sira, to Yahudi to aliran Parisi mampotanaka seja resi ngkai etu, sira manganto’o, “Kesaa to mawali resi korom naka pei korom mangkita seja rao ri tempo si’i?” Wali ngkai etu manganto’o, “Tau to sanganya i Yesu, Ia nampalasika gege ri matangku, roo see aku mando’u, panewa ojo karoonya aku mando’u etu aku mansaka mangkitamo rao.”
16 Wali re’e to Yahudi to aliran Parisi etu to manganto’o, “Tau to nangika palaong to etu si’a napokau i mPue Allah, apa Ia taa mampalaika porenta to manganto’o ne’e mapalaong ri Eo Rapandoo. Wali Ia ojo tau madosa semo.” Pei re’e seja sira to manganto’o, “Tau etu taa mangika dosa. Apa ane tau madosa taa nakoto mangika palaong to taa rapobiasa to ewa wetu.” Wali to Yahudi to aliran Parisi etu masimpayu raya nsira.
17 See naka sira mampotanaka wo’u resi ngkai to rapakatao matanya etu, sira manganto’o, “Korom semo to napakatao ntau etu matamu, wali wimba panto’o ngkorom mangkonong Ia?” Wali ngkai etu mangansono, to’onya, “Ane ewa pampobuuka to si aku, tau etu to pantuntu tuntu i mPue Allah semo.”
18 Pei re’e kepala-kepala nto Yahudi to taa rani mangaya monso pu’u ngkai etu buta tempo ruyu pei owo roo rapakatao matanya see naka mangkita seja rao. Wali sira mampokau tau yau mampokio tau tu’a ngkai etu.
19 Panewa ojo karata ntau tu’anya, to Yahudi etu mampotanaka resi sira dua, sira manganto’o, “Wimba, bara si’i semo ana ngkomi to nuto’o ngkomi ia buta yami yako ri kare’enya? Ane ewa see, kesaa mawali naka pei ia nakitamo rao?”
20 Wali tau tu’a ngkai etu manganto’o, “Monso pu’u ngkai etu ana mami, pasi monso seja ia buta yami yako ri kare’enya.
21 Pei kami taa kunsani kesaa mawali naka pei ia maya mangkita rao ri tempo si’i. Pasi kami taa seja kunsani bara sema to nampakatao matanya. Patanaka resi ia semo. Apa ia baemo, wali ia nansani mangansono.”
22 Naka pei tau tu’a ngkai etu manganto’o ewa wetu apa sira meka resi kepala-kepala nto Yahudi etu. Apa sira mangansani kepala-kepala etu roomo manganto’o i sema tau to mampatimonso i Yesu Ia Kerisitu, Makole parajanji i mPue Allah, tau etu tamo darabiaka damasua ri banua napampotunde nsira.
23 See naka tau tu’a ngkai etu manganto’o, “Ia baemo, wali patanaka resi ia.”
24 Wali kepala-kepala nto Yahudi etu mampokio wo’u kadua ngkaninya tau to buta tempo ruyu etu. Sira manganto’oka ia, “I Pue Allah semo matamanasamu, wali to’o gombo to monso. Barong Ia, ne’e rabarong i Yesu etu apa kami mangansani Ia tau madosa.”
25 Wali ngkai etu manganto’o, “Aku taa kunsani Ia bara tau madosa, bara taa. Ojo si’i to kunsani: Tempo ruyu aku buta, pei tempo si’i aku mangkita seja rao!”
26 Wali kepala-kepala etu mampotanaka wo’u resi ia, sira manganto’o, “Kesaa inika ngkai etu resi korom? Wimba inikaNya mampakatao matamu?”
27 Pei ngkai etu manganto’o, “Aku roomo manganto’oka komi, pei komi taa rani mampodongeka. Wali maka pei komi rani mangandonge wo’u? Wimba, komi bara rani seja mawali anaguruNya?”
28 Wali ojo pangandonge nsira gombo ngkai etu, sira mangkaengas ia, sira manganto’o, “Korom semo anaguru ngkai etu! Pei ane kami, kami anaguru i Musa!
29 Kami mangansani i Pue Allah re’e magombo resi i Musa tempo owi. Pei ane ngkai etu, sakowa yako imbare kama’iNya kami taa mangansani.”
30 Wali ngkai to rapakatao matanya etu manganto’oka sira, “Gete, ipu kojo rayangku mangandonge gombo ngkomi etu! Ia re’e kuasa mampakatao matangku, pei nempo ewa wetu komi taa mangansani yako imbare kama’iNya.
31 Kita tansani i Pue Allah taa mampodongeka tau to madosa. Pei Ia mampodongeka tau to mampue mampakabae Ia pasi to mangaluluka pamporani to si Ia.
32 Wali yako ri tempo lino si’i rapapowali, tawa re’e radonge mangkonong tau to mampakatao mata ntau to buta yami yako ri kare’enya.
33 See naka tau to nampakatao matangku etu matantu Ia yako resi i Pue Allah semo apa ane rapanya si’a yako resi i Pue Allah, tare palaong to ewa wetu to Ia maya mangika.”
34 Wali kepala-kepala nto Yahudi etu manganto’o, “Gete, bae kojo dosa ngkorom yako ri kare’emu! Taa masipato korom mampotunde kami!” Wali ojo panganto’o nsira gombo etu, sira mangarubak ngkai etu yako ri raya banua napampotunde nsira.
35 Wali i Yesu mangandonge kareba mangkonong ewa wimba naika ngkepala-kepala etu mangarubak ngkai etu. See naka Ia yau mangaliwu ngkai etu. Ojo pangarata i Yesu ngkai etu, i Yesu mampotanaka resi ia, to’oNya, “Wimba, korom bara mangaya i Wiyaa nto Lino?”
36 Wali ngkai etu manganto’o, “I sema kamonsonya Ia, Pa’a? To’oka aku see aku maya mangaya Ia.”
37 Wali i Yesu manganto’o, “Korom room mangkita Ia, apa Aku to mampogomboka korom si’i-si’i, Aku semo Ia.”
38 Wali ngkai etu manganto’oka i Yesu, “Pue, aku mangaya Komi.” Panewa ia mambokotu ri tango i Yesu pei mampue mampakabae Ia.
39 Wali i Yesu manganto’o, “Naka pei Aku ma’i ri lino si’i, ma’i resi tau to taa mangansani i Pue Allah, to raporapaka ewa tau to buta. Wali Aku damampakanasaka tau etu anu to monso mangkonong i Pue Allah see sira maya mawali ewa tau to rapakatao matanya. Pasi Aku ma’i seja resi tau to ojo mampoanika sira mangansani i Pue Allah, damampakanasaka tau etu kamonsonya sira taa kojo mangansani Ia see naka sira ewa tau to buta. Wali tau to taa rani mangansani anu to monso mangkonong i Pue Allah, tau etu masipato rahuku.”
40 Wali tempo i Yesu manganto’o gombo etu, re’e to Yahudi to aliran Parisi to nja’u seja, sira mangandonge. Wali sira mampotanaka resi Ia, sira manganto’o, “Wimba, ane ewa pampubuuka ngKorom, kami seja tau buta?”
41 I Yesu mangansono, “Taa, apa ane rapanya komi monso pu’u ewa tau buta, batuanginya komi tawa mangansani anu to monso yako resi i Pue Allah, ane ewa see, taa masipato manganto’o komi mangewa anu to monso etu. Pei komi mampoanika mangansani anu to monso etu, wali see naka masipato manganto’o komi sala apa komi bo’omu mangalulu anu to monso etu.” Ewa wetu nato’o i Yesu mangansono to Yahudi to aliran Parisi etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA