Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nararěnnạ samurin ene Mawu Yesus dimakị sol᷊ong paị sěmběkan Danong Galilea, kụ isẹ̌sẹ̌bạ lai Danon Tiberias.

² Narěntạe sene, tangu kai piạ gapaěngu taumata mal᷊awọ timol᷊e si Sie, u i sire nạung seng bọu makạsilo hal᷊ẹ̌ makạdal᷊inaụ kẹ̌koateng'E makạpia masasakị.

³ Mawu Yesus simakạe sol᷊ong bul᷊ude, mase naiangke ringangu manga murit'E.

⁴ Su tempo ene kai maraning Ěllon Sal᷊imbangu Paskang Yahudi e.

⁵ Piạ e Mawu Yesus mạmanda kaihi-koaneng mạngělikụe, i Sie nakasilọ e si sire měgẹ̌gapaěng nahunděnta su anun'E. Ene i Sie nẹ̌berạ e si Filipus, "Suapa ngae i kitẹ makapamělli kaěng, tadeạu i sire kěbị e makakaěng?"

⁶ (Mawu Yesus seng masingkạ apa sarung koateng'E, kai i Sie něhengetang kerene, ute kai manal᷊ukạ si Filipus.)

⁷ I Filipusẹ̌ e simimbang, "Borotẹ̌ arẹ̌gang dua hasụ su kal᷊ěpane roitẹ̌ sal᷊aka e tawe makakaěng baug'i sire ini, manilaing i sire kětạeng mahiạu pẹ̌kadodọ."

⁸ Sěngkatau wọu tal᷊oaran murit'u Mawu Yesus wal᷊ine kụ arenge i Andreas, anạ u sěmbaụ i Simon Petrus nẹ̌bera,

⁹ "Ěndaung piạ dariọ esẹ sěngkatau, sinasạe borotẹ̌ limambaụ dingangu kinạ duambua. Kai apa wue něnggạe waugu taumata kakěpal᷊e kere ini?"

¹⁰ "Apakaiangko i sire," ungkuěngu Mawu Yesus. Su tampạ ene piạ děmpugẹ̌ masuwenehẹ̌, kụ i sire naiangke su rěmpugẹ̌ ene -- kal᷊awọe piạ u manga l᷊ima hiwu su kataune esẹ.

¹¹ Bọu ene Mawu Yesus něngal᷊ạe borotẹ̌ ene mase nakitarimakasẹ su Mawu Ruata. Bọu e i Sie nẹ̌papahiạen borotẹ̌ ene su taumata l᷊awọ. Mase i Sie nẹ̌papahiạen kinạ ene, kụ i sire nahungkaěngke nẹ̌batụ lehẹ i sire.

¹² Sarạeng seng něngkal᷊aedẹ̌, Mawu Yesus něhengetang su manga murit'E, "Komol᷊ẹ̌ko manga lěmbeng kaěng ene; kumbahangbe piạ u magholọ."

¹³ Mase i sire něngomol᷊ẹ̌ mapul᷊o dua su patangane napenẹ kal᷊awọe lěmbeng kaěng bọu borotẹ̌ limambaụ kụ nịkakaěngu taumata l᷊awọ e.

¹⁴ Sarạeng i sire nakasilo hal᷊ẹ̌ makạdal᷊inaụ nikoạ u Mawu Yesus, i sire nẹ̌bera, "Těngadẹ̌, ini e kai nabi lẹ̌harapeng duměnta su dunia!"

¹⁵ Mawu Yesus e masingkạ u i sire riměnta tadeạu manihasan Sie makoạ datun sire. Batụu ene natamaị e i Sie něnggeang sol᷊ong tampạ bawul᷊urange.

¹⁶ Sarạeng seng kakạhěbine, manga murit'u Mawu Yesus e němpẹ̌děsungke sol᷊ong dano e.

¹⁷ Mase i sire němpẹ̌sake sakaeng kụ němpẹ̌lẹ̌bạ dano ene, nětimona Kapernaum. Ěllo e seng marěndung kai Mawu Yesus wẹ̌dang tawe nạděnta su anung sire.

¹⁸ Kutẹu rano e nanětạ e nẹ̌kal᷊itota kahiạen kaihạ u anging.

¹⁹ Sarạeng nẹ̌sakaeng mangạe lima arau ěnnungu kilo meterẹ̌ kal᷊aude, i sire nakasilọ e Mawu Yesus kạdal᷊enge su wowong akẹ, lụhaung sakaeng i sire. I sire něngkatakụe.

²⁰ Arawe Mawu Yesus e kawe něhengetang si sire, "Abe kěngkatakụ, kai Iạ ěndaunge!"

²¹ Mase ringangben naung mal᷊uasẹ̌ i sire něnarimạ i Sie simake su sakaeng, kụ su tempo ene lai sakaeng i sire nahumpạ u tẹ̌timonaěng.

²² Sěngkariọěllone taumata l᷊awọ kụ bẹ̌dang ene su sěmběkang dano e, nakahěngangu wuhu-wuhu e kětạeng sěnggẹ̌sa sakaeng sene. I sire masingkạ u manga murit'u Mawu Yesus e seng nẹ̌buạ su sakaeng ene, arawe Mawu Yesus e tawe natol᷊e.

²³ Samuring ene piạ e sakaeng pirang gẹ̌sa wọu Tiberias natul᷊i kụ němal᷊ango marěduhu tampạ kụ piạ taumata l᷊awọ e mạhungkaěng borotẹ̌ bọu nịal᷊amateng u Mawu.

²⁴ Piạ e taumata l᷊awọ nakasilọ e u Mawu Yesus dingangu manga murit'E tawẹ dise sene, tangu i sire němpẹ̌sakẹ e manga sakaeng ene kụ něngkakoạ sol᷊ong Kapernaum němpẹ̌deạ Mawu Yesus.

²⁵ Piạ e manga taumata ene nẹ̌sombangu Mawu Yesus su sěmběkang dano e, i sire nakiwal᷊o si Sie, "Tuang Guru, kạnge i Tuang nahumpạ sini?"

²⁶ Mawu Yesus simimbang, "Mambeng kahěngang i kamene mědẹ̌deạ si Siạ bal᷊inewe ual᷊ingu i kamene seng nakaěnna timonan manga hal᷊ẹ̌ makạdal᷊inaụ Takụ nikoạ, kaiso ual᷊ingu i kamene seng bọu němpẹ̌kaěng borotẹ̌ sarang něngkal᷊aedẹ̌.

²⁷ Abe pěmpamunara waụgu makaěbạ kaěng kụ mạsue ringangu mạbuhụ. Pěmpamunarako waụgu makahombang kaěng ta mawawuhụ dingangu makarěntang pẹ̌bawiahẹ̌ tutune ringangu kakalẹ̌. Kaěng ene e sarungbe ionggọ u Ahus'u Taumata si kamene, batụu i Sie seng niakun Duata Amang."

²⁸ Mase i sire nakiwal᷊o si Sie, "Kai apa harusẹ̌ koateng i kami tadeạu mẹ̌tatahino su kapulun Duata e?"

²⁹ Mawu Yesus e simimbang, "Kai ini e ikěkapulun Duata wọu i kamene: pangimangke si Sie kụ seng niroloh'u Ruata."

³⁰ "Kamageng kerene," ungkuěng i sire, "apa wue tatialane ikaonggọ i Tuang tadeạu i kami makasilo ringangu mangimang si Tuang? Apa wue kụ sarung koateng i Tuang?

³¹ Manga i upung i kami e němpẹ̌kaěng manna su wanua tạ taune, kere mạbawohẹ su ral᷊ungu Winohẹ Susi, 'I Sie napakaěng i sire borotẹ̌ bọu sorga.'"

³² Mase Mawu Yesus e něhengetang si sire, "Pěmpangimangke: Bal᷊inewe i Musa, kaiso kawe i Amang-Ku e nangonggọu borotẹ̌ tutune wọu sorga si kamene.

³³ Batụu borotẹ̌ kụ nionggọ u Ruata e ute kai i Sie kụ seng limintụ bọu sorga kụ mangonggọ u pẹ̌bawiahẹ̌ baụgu taumata su dunia."

³⁴ "Tuang," ungkuěng i sire, "onggol᷊eko i kami borotẹ̌ ene sěntiniạ."

³⁵ "Kai Iạ e borotẹ̌ makarěntang pẹ̌bawiahẹ̌," ungkuěng u Mawu Yesus si sire. "I sain duměnta su anu-Ku mang seng ta mahutung sarang karěngụe. Dingangu i sai kụ mangimang si Siạ e semben tawe marou sarang marěngụ-děngụ.

³⁶ Kai kerẹewe seng Takụ nipẹ̌bera si kamene, maningbe i kamene seng bọu nakasilo si Siạ, kai i kamene mang tawe mangimang.

³⁷ Kal᷊awọu taumata seng nionggọ i Amang si Siạ sarung mahunděnta su anu-Ku. Iạ e tawe mẹ̌binsị i sai-sai ruměnta su anu-Ku.

³⁸ Batụu Iạ e limintụ bọu sorga e, wal᷊inewe waụgu mẹ̌koạ kapulu-Ku sẹ̌saku, kaiso kawe kapulun Sie něndoloh'u Iạ.

³⁹ Kụ kai ini kapulun Sie něndoloh'u Iạ e: Tadeạu wọu kěbị taumata kụ seng nisarakang si Siạ, tawẹu sarang sěngkatau mailang; kaiso kawe tadeạu Iạ mapẹ̌bangung i sire su Ěllong Kiamatẹ̌.

⁴⁰ Kụ ini e mambeng kapulun Amangku kahěngang: Tadeạu kěbị apan seng nakasilo Ahusẹ̌ kụ mangimang si Sie, mạnaghuang pẹ̌bawiahẹ̌ tutune ringangu kakalẹ̌, kụ Takụ ipẹ̌biahẹ̌ kapia su Ěllong Kiamatẹ̌."

⁴¹ Apạewen tau Yahudi nanětạ e němpẹ̌galundung su Mawu Yesus, batụu i Sie nẹ̌bera u: "Kai Iạ e borotẹ̌ natěntung bọu sorga."

⁴² I sire němpẹ̌bera, "Karạ i Yesus ini e kawe anạ i Yusup? I kami masingkạu inang-iamang'E! Kereapa wue i Sie wahani nẹ̌bera u i Sie natěntung bọu sorga?"

⁴³ Mase Mawu Yesus něhengetang si sire, "Abe pěmpẹ̌galundung.

⁴⁴ Tawẹu sarang sěngkatau makakarěnta su anu-Ku, kereu i Amang něndoloh'u Iạ e tawe mẹ̌bawa si sie su anu-Ku, dingangu i sain duměnta, sarung takụ ipẹ̌bangung su Ěllong Kiamatẹ̌.

⁴⁵ Su ral᷊ungu bukẹ̌ u manga nabi kạbawohẹ kere ini: 'Kěbị taumata e sarung těntiroěngu Mawu Ruata.' Kụ kěbị taumata apang dụdaringihẹ̌ si Amang dingangu mạngěndung bọ'i Sie, ruměnta su anu-Ku.

⁴⁶ Kụ ene wal᷊inewe mạul᷊ịu mangal᷊ene seng piạu wọu nakasilo si Amang. Kětạeng i Sie riměnta wọu anun Duata e seng nakasilo si Amang.

⁴⁷ Kěngkasingkạko: Taumata maimange kai mạnaghuang pẹ̌bawiahẹ̌ tutune ringangu kakalẹ̌.

⁴⁸ Kai Iạ e borotẹ̌ makạděntang pẹ̌bawiahẹ̌.

⁴⁹ I upung i kamene kimaěng manna su wanua l᷊inggi, kai i sire mal᷊aing nate.

⁵⁰ Kai wal᷊ine kerene su borotẹ̌ kụ natěntung bọu sorga; i saing kumaěng borotẹ̌ ene semben tawe mate.

⁵¹ Kai Iạ e borotẹ̌ natěntung bọu sorga -- borotẹ̌ kụ makạděntang pẹ̌bawiahẹ̌. I saing kumaěng borotẹ̌ ini sarung mẹ̌biahẹ̌ sarang karěngụe. Borotẹ̌ kụ sarung Takụ ionggọ baụgu pẹ̌bawiah'u taumata su dunia e ute kai ghẹ̌si-Ku."

⁵² Sarang nakaringihẹ̌ ene tau Yahudi němpẹ̌darendehẹ̌ lawọ i sire, "Kereapa wue tau ini mangonggọu ghẹ̌sin'E si kitẹ ipakikinạ?" angkuěng i sire.

⁵³ Mase Mawu Yesus něhengetang si sire, "Pangimangke: Kereu i kamene tawe kuminạ gẹ̌sin Ahus'u Taumata e ringangu tawe manginung dahan'E, i kamene mambeng kahěnga-hěngang tawe makaěbạ pẹ̌bawiahẹ̌.

⁵⁴ I saing kuminạ gẹ̌si-Ku ringangu manginung daha-Ku e managhuang pẹ̌bawiahẹ̌ tutune ringangu kakalẹ̌, dingangu Takụ ipẹ̌bangung su Ěllong Kiamatẹ̌.

⁵⁵ U ghẹ̌si-Ku e mamben kaěng kahěngang, dingangu raha-Ku e mambeng inumang kahěngang.

⁵⁶ I saing kụkinạ gẹ̌si-Ku ringangu mạnginung daha-Ku, mang tatapẹ̌ masěmbaụ dingang-Ku, kụ Iạ e masěmbau dingange.

⁵⁷ I Amang kụ biahẹ̌ ene, něndoloh'u Iạ dingangu Iạ mal᷊aing nẹ̌biahẹ̌ bọ'i Amang. Kerene lai i saing kuminạ gẹ̌si-Ku sarung mẹ̌biahẹ̌ bọu Iạ.

⁵⁸ Kai ini e borotẹ̌ natěntung bọu sorga: bal᷊inewe borotẹ̌ kere nikaěng i upung i kamene. Kai sarạeng kimaěng borotẹ̌ ene, i sire e mal᷊aing nate. Arawe i saing kimaěng borotẹ̌ ini sarung mẹ̌biahẹ̌ sarang karěngụ e."

⁵⁹ Kěbị ene piněhengetang u Mawu Yesus piạ i Sie mạněntiro su wal᷊em pẹ̌kakal᷊iomanengang su Kapernaum.

⁶⁰ Sarạeng bọu nakaringihẹ̌ apang hengetangu Mawu Yesus e, lawọ bọu tal᷊oarang manga murit'E němpẹ̌bera u, "Těntiro ini tumanịu mawěhạ. I sai wue makatarimạ!"

⁶¹ Mawu Yesus sẹ̌sane masingkạ u manga murit'E měmpẹ̌sẹ̌singuhutangu hal᷊ẹ̌ ene. Tangu i Sie nẹ̌berạ e, "Apa i kamene kawe niměnggạ u manga wawera ene?

⁶² Kai makoạ kereapa mạeng i kamene makasilo Ahus'u Taumata e mahengkẹ kapia sol᷊ong tampạ e nạung kal᷊amona?

⁶³ Kụ makạbiahẹ̌ taumata kai Rohkẹ̌ u Ruata. Katatoghas'u taumata e mambeng tawẹ gunane. Manga wawera kụ Takụ pinẹ̌bera si kamene kanini ute kai manga wawerang Rohkẹ̌ u Ruata kụ kai manga wawera makạděntang pẹ̌bawiahẹ̌.

⁶⁴ Kaiso mal᷊aing piạ sutal᷊oarang kamene kụ tawe mangimang." (Mawu Yesus e seng masingkạ dokeng bọu tětạe kai i sai-sai tawe mapulu mangimang, dingangu i sai kụ sarung mẹ̌sunial᷊'i Sie.)

⁶⁵ Mase Mawu Yesus něhengetang kapia, "Kai ual᷊ingu ene hakịu Iạ mělẹ̌habarẹ̌ si kamene u tawẹu sarang sěngkatau makakarěnta su anu-Ku, kereu i Amang e tawe mapakawala."

⁶⁶ Nanětạ bọu orasẹ̌ ene mal᷊awọ bọu manga murit'E němpaněntang i Sie, kụ seng tawe lai mapulu tumol᷊e si Sie.

⁶⁷ Mase Mawu Yesus e nakiwal᷊ọe su manga murit'E si sire mapul᷊o dua e, "Apa i kamene mal᷊aing mapulu měmpaněntangu Iạ e?"

⁶⁸ "Mawu," ungkuěng i Simon Petrus si Sie, "kụ kai sol᷊ong anung i sai tangu i kami e? Hengetangu Mawu e kai makạděntang pẹ̌bawiahẹ̌ tutune ringangu kakalẹ̌.

⁶⁹ I kami e seng nangimang dingangu nangiaking u kai i Kau Mawu e rarolohang susi wọu anun Duata."

⁷⁰ Mawu Yesus simimbang, "Karạ kawe Iạ namile si kamene mapul᷊o dua ini e? Sěmbal᷊iau sěngkatau wọu tal᷊oarang kamene kai setang!"

⁷¹ Kụ itẹ̌timonang Mawu Yesus e ute kai i Yudas anạ i Simon Iskariot. Batụu manilaing i Yudas sěngkatau wọ'i sire mapul᷊o dua murit'u Mawu Yesus e, i sie sarung mẹ̌sunial᷊'u Mawu Yesus.

Yohanes

Video Yohanes 6

Ikuti Kami:

KONTAK | PARTISIPASI | DONASI