Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun nike karing sekali Deside Isa nyatayang diriq lẽq pengiring-pengiring-Ne lẽq Danao Tiberias. Maraq niki kejarianne:

² Lẽq sopoq jelo Simon Petrus, Tomas saq tesebut Didimus, Natanael lẽman Kana lẽq Galilea, bije-bije Zebedeus, dait due pengiring Deside Isa saq lainne, kenyeke bekumpul.

³ Basen Simon Petrus lẽq ie pade, "Tiang mẽlẽ lalo bau empaq." "Tiang pade milu," basen ie pade lẽq Petrus. Beterus ie pade lumbar taẽk perau. Laguq sekeleman nike ie pade ndẽq bau napi-napi.

⁴ Sewaktu tiwoq jelo, Deside Isa ngadeg lẽq pesisi, laguq ie pade ndẽq tandaq bahwe nike Deside Isa.

⁵ Deside Isa bemanik lẽq ie pade, "Kanak-kanak, napi side pade bedowẽ empaq?" "Nẽnten," jawab ie pade.

⁶ Deside Isa bemanik lẽq ie pade, "Saut jaringde ojok sedi kanan perau, laun side pade gen mauq empaq." Terus ie pade saut jaringne, laguq ie pade ndẽq bau antuq malik lantaran luwẽq gati empaq lẽq dalemne.

⁷ Pengiring saq tekasihin siq Deside Isa bebadaq lẽq Petrus, "Nike Junjungan Saq Mulie!" Sewaktu Simon Petrus dengah bahwe nike Junjungan Saq Mulie, ie kadu kelambine, sẽngaq ie ndẽq kadu kelambi, terus nimproh ojok aiq.

⁸ Pengiring-pengiring saq lain dateng kadu perau, sẽngaq ie pade ndẽq jaoq lẽman darat, cume kire-kire satus mẽter doang dait ie pade antuq jaringne saq penoq siq empaq nike.

⁹ Sewaktu ie pade turun lẽman perau, ie pade serioq araq barak api areng lẽq derike dait empaq lẽq atasne kance ruti.

¹⁰ Deside Isa bemanik lẽq ie pade, "Jauq ojok deriki pire empaq saq baruq side pade bau."

¹¹ Simon Petrus taẽk ojok perau, terus antuq jaringne ojok darat. Jaring nike penoq siq empaq saq belẽq-belẽq: Selapuqne araq karobelah telu luwẽqne. Dait timaq luwẽqne maraq nike, jaringne ndẽq soẽk.

¹² Deside Isa bemanik lẽq ie pade, "Silaq bekelor." Ndẽq araq sopoq dengan juaq lẽman pengiring-pengiring-Ne saq bani metakẽn, "Pelungguh sai?" Sẽngaq ie pade nenaoq bahwe Ie Junjungan Saq Mulie.

¹³ Beterus Deside Isa ngerapetin ie pade dait bait ruti nike dait ngicanin ie pade, maraq nike ẽndah empaq nike.

¹⁴ Niki ketelu kaline Deside Isa nyatayang diriq-Ne lẽq pengiring-pengiring-Ne sesampun Ie idup malik lẽman ninggal.

¹⁵ Sesampun ie pade bekelor, Deside Isa bemanik lẽq Simon Petrus, "Simon bije Yahya, napi side lebih ngasihin Tiang lebihan lẽman ie pade?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lẽq ie, "Peliharaq dombe-dombe Tiang!"

¹⁶ Saq kedue kaline Deside Isa bemanik lẽq ie, "Simon bije Yahya, napi side ngasihin Tiang?" "Nggih, Junjungan Saq Mulie," jawab Petrus, "Pelungguh wikan tiang ngasihin Pelungguh." Deside Isa bemanik lẽq ie, "Peliharaq dombe-dombe Tiang."

¹⁷ Saq ketelu kaline Deside Isa bemanik lẽq ie, "Simon bije Yahya, napi side ngasihin Tiang?" Petrus jari asẽq sẽngaq Deside Isa bemanik lẽq ie jangke telu kali. Make Petrus bejawab malik, "Junjungan Saq Mulie, Pelungguh wikan selapuq-lapuqne. Pelungguh wikan tiang ngasihin Pelungguh!" Beterus manik Deside Isa lẽq ie, "Peliharaq dombe-dombe Tiang.

¹⁸ Tiang badaq side: Setetune sewaktu side masih bajang, side taliq kẽngde mẽsaq dait lampaq ojok mbẽ doang side mẽlẽ, laguq lamun side sampun toaq, side gen ngulurang imende dait dengan lain gen naliq side dait jauq side ojok taoq saq side ndẽq mẽlẽ."

¹⁹ (Siq ucapan-ucapan nike, Deside Isa nyatayang berembẽ Petrus gen ninggal ẽraq jari mulieang Allah.) Sesampun nike Deside Isa bemanik lẽq Petrus, "Turut Tiang!"

²⁰ Sewaktu Petrus ngẽngat, ie serioq bahwe pengiring saq tekasihin siq Deside Isa milu ẽndah. (Ie saq tokol dẽkẽt Deside Isa sewaktu medaran dait saq metakẽn lẽq Deside Isa, "Junjungan Saq Mulie, sai saq gen behianat lẽq Pelungguh?")

²¹ Sewaktu serioq ie, Petrus metakẽn lẽq Deside Isa, "Junjungan Saq Mulie, berembẽ lẽq dengan niki?"

²² Jawab Deside Isa, "Seandẽne Tiang mẽlẽ ie tetep idup jangke Tiang dateng, nike ndẽqne urusande. Laguq side, turut Tiang!"

²³ Make nyebar kabar lẽq antare pengiring-pengiring Deside Isa bahwe pengiring nike ndẽq gen ninggal. Padahal Deside Isa nẽnten bemanik bahwe pengiring nike ndẽq gen ninggal, laguq: "Seandẽne Tiang mẽlẽ ie tetep idup jangke Tiang dateng, nike ndẽqne urusande."

²⁴ Pengiring nike saq ngebẽng kesaksian mengenai peristiwe-peristiwe niki. Ie ẽndah saq sampun nulis hal niki. Dait ite nenaoq bahwe napi saq tesampẽang nike kenaq.

²⁵ Masih luwẽq hal lain saq telaksaneang siq Deside Isa. Lamun selapuqne nike tetulis sopoq-sopoq, perasaq tiang ndẽq araq taoq saq cukup lẽq seantẽro gumi jari noloq selapuq kitab saq tetulis nike.

Yohanes

Video Yohanes 21

Ikuti Kami:

KONTAK | PARTISIPASI | DONASI