Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana jareya Isa ngaton sakaleyan aggi’ e Talaga Tiberiyas ka red-moredda. Kadaddiyanna kantha reya:

² E settong are Simon Petrus, Tomas se esebbut Se Kembar, Natana’el dhari Kanna e Galilea, na’-ana’na Zebedeyus, ban moredda Isa laenna se kadhuwa, teppa’na akompol.

³ Ca’na Simon Petrus ka se laen, "Sengko’ ajala’a juko’." "Sengko’ noro’a," ca’na ca-kancana jareya. Daddi kabbi padha ongga ka paraona. Tape samalem benteng tadha’ ollena pa-apa.

⁴ E bakto are molae moncar, Isa ngadek e penggir talaga, tape red-moredda tadha’ se taowa ja’ jareya Isa.

⁵ Isa adhabu ka reng-oreng jareya, "Na’-kana’, apa ba’na andhi’ juko’?" "Tadha’," ca’na red-moredda jareya.

⁶ Dhabuna Isa ka red-moredda jareya, "Ontallagi jalana ba’na ka kanganna paraona, tanto ba’na dhaggi’ olle juko’." Jala jareya bi’ red-moredda jareya laju eontallagi; tape jala jareya ta’ ekenneng angka’ pole sabab ce’ bannya’na ollena juko’.

⁷ Mored se ekaase’e bi’ Isa jareya ngoca’ ka Petrus, "Arowa Guste Isa!" E bakto Petrus ngedhing ja’ jareya Guste Isa, pas mobu kalambina (sabab e bakto jareya Petrus ta’ akalambi), laju alonca’ ka dhalem aeng.

⁸ Red-moredda se laen nyosol ka tenggangan nompa’ parao, sambi naja’ jalana se possa’ ban juko’. Jauna paraona ta’ saapa dhari tenggangan, ra-kera pera’ saratos meter.

⁹ Saellana toron dhari paraona reng-oreng jareya nangale e jadhiya badha mardha, e attassa mardhana badha juko’na ban rotina.

¹⁰ Dhabuna Isa, "Kodda’ giba dha’ enna’ sabagiyan juko’na se gi’ buru olle ajala jareya."

¹¹ Simon Petrus ongga ka paraona, jalana laju eeret ka tenggangan. Jala jareya possa’ ban juko’ se ja-raja; kabbi badha saratos saeket tello’. Maske juko’na ce’ bannya’na kantha jareya, jalana ta’ beddha.

¹² Dhabuna Isa, "Mara kakan." Tadha’ settonga moredda se bangal atanya, "Sampeyan pasera?" Sabab red-moredda Isa jareya tao ja’ jareya Guste Isa.

¹³ Saellana jareya Isa nyander ka seddi’na red-moredda jareya, laju mondhut roti, ban magi roti jareya ka red-moredda. Juko’na epakantha jareya keya.

¹⁴ Jareya katello kaleyanna Isa ngaton ka red-moredda saellana odhi’ pole.

¹⁵ Samarema adha’ar, Isa adhabu ka Simon Petrus, "Simon ana’na Yonas, apa ba’na taresna ka Sengko’ alebbiyan dhari kataresna’anna reng-oreng laenna?" "Lerres, Guste," saodda Petrus. "Junandalem ngagali ja’ abdidalem taresna ka Junandalem." Dhabuna Isa ka Petrus, "Peyara’agi budhu’na Tang ba-dumba."

¹⁶ Kadhukaleyanna Isa mareksa ka Petrus, "Simon ana’na Yonas, apa ba’na taresna ka Sengko’?" "Lerres, Guste," saodda Petrus, "Junandalem ngagali ja’ abdidalem taresna ka Junandalem." Isa adhabu, "Peyara’agi Tang ba-dumba."

¹⁷ Katello kaleyanna Isa mareksa ka Petrus, "Simon, ana’na Yonas, apa ba’na taresna ka Sengko’?" Petrus laju arassa sossa polana Isa se mareksane aba’na sampe’ tello kale. Daddi Petrus nyaot pole, "Adhu, Guste, Junandalem ngagali sadajana. Junandalem ngagali ja’ abdidalem taresna ka Junandalem!" Isa laju adhabu pole, "Peyara’agi Tang ba-dumba.

¹⁸ Sengko’ ngoca’a sabendherra: E bakto ba’na gi’ ngodha, ba’na dibi’ masang sabbu’na, ban ajalan dha’ emma’a bai se ekakencengnge. Tape mon ba’na la towa pagi’, ba’na bakal ajuluwagiya tanangnga, ban oreng laen se nyabbu’ana ba’na ban ngaterragi ba’na ka kennengngan se ta’ eentarana ba’na."

¹⁹ (Dhabuna Isa reya noduwagi baramma pamatena Petrus e budhi are kaangguy ngagungngagi Allah.) Saellana jareya Isa adhabu ka Petrus, "Mara noro’ Sengko’!"

²⁰ Petrus atole, laju nangale’e mored se ekaase’e Isa badha e budhiyanna. (Mored jareya se toju’ e seddi’na Isa e bakto adhadha’aran ban atanya, "Guste, pasera se akiyanadana Junandalem?")

²¹ Nangale’e mored jareya, Petrus atanya ka Isa, "Guste, kadi ponapa moredda Junandalem se ka’dhinto’?"

²² Dhabuna Isa, "Ja’ sakenga bi’ Sengko’ oreng jareya epaodhi’a terros sampe’ Sengko’ dhateng, jareya banne orosanna ba’na. Tape ba’na, mara noro’!"

²³ Daddi laju balattra kabar ka red-moredda Isa ja’ moredda se settong jarowa ta’ bakal mate. Mangkana Isa ta’ adhabu ja’ mored jareya ta’ bakal mate; se edhabuwagi Isa, "Ja’ sakenga bi’ Sengko’ oreng jareya epaodhi’a terros sampe’ Sengko’ dhateng, jareya banne orosanna ba’na."

²⁴ Yahya se aberri’ kasakseyan parkara sakabbiyanna kadaddiyan jareya. Yahya jareya keya se noles parkara sakabbiyanna kadaddiyan jareya. Ban sengko’ ban ba’na tao ja’ apa se ekoca’agi jareya bendher.

²⁵ Gi’ bannya’ laenna se elampa’agi Isa. Ja’ sakenga kabbi etoles gan settong, kera sengko’ bume reya ta’ kera kabuwa’ epanyaba’i sakabbiyanna ketab se etolese sakabbiyanna se elampa’agi Isa jareya.

Yohanes

Video Yohanes 21

Ikuti Kami:

KONTAK | PARTISIPASI | DONASI