Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pangeh ineh Yésus nengegala' bururNeh sekua' teh kuan anak-anak sekola'Neh déi' Takung Tibirias. Kudeng ini lawéneh.

² Simun Pétrus, Tomas (luk titen Anak Rapid). Nataniel (rat bawang Kana déi' tana' Galilia), anak-anak Sabdi, idi dueh burur anak-anak sekola'Neh luk baken nepamung.

³ Idi keburi' Simun Pétrus nedeh, "Ui amé' ngerabat." Idi keburi'deh neneh, "Kai pana' sikal maya' namu." Idi ideh nesemuet bang alud idi nenalan; idi kareb malem ineh sebuleng pana' nateh luk ilapdeh.

⁴ Kareb aco masat Yésus netuped tangeb abpa'; iamo' anak-anak sekola' ineh na kali' Neneh Yésus.

⁵ Kebala Yésus nedeh, "O lun rurumKu, inanké lawid muyuh?" Idi kebaladeh, "Na luk idi."

⁶ Kebala Yésus nedeh, "Mepet rabat muyuh pa tinueh alud ineh, kali' rungen muyuh ngalap." Idi ideh nemepet rabatdeh, idi ideh na miak ngeruid neneh ngaceku pelaba ula' lawid.

⁷ Idi anak sekola' luk inan Yésus mawa nepebala ni Pétrus, "Ieh ineh Tuhan!" Kareb Simun Pétrus neninger idi Ieh ineh Tuhan, idi ieh nengabet kuyu'neh i awa'neh, ngaceku ieh lungu, idi ieh nubpa bang abpa'.

⁸ Iamo' anak-anak sekola' luk baken nacing dengan alud ineh, ngaceku ideh na mado tu rat tangeb, iamo' limeh ngepulu' depeh mo'. Idi ideh nengeruid rabat luk mepanu' ku lawid ineh.

⁹ Kareb ideh numak luun tangeb, idi ideh nenier bareh apui, idi lawid rireng pa luunneh dengan ruti.

¹⁰ Idi kebala Yésus nedeh, "Do' muyuh nguit sesuut lawid luk ilap muyuh ina."

¹¹ Idi Simun Pétrus numak bang alud idi nengeruid rabat ineh luk mepanu' ku lawid luk mekara macing nan tangeb, idi inan meratu limeh ngepulu' teluh kinula'deh, iamo' na rabat ineh nedarak.

¹² Kebala Yésus nedeh, "Amé' tungé idi kuman." Iamo' seburur anak sekola' pana' nateh luk mekuu' ngitun Neneh, "Idéké Iko?" ngaceku ideh kali' Ieh ineh Tuhan.

¹³ Idi Yésus nacing idi nengalap ruti idi nemaré kuandeh, idi kudeng ineh teh lawid ineh pana'.

¹⁴ Idi ineh luk keteluh kua'neh Yésus nengegala' bururNeh kuan anak-anak sekola'Neh muci ratnan Ieh netumui rat arang lun naté.

¹⁵ Pangeh ideh nekuman, idi Yésus nengitun Simun Pétrus, "O Simun, anak Yahya, mawaké iko Negku meluun ratnan lemulun ini?" Idi keburi' Pétrus Neneh, "O Tuhan, Iko kali' idi ui mawa Namu." Idi kebala Yésus neneh, "Do iko maman anak-anak dumbaKu."

¹⁶ Idi Ieh nengitun neneh luk kedueh kua', "O Simun, anak Yahya, mawaké iko Negku?" Idi keburi' Pétrus Neneh, "O Tuhan, Iko kali' idi ui mawa Namu." Idi kebala Yésus neneh, "Do' iko maman dumba-dumbaKu."

¹⁷ Idi Ieh nengitun neneh luk keteluh kua', "O Simun, anak Yahya, mawaké iko Negku?" Idi Pétrus pana' mesusa', ngaceku pangeh teluh kua' Ieh nengitun neneh, "Mawaké iko Negku?" Idi keburi' Pétrus Neneh, "O Tuhan, Iko kali' amung-amung, idi Iko kali' idi ui mawa Namu." Idi kebala Yésus neneh, "Do' iko maman dumba-dumbaKu.

¹⁸ Matu, Ui pebala namu, kareb iko isuut, iko sebuleng nengabet awa'mu, idi iné' iapeh-iapeh pian niatmu; iamo' kareb iko pangeh rayeh, iko miak natang ticu'mu, idi seburur lun baken miak ngabet awa'mu, idi nguit namu amé' su luk inanmu na sikal amé'."

¹⁹ Dengan bala ini Yésus nengegala' ayu até Pétrus luk miak ngerayeh Allah. Kareb Ieh pangeh nepebala kudeng ini, idi kebalaNeh ni Pétrus, "Do' iko maya' Negku."

²⁰ Pétrus nelumi, idi nenier anak sekola' luk ina Yésus mawa maya' pa puetdeh, idi ieh ineh luk iné' muneng nan Yésus kareb irau malem idi nengitun, "Idéké luk miak masui Tuhan?"

²¹ Idi kareb Pétrus nenier anak sekola' ineh, idi ieh nepebala nan Yésus, "O Tuhan, kudeng apehké lemulun ini?"

²² Idi kebala Yésus neneh, "Kudeng pianKu lemulun ini ketecan pad Ui macing baruh, bala ini baken kuanmu. Do' iko maya' Negku."

²³ Idi bala ini nepiar arang uned amung-amung kinanak, idi anak sekola' ineh na miak maté. Iamo' baken kudeng ineh bala Yésus, idi anak sekola' ineh na miak maté, iamo', "Kudeng pianKu idi lemulun ini ketecan pad Ui macing baruh, bala ini baken kuanmu."

²⁴ Idi ieh ineh anak sekola' luk maré kali' ratnan amung-amung ini, idi luk pangeh negayud amung-amung ini; idi tau kali' idi luk nekali'neh ineh matu peh.

²⁵ Idi inan teh mula' kekamen baken luk inau' Yésus, idi kudeng anid-anid kekamen ineh uen ngayud, ui ngerawé tana' ini pana' na miak ngimet surat-surat luk uen ngayud ineh.

Yohanes

Video Yohanes 21

Ikuti Kami:

KONTAK | PARTISIPASI | DONASI