Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mangkai joo mpangpekitan pole' omi kalena Puang Isa lako anak gurun-Na jio randan Tasik Tiberias. Susi tee jajinna:

² Den sangbongi nasirempun to Simon Petrus, Tomas (to disanga too Rendu), Natanael to-Kana jio tana Galilea, anakkana Zebedeus, na denpa dua anak gurun-Na laen.

³ Nakua Simon Petrus lako solana, "La malena' mebale." Nakua toda to solana, "La male todakan." Male ngasanmi manglopi, apa siupuh bongi te'da bang apa naampa'.

⁴ Ia tonna mane' ollong allo, ke'dehmi Puang Isa jio randan tasik, apa te'da naissenni anak gurun-Na kumua Puang Isa joo.

⁵ Nakua Puang Isa ngkuanni, "Oo pea, denraka balemi?" Mebalii nakua, "Te'da Kita'!"

⁶ Nakua omo Puang Isa ngkuanni, "Pembuangan lakoi sa'de kananna lopi tuu jalami, ammiwa'ding nnampa' bale." Napembuanganmi joo jalana, na tangnakullemi rrui' pole'i, sanga liwa' buda bale lan.

⁷ Ia to anak guru napakamoja' Puang Isa ngkuan Petrus, "Puang joo!" Ia tonna sa'dingngi Simon Petrus, ta'pa mpakei bajunna sanga te'da namebaju, namella'bu do' tasik.

⁸ Ia to anak gurun-Na pira' undimi manglopi lako gantanan, narui' bangngi joo jalana ponno bale, nasaba' te'da namambela jio mai gantanan, denra agi-agi saratuh metere'.

⁹ Ia tonna ratumo lako gantanan, nakitai denmo kuaro jio nanii ntunu bale sola roti.

¹⁰ Nakua Puang Isa ngkuanni to anak gurun-Na, "Bawai kee mai pira' tuu bale mane' miala."

¹¹ Endekki de' lopi Simon Petrus, narui'i joo jala lako gantanan. Ponno bale joo jala, na simatonggo, den saratuh limang pulo tallu. Apa moi nabuda susi joo, te'da naca'ce to jalana.

¹² Nakua Puang Isa ngkuanni to anak gurun-Na, "Takumandemo!" Te'da bangngi moi mesa' barani mekutana kumua, "Indariki'?" sanga naissenmi kumua Puang Ia.

¹³ Namane' ngkandoppi'i Puang Isa to anak gurun-Na, naalai to roti, natawa-tawanni. Napasusi tooi joo bale.

¹⁴ Iamo tee mangpentallunna Puang Isa mpangpekitan kalena lako anak gurun-Na mangkanna tuo pole' jio mai kamatean.

¹⁵ Ia tonna mangkamo kumande, nakuamo Puang Isa ngkuan Simon Petrus, "Simon anakkana Yona, la'bi mupakamoja'ra'ka na ia tee mai tau to mpakamoja' todana'?" Mebalii Petrus nakua, "Ie', Puang. Taissen kumua kupakamoja'ki'." Nakua Puang Isa ngkuanni, "Rewai to anak bembala'-Ku'."

¹⁶ Mangpenduanna Puang Isa ngkutanaii nakua, "Simon anakkana Yona, mupakamoja'ra'ka?" Mebalii Petrus nakua, "Ie', Puang. Taissen kumua kupakamoja'ki'." Nakua Puang Isa ngkuanni, "Rewai to bembala'-Ku'."

¹⁷ Mangpentallunna Puang Isa ngkutanaii nakua, "Simon anakkana Yona, mupakamoja'ra'ka?" Memmassei penawanna Petrus, nasaba' pentallunmi nakutanai Puang Isa. Mebali omi Petrus nakua, "Oo Puang. Kita' nnissenni to sininna apa. Taissen kumua kupakamoja'ki'!" Nakua Puang Isa ngkuanni, "Rewai to bembala'-Ku'.

¹⁸ La muingaran tee kadang-Ku' kumua, ia ke malolle' unapoko, messa'wakko mumale umbo-umbo mukadoangngi. Apa ia ke matuamoko, la mpangbenko limammu, napumpungngi tau laen, nasolanko male lako to tangmukabudainna."

¹⁹ Mangkadai susii joo Puang Isa mpangpeissenanni umbo nakua carana to kamateanna Petrus anna pumala'bihhi Puang Allataala. Mangkai joo, nakuamo Puang Isa ngkuan Petrus, "Undiko nturu'na'!"

²⁰ Ia tonna messaile Petrus lako boko'na, nakitai jio to solana anak guru to napakamoja' Puang Isa. Iamo to cumadokko ngkandoppi' Puang Isa tonna kumande, namekutana kumua, "Oo Puang, indara ia to la mpangpejokkoanki'?"

²¹ Nakitai Petrus namekutana lako Puang Isa nakua, "Oo Puang, la matumba ia tee solaku'?"

²² Mebalimi Puang Isa nakua, "Ia ke la madoangna', moi ia tuopa kuratu pole' keanu', tangngia iko issenmu. Apa ia to iko, undiko nturu'na'!"

²³ Lelemi to kareba lan tangnga-tangngana anak gurun-Na kumua ia joo anak gurun-Na napakamoja' te'damo ia nalamate. Na te'da ia nakumua susi joo Puang Isa, apa nakuara, "Ia ke la madoangna', na moi ia tuopa kuratu pole' keanu', tangngia iko issenmu."

²⁴ Iamo tee to anak gurun-Na mpangpeissenanni to sininna tee kajajian, na ia toomo mangka nnuki'i. Na taissen kumua tongan ngasan to apa napau.

²⁵ Budapa laenna to napugauk Puang Isa. Na ia ke la diuki' simesa'-mesa'i, kusanga ia to sura' dinii nnuki'i te'da nalasiagi tee lino.

Yohanes

Video Yohanes 21

Ikuti Kami:

KONTAK | PARTISIPASI | DONASI