Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jahawen andau helo bara Andau Pesta Paska, Yesus haguet akan Betania. Hong eka te aton Lasarus je jari imbelom bara pampatei.
2 Intu hete Yesus inyarongan awi ewen, tuntang Marta mandohop. Lasarus tuntang kare oloh je dumah mondok kuman haya-hayak dengan Yesus.
3 Limbah te Maria dumah dengan kurang-labih satengah liter minyak harum narwastu je larang toto. Ie manata minyak te intu pain Yesus, palus mampuase hapan balaue. Hapus huma manjadi harum awi ewau minyak te.
4 Tapi Yudas Iskariot, ije biti bara murid Yesus -- je limbah te mandarhaka mawi Ie -- hamauh,
5 "Mbuhen minyak harum te dia injual ih hapan rega telo ratus duit perak, tuntang duite inenga akan oloh je belom susah?"
6 Yudas hamauh kalote dia tagal awie manirok oloh je belom susah, tapi awi ie panakau. Ie kinjap manduan duit bara kas ewen handiai je iingkes dengae.
7 Tapi Yesus hamauh, "Nauhe ih oloh bawi te! Ie mawi jetoh akan andau mangubur Aku.
8 Oloh je belom susah harajur aton marak keton, tapi Aku toh dia."
9 Are oloh Yehudi mahining je Yesus te aton hong Betania, jadi ewen haguet akan hete. Ewen haguet dia baya tagal Yesus, tapi kea awi ewen handak mite Lasarus je jari imbelome bara pampatei.
10 Jete sababe kare imam kapala handak mampatei Lasarus kea;
11 awi Ie mawi sabab are oloh Yehudi malihi ewen tuntang percaya dengan Yesus.
12 Andau jewue tinai oloh are je dumah uka maraya pesta Paska mahining Yesus aton hong benteng panjalanae manalih Yerusalem.
13 Maka ewen manduan kare palapah korma palus haguet manambang Ie, sambil basasurak, "Tara akan Hatalla! Imberkat Ie je dumah hong aran Tuhan. Imberkat Ie Raja Israel!"
14 Yesus dinon ije kalidai tabela, tuntang Ie manongkange. Palus manjadi auh je tarasurat huang Surat Barasih:
15 "Ela mikeh, kota Sion! Ite toh Rajam dumah, manongkang ije kongan kalidai tabela!"
16 Hong katika te kare murid Yesus hindai haratie taloh handiai je manjadi te. Tapi limbah Yesus impahai tagal pampateie, harue ewen taraingat iete taloh je iawi kare oloh dengae jari tarasurat huang Surat Barasih tahiu Ie.
17 Kare oloh je aton metoh Yesus mantehau Lasarus balua bara kubur tuntang mambelom ie bara pampatei, harajur manenga kasaksian tahiu hal te.
18 Jete sababe oloh are te haguet manalih Yesus awi ewen mahining puna Ie te je jari mawi taloh heran te.
19 Maka kare oloh Parisi hamauh sama arepe, "Itah jaton olih mawi taloh en-en! Ite ih, hapus kalunen uras omba Ie!"
20 Bara marak kare oloh je haguet akan Yerusalem uka sombayang hong pesta te, aton kea pire-pire oloh Yunani.
21 Ewen dumah manalih Pilippus tuntang hamauh, "Pahari, amon tau, ikei handak hasondau dengan Yesus." (Pilippus te asale bara Betsaida hong Galilea.)
22 Maka Pilippus haguet mansanan hal te akan Andreas, limbah te ewen due manyampai hal te akan Yesus.
23 Yesus hamauh dengan ewen, "Jari sampai katikae Anak Olon impahai.
24 Puna toto auh-Ku toh: Amon ije kabawak gandom dia iimbul akan huang petak tuntang matei, ie tetep ije kabawak. Tapi amon bawak gandom te matei, maka ie palus mahasil are gandom.
25 Oloh je sinta pambelome kareh nihau pambelome. Tapi oloh je basingi pambelome hong kalunen toh, kareh mahaga jete uka ie belom bujur tuntang katatahie.
26 Oloh je handak manempo Aku musti omba Aku; mangat rewar-Ku tau hinje Aku hong kueh Aku aton. Oloh je mandohop Aku akan ihormat awi Bapa-Ku."
27 "Atei-Ku gogop; en je musti insanang-Ku toh? En musti Aku mansanan, 'Bapa, lapas Aku bara katika jetoh'? Tapi puna uka Aku mangkeme wayah kapehe jetoh Aku toh dumah.
28 Bapa, keleh Aram impahai!" Maka tarahining auh bara langit mansanan, "Aku jari mampahai jete, tuntang Aku handak mampahai jete tinai."
29 Oloh are je aton hete mahining auh te. Ewen hamauh, "Jete nyaho!" Tapi aton kea oloh je hamauh, "Beken! Malekat hakotak dengae!"
30 Palus Yesus hamauh dengan ewen, "Auh te tarahining, jete dia akang-Ku, tapi akan keton.
31 Toh katikae jari sampai uka kalunen ihakim; metoh toh panguasa kalunen toh imbaring.
32 Tapi Aku toh, amon Aku jari inggatang hong hunjun petak, Aku kareh manduan kakare oloh ayung-Ku."
33 Ie hamauh kalote uka mamparahan kilen ampin carae Ie akan matei.
34 Oloh are te hamauh Dengae, "Manumon Surat Hukum ain ikei, Raja Panyalamat akan belom katatahie. Kilen ampie Ikau tau hamauh je Anak Olon musti inggatang intu hunjun petak? Eweh Anak Olon te?"
35 Yesus tombah, "Baya hanjulo bewei kalawa te aton hong marak keton. Jadi, keleh keton mananjong katahin kalawa te magon aton, uka keton ela buah kakaput. Oloh je mananjong huang kakaput, dia katawan akan kueh tintun pangguete.
36 Percaya ih dengan kalawa te, katahin kalawa te magon aton intu keton, mangat keton manjadi anak kalawa." Limbah Yesus hakotak kalote, Ie haguet bara hete tuntang dia maku mamparahan arep Aie akan ewen.
37 Aloh jari are taloh heran iawi Yesus intu taharep ewen, ewen dia percaya intu Ie.
38 Maka manjadi taloh je isanan Nabi Yesaya, "Tuhan, eweh je percaya dengan barita je insanan ikei? Akan eweh kuasan Tuhan imparahan?"
39 Jete bukue ewen dia percaya, basa Yesaya jari hamauh kea, "Hatalla hamauh,
40 'Aku mambute matan ewen, mawi ewen batekang ateie; mangat matan ewen ela mite, tirok ewen dia harati. Mangat ewen dia haluli manalih Aku, palus Aku mampakeleh ewen.'"
41 Yesaya hamauh kalote basa ie jari mite kahain Yesus, tuntang hakotak tahiu Ie.
42 Aloh kalote, mahin are oloh, tuntang kea bara marak panguasa Yehudi percaya dengan Yesus. Tapi ewen dia bahanyi mangaku hal te tarus-tarang, awi ewen mikeh, ela-ela oloh Parisi kareh mangahana ewen tame huma sombayang.
43 Ewen rajin mandino tara bara oloh labih bara mandino tara bara Hatalla.
44 Palus Yesus mangkariak, "Oloh je percaya dengang-Ku, ie beken percaya dengang-Ku, tapi percaya dengan Ie je manyoho Aku.
45 Tuntang oloh je mite Aku, mite kea Ie je manyoho Aku.
46 Aku dumah akan kalunen toh kilau kalawa, uka kakare oloh je percaya dengang-Ku dia melai huang kakaput.
47 Oloh je mahining auh ajar-Ku, tapi dia manumoe -- dia ie Aku je mahukum ie. Basa Aku dumah dia tantai mahakim kalunen toh, tapi uka manyalamate.
48 Oloh je manolak Aku tuntang dia mahining auh-Ku, jari aton oloh je mahakim ie. Auh je insanang-Ku, jete je kareh mahakim ie hong Andau Kiamat.
49 Basa Aku hakotak dia tahiu kahandak ayung-Ku kabuat; Bapa je manyoho Aku, Ie te je jari marentah Aku tahiu taloh je insanang-Ku tuntang inyampai-Ku.
50 Tuntang Aku katawan je parentah Ayue te manenga pambelom je bujur tuntang katatahie. Maka Aku mansanan sama kilau je iajar Bapa akang-Ku."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA