Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, tomala'bihku' sola ngasan, umma'-Na Puang Allataala to titaleh lan lili'na lino. Ia tee sura' pole jio mai aku' Yakub tonasua Puang Allataala sola Puang Isa Almaseh.

² Ee, tomala'bihku'! Ianna kanna kamu' mangrupa-rupa pecoba, la misangai kumua tomasannang kamu'.

³ Sanga miissen kumua la sabbara' kamu', ke da'tan kamu' matappa' lako Puang moi nakanna kamu' pecoba.

⁴ La sasabbara'-bara'na kamu', anna te'damo caccami ba'tu kakuranganmi.

⁵ Ia ke den kamu' tangpadete' tangngahmi, la meta'da kamu' lako Puang Allataala naben kamu', sanga malaboh na masannang penawan-Na mangpabengan lako sininna tau.

⁶ Apa ia ke den kamu' meta'da, la matappa' tongan kamu', danggi' mibata, sanga ia ammibata, susii to bombang jiong tasik male melako nairi' angin.

⁷ Tositawa penawanna to tau susi joo, na te'da namanassa ke denni apa napugauk. Iamo joo danggi' omo natajannii kumua la naben assele' Puang.

⁸ (1:7)

⁹ La masannang to tomatappa' makaasi-asi, sanga napamajaomi Puang Allataala.

¹⁰ Susi too to tomatappa' sugih la masannang tooi sanga napupemmajiongmi Puang Allataala. Nasaba' ia to tosugih cingga'tu'ra nalanynya' susi reu.

¹¹ Ianna maka'jamo to allo, malajumi to reu nasilolloran to ca'binna, ta'de toomi to ballona. Susi toomi lako tosugih, ia joo wattu mangngangah bang unai nata'pa mate.

¹² Masannang to tatta' matappa', nasaba' te'da namadoang dipatuju sala mpugauk dosa. Sanga la ntarima pahalana, iamo to katuoan melo mangka napasadia Puang Allataala lako to tompakamoja'i.

¹³ Ianna den tau dipatuju sala mpugauk dosa, danggi' nakua pole jio mai Puang Allataala joo pangpatuju. Nasaba' te'da nakullei Puang Allataala dipatuju sala la mpugauk kagajatan, te'da too nampatuju sala tau la mpugauk kagajatan.

¹⁴ Apa ia to tau, kamadoangan gaja'nara to mpatuju salai nampugauk dosa.

¹⁵ Ianna paula'i bangngi joo kamadoangan gaja'na, iamo joo mpaden dosa arannai mpusaba' kamatean.

¹⁶ Ee, tomalabihku' to kupakamoja'! Danggi' miuraga kalemi.

¹⁷ Sininna to apa melo na te'da caccana pole jao mai suruga, nabenki' Puang Allataala, to mpaden allo, bulan sola bintuin jao langi'. Te'da natibalik to sipa'-Na Puang Allataala na tatta' too to akkatta-Na.

¹⁸ Mangkamiki' napuanak situru' pakkaeloran-Na mpake pangngajaran tongan. Iamo napugaukki susi joo, sanga napamala'bihki' na ia to sininna olok-olok napaden.

¹⁹ Ee, tomala'bihku' to kupakamoja'! Ingaranni tee! La mangpesa'ding melo to tau, apa danggi' namenjolo-jolo bang mangkada na danggi' too nasalle birih.

²⁰ Sanga ia to tau ke mabirihhi te'da nakullei mpugauk kameloan to napumasannang Puang Allataala.

²¹ Iamo joo danggi'mo mipugaukki to kabiasan tangmelomi ba'tu panggaukan gaja'mi, mitarima rampa'i to kada natanan Puang Allataala lan penawammi, sanga ia joo kada makuasa mpasalama' kamu'.

²² La mipugauk to apa mangka napau Puang Allataala, nasaba' ia ammisa'ding mandari to kadan-Na apa cia' kamu' mpugaukki, iamo disanga nnuraga kamu' kalemi.

²³ Ia to tossa'ding kadan-Na Puang Allataala apa cia'i mpugaukki, susi bang tomangcammin ngkita rupanna.

²⁴ Silalona bang mangka mangcammin, nata'pa te'da lalomo naingaranni to rupanna to nakita lan cammin.

²⁵ Te'da caccana to atoran-Na Puang Allataala na makuasa lla'paranki' jio mai kuasa dosa. Parallu diissen tongan, nadipallan penawa, nadipugauk tongan, te'da nadisa'ding manda arannai tangdiingaran. Jaji paralluki' mpugaukki to atoran-Na, nasaba' sininna tau to mpugaukki susi joo nabarakka'i Puang Allataala.

²⁶ Ianna den tau ssanga kalena pangngagama, apa te'da najagai timunna, nnuragai kalena, na te'da bua'na mangngagama.

²⁷ Ia to mangngagama tongan situru' pakkaeloran-Na Ambe' Puang Allataala, iamo to ntulung pea biung pu'puhmo, sola baine te'damo muanena nakaasi-asi, na njagai kalena danggi' naturu' panggaukan tangmelona tolino to tangnturu' Puang Allataala.

Yakobus

Video Yakobus 1

Ikuti Kami:

KONTAK | PARTISIPASI | DONASI