Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai marsahap ma Jahowa hubani si Musa, nini ma,
2 “Hatahon ma hubani halak Israel, ʻAhu do Jahowa Naibatanima.ʼ
3 Seng bulih bahenonnima, songon na binahen ni halak i tanoh Masir, tanoh panginsolatannima ai hinan, anjaha seng bulih bahenonnima songon na binahen ni halak i tanoh Kanaan hadasannima ai holi bahenon-Ku, seng bulih hanima marparlahou domu hubani hasomalan ni sidea.
4 Maningon horjahononnima do titah-Ku anjaha ramotkononnima paraturan-Ku anjaha marparlahou hanima ibagas ai, ai Ahu do Jahowa Naibatanima.
5 Halani ai maningon ramotkononnima do paraturan-Ku ampa titah-Ku. Halak na mangkorjahon ai, manggoluh do marhitei ai, Ahu do Jahowa.
6 Ise pe lang humbennima bulih mandohori sindohorni na sangkan laho mangkasomanisi modom, Ahu do Jahowa.
7 Bapamu atap inangmu seng bulih hasomananmu modom; inangmu do ia, seng bulih hasomananmu modom.
8 Seng bulih hasomananmu modom jolma ni bapamu; ai na pabador bapamu do ho marhitei ai.
9 Seng bulih ompoanmu botoumu, boru ni bapamu atap boru ni inangmu pe ai, tubuh i rumah atap i darat pe ai, seng bulih hasomananmu ia modom.
10 Seng bulih ompoanmu pahompumu, na humbani anakmu atap pe na humbani borumu, ai na pabador dirimu do ho marhitei ai.
11 Seng bulih ompoanmu boru ni jolma ni bapamu, na dob tubuh humbani bapamu, ai botoumu do ia, seng bulih hasomananmu ia modom.
12 Seng bulih ompoanmu namborumu, ai sisada daroh do ia ampa bapamu.
13 Seng bulih ompoanmu sanina ni inangmu, ai sisada daroh do ia ampa inangmu.
14 Seng bulih butakanmu podoman ni sanina ni bapamu, marhitei na mandohori jolmani modom, ai inangmu do ia.
15 Seng bulih ompoanmu parumaenmu, ai jolma ni anakmu do ia, seng bulih hasomananmu ia modom.
16 Seng bulih hasomananmu modom jolma ni saninamu, ai na pabador saninamu do ho marhitei ai.
17 seng bulih ompoanmu sada naboru rap pakon boruni; anjaha seng bulih buatonmu boru ni anakni ai atap boru ni boruni ai bahen jolmamu, ai sisada daroh do hanima; habadoron banggal do ai.
18 Seng bulih buatonmu gabe jolmamu sanina ni na binuatmu, laho mangkasomanisi modom, sadokah manggoluh ope ia.
19 Seng bulih dohoranmu sada naboru, laho mangkasomanisi modom, sanggah roh pantang ni hiouni.
20 Seng bulih hasomananmu modom jolma ni hasomanmu, gabe butak ho marhiteihonsi.
21 Seng bulih ondoskononmu age sahalak humbani ginomparmu, laho manggalangkon ai bani Molok, ase ulang gabe butak ibahen ho goran ni Naibatamu, Ahu do Jahowa
22 Seng bulih parjolmaonmu dalahi songon naboru, ai hagigi do ai.
23 Seng bulih ho saor hubani pinahan aha pe ai, gabe butak do ho marhitei ai. Anjaha naboru pe seng bulih bereonni dirini bani pinahan laho marsaor pakon ai; hagigi do ai.
24 Seng bulih butakonnima dirinima marhitei haganupan ai, ai marhitei na sonai ai do ipabutak bangsa sipajuh begu-begu dirini, ai ma siusironkai i lobeinima.
25 Marhitei ai gabe butak ma tanoh ai, jadi mangonai uhum ma Ahu halani hajahatonni ai, ase iutahkon tanoh ai pangisini ai.
26 Halani ai ramotkon hanima ma paraturan-Ku ampa titah-Ku anjaha ulang ma ihorjahon hanima age aha pe humbani hagigi ondi, pangisi ni tanoh ai pe, age halak dagang na marianan i tongah-tongahnima,
27 ai haganup hagigi ondi, domma ihorjahon pangisi ni tanoh ai hinan, ai ma na parlobei humbennima, gabe butak tanoh ai ibahen.
28 Ase ulang dihut hanima iutahkon tanoh ai, halani dihut hanima mambutaki tanoh ai, songon na dob niutahkonni bangsa parbegu na parlobei humbennima.
29 Ai barang ise na mangkorjahon sada gelah humbani hagigi ondi, maningon siapkononkon do hosahni hun tongah-tongah ni bangsani.
30 Halani ai ramotkon hanima ma paraturan-Ku, ai ma na so bulih horjahononnima humbani adat na masambor ai, ai ma na dob hinorjahon hinan i lobeinima, gabe butak hanima halani ai; Ahu do Jahowa Naibatanima.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA