Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ikataken TUHAN man Musa,
2 gelah ipesehna man bangsa Israel bagenda, "Aku kap TUHAN Dibatandu.
3 Ula ikut-ikut perbahanen bangsa Mesir, inganndu tading mbarenda, ntah pe perbahanen bangsa Kanaan, ku ja kam Kubaba genduari.
4 Ikutken lah pedah-pedahKu, dalanken lah perentah-perentahKu. Aku kap TUHAN Dibatandu.
5 Ikutken lah pedah-pedah ras perentah-perentah si Kubereken man bandu; adi bage perbahanndu, tentu selamat geluhndu. Aku kap TUHAN."
6 Ibereken TUHAN peraturen-peraturen enda: Ula kam ersada kula ras keluargandu.
7 Ula ijurukenndu bapandu alu kam ersada kula ras nandendu. Ula ijurukenndu nandendu jine.
8 Ula ijurukenndu bapandu alu kam ersada kula ras ndeharana si deban.
9 Ula kam ersada kula ras turangndu ntah pe ras turangndu si ibaba nande ngudandu, subuk ia ipebelin sada rumah ras kam ntah lang.
10 Ula kam ersada kula ras kempundu si diberu; sabap e njuruken dirindu jine.
11 Ula kam ersada kula ras turangndu sada bapa pedauh nande, sabap ia pe turangndu kap.
12 Ula kam ersada kula ras bibindu, subuk ia turang bapandu ntah senina nandendu.
13 (Im 18:12)
14 Ula kam ersada kula ras ndehara senina bapandu, sabap ia pe nandendu kap.
15 Ula kam ersada kula ras ndehara anakndu
16 ntah ras ndehara seninandu.
17 Ula kam ersada kula ras anak ntah kempu diberu si nggo kam ersada kula ras; banci jadi lit hubungen darehna ras kam, janah si e perbahanen si la tengka.
18 Ula iempoindu senina ndeharandu jadi tambah ndeharandu, adi ndeharandu e nggeluh denga.
19 Ula kam ersada kula ras diberu si sangana nguda bulanna, sabap ia la bersih rikutken aturen agama.
20 Ula kam ersada kula ras diberu kalak, sabap e erbahanca kam la bersih.
21 Ula sada pe endesken anak-anakndu guna ipersembahken man Dewa Molekh, sabap perbahanen si bage njuruken man gelar Dibata, TUHAN e.
22 Ula lit dilaki ersada kula ras dilaki; ciga ate Dibata si bage.
23 Ula lit dilaki ntah diberu ersada kula ras asuh-asuhen, sabap perbahanen si la tengka e seh kal melketna.
24 Ula ipemelketndu bandu alu perbahanen si la bersih enda, sabap bage me perbahanen kalak perbegu si erbahanca ia la bersih. Bage me kap perbahanen kalak perbegu si ngiani taneh si lit i lebe-lebendu, janah ia ipelawes TUHAN, gelah banci kam bengket.
25 Perbahanen kalak erbahanca maka taneh e la bersih, emaka iukum TUHAN taneh e, janah IbahanNa maka iutahken taneh e bangsa si tading i je.
26 Ilakokenna kerina perbahanen si ciga ate e, emaka negeri e lanai bersih. Tapi kam la banci bage. Kerina kam, subuk kalak Israel, ntah pe kalak asing, arus make undang-undang ras perentah TUHAN.
27 (Im 18:26)
28 Alu bage maka la kam iutahken taneh e bagi iutahkenna kalak perbegu si ngianisa ope denga kam.
29 Ietehndu maka ise si ngelakoken apai gia perbahanen si ciga ate, lanai ia ikira jadi bangsa Dibata.
30 Emaka nina TUHAN, "Patuh lah man perentah-perentahKu, ula usih perbahanen kalak si tading i negeri e ope denga kam. Ula ipemelketndu bandu alu ngelakoken perbahanen-perbahanen enda ndai: Aku kap TUHAN Dibatandu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA