Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri se’reang allo, Nadab siagang Abihu, iamintu ana’na Harun, angngallei massing tampa’ pepe’na nampa nabonei bara. Nampa nabonei ke’nanga dupa anjo pepeka siagang napassareang mae ri Batara. Mingka tena nahallala’ anjo pepeka lanri tena nisuroi ke’nanga ri Batara ampassareangi anjo kammaya.
2 Jari Napabattumi Batara pepeka antunui ke’nanga sa’genna mate ri KemaNa Batara.
3 Jari nakanamo Musa mae ri Harun, "Iaminjo natabaya kananNa Batara ri wattunna angkana, ‘Sikontu allayania mae ri Nakke musti napakala’biriki katangkasangKu. Kupa’nyatai kalompoangKu mae ri sikontu bansaKu.’" Mingka tena nakkana-kana Harun.
4 Nampa Musa nakioki Misael siagang Elsafan, ana’na Uziel, purinanna Harun. Nakanamo ri ke’nanga, "Battuko mae angngallei maya’na cikalinnu battu ri KemaNa Batara nampa nuboli’ ri pantaranna pakkemaanga."
5 Battumi ke’nanga na naerang anjo mayaka ammakeanga ija, sangkamma naparentanga Musa.
6 Nampa nakana Musa mae ri Harun siagang sikamma ana’na maraenga, iamintu Eleazar siagang Itamar, "Teako lappassangngi akkara’ngasa’ uu’nu siagang teako kekkeki pakeannu lanri ero’na nupappicinikang angkanaya si’nako lanri kamateangko. Punna kamma anjo nugaukang, lamateko, siagang sikontu umma’ Israel lanikalarroi ri Batara. Mingka sikontu umma’ Israel maraenga akkulle si’na lanri anjo tau ruaya mate nakanrei pepe’Na Batara.
7 Teako bokoi KemaNa Batara sollanna tena numate, nasaba’ le’ba’ ngaseng mako nilanti’ siagang minynya’ upacara untu’ allayani Batara." Nagaukammi ke’nanga situru’ nakananga Musa.
8 Nakana Batara mae ri Harun,
9 "Punna le’bakko angnginung je’ne’ anggoro’ yareka inungang terasa’, ikau siagang ana’-ana’nu takkulleako antama’ ri KemaKu. Punna nudakkai anjo paratoranga, lamateko. Anjo parentaya musti naturuki sikontu jari-jarinu.
10 Musti akkullei nubatei angkanaya kereanga nisa’la’ untu’ Allata’ala siagang kereanga tena nisa’laki, kereanga ra’masa’ siagang kereanga tena nara’masa’.
11 Sikontu hukkung Kupassareanga tete ri Musa, musti nupangngajarrangi mae ri bansa Israel."
12 Nakana Musa ri Harun siagang ruaya ana’na, iamintu Eleazar siagang Itamar, "Allei la’binna gandung kanre nipassareanga mae ri Batara. Battu ri anjo labuka apparekko roti tenaya nammake pa’gambang, nampa nukanre ri sa’rinna tampa’ pakkoro’bangnganga, lanri anjo koro’banga teai sipato’ tangkasa’na.
13 Anjo rotia musti anjorengi ri tampa’ matangkasaka nikanre, lanri battu ri iaminjo kanre le’baka nipassareang mae ri Batara, anjo rotia a’jari bageannu siagang ana’-ana’nu bura’nea. Iaminjo parentaNa Batara mae ri nakke.
14 Mingka ikau ngaseng siagang ana’-ana’nu bura’nea siagang ana’-ana’nu bainea akkullei nukanre barambanna koro’bang nipappicinikanga siagang passare nisa’laka. Iaminjo bageanna sikamma imanga battu ri koro’bang passiamakkanna bansa Israel. Akkullei nukanre ri sambarang tampa’ tenaya nara’masa’.
15 Bongganna passare nisa’laka siagang barambanna passare nipappicinikanga musti nierangi siagang jannana koro’bang nitunua salaku passare nisa’la’ mae ri Batara. Anjo bageang-bageanga ikau pata siagang ana’-ana’nu sa’genna satunggu-tungguna, sangkamma Naparentakanga Batara."
16 Nampa akkuta’nang Musa ri passala’na bembe untu’ koro’bang pammopporang dosaya. Nipauammi angkanaya anjo bembea le’ba’mi nitunu. Larromi Musa mae ri Eleazar siagang Itamar nalangngere’na anjo passalaka; nakanamo ri ke’nanga,
17 "Angngapa natena nukanrei anjo koro’bang pammopporang dosaya ri tampa’ matangkasaka? Anjo koro’banga teai sipato’ tangkasa’na; Napassareangi Batara mae ri kau, sollanna nipammopporang dosana umma’ Israel.
18 Cera’na anjo bembea tena nierangi mange ri KemaNa Batara; jari mustina anjo koro’banga nukanrei anjoreng sangkamma kuparentakanga."
19 Appialimi Harun angkana, "Memang anne alloa le’ba’mi umma’ Israel assare koro’bang pammopporang dosa siagang koro’bang nitunu untu’ Batara. Mingka manna nakamma anjo, anne balaya natujuma’. Ebara’ angkana anne alloa kukanre tongi anjo koro’bang pammopporang dosaya, apaka lasannangi nyawaNa Batara?"
20 Baji’mi nasa’ring pakkasia’na Musa allangngereki anjo pappialinna Harun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA