Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ E settong are Nadab ban Abihu, tra-pottrana Harun, mondhut padupa’anna bang-sebang, padupa’an jareya eesse’e mardha sarta pas epobuwi dupa, pas eatorragi ka PANGERAN. Tape apoy jareya ta’ socce lantaran PANGERAN ta’ makon se kantha jareya.

² Daddi PANGERAN laju matoron apoy, se kadhuwa jareya taobbar sampe’ padha mate e dhalem Kemah Socce jareya.

³ Mosa laju adhabu ka Harun, "Jareya se ekamaksod bi’ PANGERAN e bakto adhabu, ‘Sakabbinna oreng se aladine Sengko’ kodu ngargai kasocceyanna Sengko’. Sengko’ noduwagiya Tang kamolja’an ka sakabbinna Tang bangsa.’" Tape Harun mendel malolo.

⁴ Saellana jareya Mosa adikane Misa’el ban Elsafan, tra-pottrana Uziyel, majadhi’na Harun. Dhabuna ka se kadhuwa jareya, "Mara dha’ enna’, kala’ mayyidda sapopona ba’na se kadhuwa reya dhari Kemah Socce reya pas saba’ e lowaranna parkemahan."

⁵ Se kadhuwa jareya nyander pas ngeba mayyid se dhadhuwa’ se gi’ akalambi jareya ka lowaranna parkemahan akantha se edhabuwagi Mosa.

⁶ Dhabuna Mosa ka Harun ban ka tra-pottrana se laen, iya areya Eleyazar ban Itamar, "Obu’na ba’na ja’ pasalsal, ban kalambina ja’ sebbit kaangguy noduwagi ja’ ba’na sossa. Mon ba’na sampe’ salsal obu’na ban nyebbit kalambina menangka tandha ja’ ba’na sossa, ba’na bakal mateya, ban sakabbinna ommat Isra’il bakal ebendunana PANGERAN. Tape reng-oreng Isra’il laenna olle sossa polana kapateyan oreng se kadhuwa se ekello’ apoy se epatoron PANGERAN jareya.

⁷ Ja’ ondura dhari Kemah Socce me’ olle ba’na ta’ mate, sabab ba’na la etahbissagi bi’ mennya’ opacara kaangguy aladine PANGERAN." Harun ban tra-pottrana padha alampa’agi se edhabuwagi Mosa.

⁸ Dhabuna PANGERAN ka Harun,

⁹ "Samarena ngenom anggur otabana nom-enoman kerras ba’na ban na’-ana’na ta’ olle maso’ ka dhalem Tang Kemah. Mon ba’na ta’ atoro’ ka atoran jareya, ba’na bakal mateya. Parenta reya kodu etoro’ bi’ sakabbinna toronanna ba’na.

¹⁰ Ba’na kodu tao abida’agi se kemma se la eatorragi ka Allah malolo ban se kemma se ekenneng angguy kaangguy kaparlowan se umum, se kemma se najjis ban se kemma se ta’ najjis.

¹¹ Sakabbinna hokom se ebagi Sengko’ ka ba’na kalaban parantara’anna Mosa kodu eajarragi ka ommat Isra’il."

¹² Dhabuna Mosa ka Harun ban ka pottrana se kadhuwa, iya areya Eleyazar ban Itamar, "Kala’ gandum karena kurban obbaran se eatorragi ka PANGERAN. Dhari teppong jareya agabay roti se ta’ eragi’i, laju kakan e erenganna mezba, sabab kurban jareya talebat soccena.

¹³ Roti jareya kodu ekakan e kennengngan se socce, sabab dhari kakanan se eatorragi ka PANGERAN, roti jareya bagiyanna ba’na ban na’-ana’ lalake’anna. Jareya se edhabuwagi PANGERAN ka sengko’.

¹⁴ Tape ba’na ban na’-ana’ lalake’anna sarta ana’ babine’anna olle ngakan dhadhana tor-ator ka’-angka’ ban pokangnga tor-ator kusus. Jareya bagiyanna para imam dhari kurban salameddanna bangsa Isra’il. Ba’na ban na’-ana’na olle ngakan jareya e kennengngan e dhimma’a bai se ta’ najjis.

¹⁵ Pokangnga kurban kusus ban dhadhana tor-ator kusus jareya kodu egiba epabareng ban gajina kurban obbaran menangka tor-ator kusus ka PANGERAN. Bagiyan-bagiyan jareya daddi andhi’na ba’na ban na’-ana’na kaangguy salanjangnga, menorot se edhabuwagi PANGERAN."

¹⁶ Saellana jareya Mosa mareksane parkara embi’ se ekagabaya kurban pangamponanna dusa. Ta’ taona embi’ jareya la eobbar. Daddi Mosa duka ka Eleyazar ban Itamar, tra-pottrana Harun, dhabuna,

¹⁷ "Arapa kurban pangamponanna dusa jareya bi’ ba’na me’ ta’ ekakan e kennengngan se socce? Jareya bagiyan se talebat soccena, se bi’ PANGERAN eparengngagi ka ba’na sopaja dusana ommat Isra’il esapora’a.

¹⁸ Dharana embi’ jareya ta’ egiba ka Kemah Socce, daddi masthena kurban jareya bi’ ba’na kodu ekakan e jadhiya akantha se la eparenta’agi bi’ sengko’."

¹⁹ Dhabuna Harun ka Mosa, "Ja’ sakenga kurban pangamponanna dusa reya bi’ sengko’ ekakan sateya, apa kerana PANGERAN kasokana panggaliyanna? Pajat bendher e are teya ommat Isra’il la ngatorragi kurban pangamponanna dusana sarta kurban obbaran ka PANGERAN, tape balai reya la teba ka sengko’."

²⁰ Mosa abendherragi dhabuna Harun jareya.

Imamat

Video Imamat 10

Ikuti Kami:

KONTAK | PARTISIPASI | DONASI