Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anak Harun, Nadap ras Abihu muat dapur arangna tersada. Itamana arang si gara ku je, icircirna alu kumenen, emaka ipersembahkenna e man TUHAN. Tapi api e la badia erkiteken TUHAN la merentahken kalak enda mpersembahkenca.
2 Emaka rempet ipesusur TUHAN api, janah ipan api e kalak ndai duana seh mate i bas ingan e i adep-adepen TUHAN.
3 Emaka nina Musa man Harun, "Enda me kata TUHAN sanga nina, 'Kasa kai kalak si erdahin guna Aku arus maka ipehagana kebadianKu; Kucidahken ateKu kemulianKu man bangsangKu.'" Tapi Harun sinik saja.
4 Erkiteken si e idilo Musa si Misael ras Elsapan, eme anak-anak Usiel, bapa nguda Harun. Nina man kalak enda duana, "Mari, babalah mait senina-seninandu e ndarat i bas Kemah si Badia e nari, janah tamaken i darat ingan erkemah."
5 Emaka reh kalak enda, janah alu njemak paken mait e, iangkatna duana ku darat ingan erkemah, sue ras si iperentahken Musa.
6 Kenca bage nina Musa man Harun ras man anakna Eleasar ras Itamar, "Ula ipelepas bukndu la isuri, ula icaingken pe uisndu guna nuduhken erceda ate. Adi bage perbahanndu, kam pe mate, janah TUHAN nembeh man kerina perpulungen enda. Tapi kalak Israel temanndu sebangsa ipelepas erceda ate i bas kematen kalak enda duana si jadi erkiteken api si ipesusur TUHAN.
7 Ula kam ndarat i bas pintun Kemah e nari. Adi ndarat kam, mate kam, sabap nggo kam itangkuhken alu minak penangkuhen e guna ndahiken dahin si khusus man TUHAN." Emaka iikutken kalak enda kata Musa.
8 Nina TUHAN man Harun,
9 "Kam ras anak-anakndu ula bengket ku bas Kemah Perjumpan kenca minem anggur ntah bier; adi ku bas kam mate kam. Enda me sada peraturen arus ipatuhi kerina kesusurenndu.
10 Arus ilainkenndu apai sikerajangen Dibata ras apai si ipergunaken man kalak si nterem, bage pe apai si la pantangen ras apai si pantang.
11 Arus iajarkenndu man bangsa Israel kerina undang-undang si nggo Kubereken man bandu erkelang-kelangken Musa."
12 Nina Musa man Harun ras man duana anakna si tading e, Eleasar ras Itamar, "Buat iba-iba persembahen pangan e si ipersembahken man TUHAN e, bahan lah roti si la itama ragi i bas si e nari, jenari pan i duru batar-batar persembahen, erkiteken badia kal persembahen e.
13 Panlah e i bas ingan si badia; bagin si eme sikerajangenndu ras anak-anakndu i bas pangan si nggo ipersembahken man TUHAN. E kap si iperentahken TUHAN man bangku.
14 Tapi kam ras keluargandu banci ipanndu tenten ras bites asuh-asuhen si iendesken selaku pemere khusus ras sumbangen khusus man TUHAN guna imam-imam. Banci ipanndu e i bas kerina ingan si bersih rikutken peraturen agama. Persembahen bagin persembahen persadan bangsa Israel si nggo ibereken man bandu ras man anak-anakndu jadi sikerajangenndu.
15 Bites ras tentenna arus ibaba kalak enda sanga iendeskenna tabeh-tabeh e jadi persembahen pangan man TUHAN. Bagin-bagin enda jadi sikerajangenndu ras anak-anakndu seh rasa lalap, sue ras perentah TUHAN."
16 Isungkun Musa kerna kambing guna persembahken dosa e; emaka ietehna maka kambing e nggo itutung. Erkiteken si e, merawa ate Musa man Eleasar ras man Itamar nina,
17 "Ngkai la ipanndu persembahen kerna dosa e i bas ingan si badia? Badia kal e, janah e nggo ibereken TUHAN man bandu gelah arah e teridah maka dosa bangsa Israel nggo isasapken.
18 Erkiteken darehna la ibaba ku bas Kemah si Badia e, arusna nggo ipanndu persembahen e i je, bagi si kuperentahken."
19 Nina Harun ngaloi, "Uga adi i bas wari enda nggo ku pan persembahen kerna dosa e? Banci kin e erbahanca meriah ukur TUHAN? Tuhu kalak enda mpersembahken persembahen man TUHAN i bas wari enda; ibabana persembahen tutungen, tapi kejadin-kejadin enda jadi denga kang man bangku."
20 Kenca ibegi Musa e, ia pe setuju.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA