Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Da'õ mbõrõ wa lõ tola lõ ta'oigõ dõdõda ba wangolembai famahaõ si no tarongo, ena'õ bõi tarõi wamatida.
2 Taroma li nifa'ema mala'ika khõ ndra tuada, no sindruhu, ba niha si lõ molo'õ ma sangositengagõ ya'ia, lõ tola lõ nihuku.
3 Mendrua manõ ba wangorifi sabõlõ ebua moroi ba daroma li andrõ! Na lõ ibe'e dõdõda ba wangorifi andrõ, lõ tola aefa dania moroi ba wanguhuku. Bõrõ me So'aya samõsa zi ofõna mangombakha fangorifi andrõ, ba niha si ofõna mamondrongo turia wangorifi andrõ da'õ zamaduhu'õ fa'asindruhunia khõda.
4 Baero da'õ, ba fao Lowalangi wangabõlõ'õ famaduhu'õ ndra niha da'õ ba wanga'asogõ fefu ngawalõ zahõlihõli dõdõ ba ngawalõ gila'ila, awõ ba wamaosamaosa fa'atola ni'osambalõ'õ moroi ba Geheha Lowalangi molo'õ somasi Lowalangi samõsa.
5 Lõ lasõndra wa'abõlõ ira mala'ika soroi Lowalangi ba wamatõrõ ulidanõ si bohou si so fõna dania, ya'ia gulidanõ nifatunõda andre.
6 Ba zi tambai da'õ, so sambua faosatõ bakha ba Mbuku Ni'amoni'õ no musura si mane, "Hadia niha andrõ, he Lowalangi, irege omasi Ndra'ugõ Õtõrõ tõdõ ia? Niha andrõ, ba ha niha manõ, ba Õfaigi sa'atõ ia!
7 Ba ginõtõ si lõ arara no Õbali'õ ia ha ma'ifu ide'ide moroi ba mala'ika. Õbe'e khõnia dadaoma solakhõmi ba sumange,
8 awõ wa Õbali'õ ia samatõrõ hadia ia fefu." Na law̃a'õw̃a'õ, wa Ifazõkhi niha Lowalangi "samatõrõ hadia ia fefu", eluahania, wa sambalõ gõi lõ hadõi si tenga barõ mbawa wamatõrõ niha. Ba hew̃a'ae si manõ, lõ ni'ilada iada'e niha samatõrõ hadia ia fefu.
9 Ba no ta'ila wamatõrõ Yesu! No la'ide'ide'õ Ia ma'ifu moroi ba mala'ika ba ginõtõ si lõ arara, ena'õ bõrõ wa'ebua dõdõ Lowalangi mate Ia salahi soi niha ma'afefu. Ba ta'ila Ia iada'e no tebe'e khõ-Nia dadaoma solakhõmi ba sumange, me no Itaõgõ wamakao irugi wa'amate.
10 Duhu no sinangeania, Lowalangi -- sanga'asogõ ba sondrorogõ fefu hadia ia ba gera'era dõdõ-Nia samõsa -- Ibali'õ sangefa'õ so'ahonoa Yesu, sanõrõ famakao andrõ. Bõrõ da'õ tola Idõnisi niha Lowalangi, wefao ba lakhõmi awõ Yesu. Bõrõ me ya'ia zamokai lala khõra ba wangorifi.
11 Yesu zangefa'õ niha moroi ba horõra, ena'õ tobali ira Banua Lowalangi ni'amoni'õ. Ya'ia, sangefa'õ, ba ya'ira ni'efa'õ andrõ, faoma la'okhõgõ samõsa Nama. Da'õ mbõrõ wa lõ aila Yesu wamaduhu'õ ya'ira andrõ si mane talifusõ-Nia.
12 Imane Yesu khõ Lowalangi, "U'ombakha'õ dania ba dalifusõ-Gu haniha Ndra'ugõ. Usuno dania Ndra'ugõ ba gotalua mbanua Niha Keriso."
13 Iw̃a'õ Yesu gõi, "Utou'õ dania wanõtõna-Gu khõ Lowalangi." Ba ifuli Iw̃a'õ Yesu, "Ya'e Ndra'o, awõ ndraono si no Ibe'e khõ-Gu Lowalangi."
14 Bõrõ me niha nifotõi-Nia iraono andrõ, no niha si tola mate, ba faoma ira Yesu, auri molo'õ niha si mane ya'ira. Ilau zi manõ, ba wangefa'õ niha ni'osawuyu, ena'õ ba wa'amate-Nia tola Ifakiko Gafõkha samatõrõ fa'amate.
15 Ba zi manõ da'õ I'efa'õ niha si sandrohu fa'aurira ni'osawuyu bõrõ me ata'u ira wa'amate.
16 Oroma sa wa tenga mala'ika nitolo-Nia, no ma'uwu Gaberahamo.
17 Da'e geluahania wa Ya'ia lõ tola lõ tobali fagõlõ ira dalifusõ-Nia ba ngawalõ hadia ia fefu. Ba zi manõ tobali Ia Ere Sebua khõra si lõ farõi ba sahakhõ tõdõ. Ba we'amõi-Nia enoni Lowalangi andrõ te'efa'õ horõra.
18 Ba wolau si manõ tola Itolo niha si gõna fanandraigõ, bõrõ me Ya'ia samõsa zi no irai tetandraigõ ba manaõgõ famakao.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA