1 Jete sababe itah musti toto-toto tinai mimbing kare auh ajar je jari ihining itah, mangat itah dia malihi kapercayan itah.
2 Kare peteh je inyampai awi kare malekat akan tato hiang itah jari tarang bujur toto, tuntang oloh je dia manumon atawa mamenda jete mandino hukum je ombet akae.
3 Mahin tinai dengan kasalamat je labih tamam bara kare hukum te! Amon itah dia manantuani kasalamat te, batantu itah dia tau lapas bara hukum. Basa Tuhan kabuat je sola-solake mansanan kasalamat te, tuntang oloh je sola-solake mahining te jari mambukti katoton taloh te akan itah.
4 Beken bara te Hatalla omba mandehen kasaksian kare oloh te awi Ie mawi sepsimpan taloh heran tuntang kare taloh je dia puji bahut hayak mambagi akan oloh kare panenga bara Roh Hatalla manumon kahandak Ayue kabuat.
5 Kare malekat dia mandino kuasa bara Hatalla mangat marentah kalunen taheta je akan dumah, iete kalunen je inahiu itah metoh toh.
6 Tapi hong Surat Barasih aton tarasurat kalotoh, "En kea olon te, o Hatalla, sampai ikau handak mingat ie? Olon te baya olon bewei, tapi ikau manantuani ie!
7 Hong katika je pandak ikau manjadian ie labih randah isut bara malekat. Ikau manenga akae pangkat je gantong tuntang paham ihormat
8 hayak mangkat ie manjadi panguasa mahunjun kare taloh handiai." Nah, amon insanan Hatalla mangkat olon manjadi "panguasa mahunjun kare taloh handiai", jete rimae ije mahin jaton taloh je dia hong kuasan olon. Aloh kalote, metoh toh itah jaton mitee olon te bara kuasa mahunjun kare taloh handiai.
9 Tapi itah jari mite Yesus mimbing kuasa! Ie injadian isut labih randah bara malekat, mangat tagal kahalap atei Hatalla Ie tau matei akan salepah ungkup oloh kalunen. Toh itah mite, Akae jari inenga pangkat je tinduh-impahai tuntang paham ihormat awi Ie jari manyarenan kapehe sampai matei.
10 Puna patut kea Hatalla -- je manjapa taloh handiai akan tintun kahimat Ayue kabuat -- mangkat Yesus jadi panyalamat je tinduh barasih awi Ie manyarenan kapehe. Hapan jete Hatalla tau manantiring are oloh mangat Ie tau ininduh-impahai haya-hayak dengan Yesus. Basa Ie te je mambuka jalan akan ewen mangat inyalamat.
11 Yesus marasih oloh bara kare dosae; tuntang Ie je mamparasih, dengan ewen je imparasih te, sama-sama bara ije Bapa. Jete sababe Yesus dia mahamen mangaku ewen te kilau paharin Ayue.
12 Yesus hamauh dengan Hatalla, "Aku kareh mambarita akan kare paharing-Ku tahiu Ikau. Aku kareh manara Aram hong kare pumpong ewen."
13 Yesus hamauh kea, "Aku kareh mingkes kaharap-Ku intu Hatalla." Tuntang Ie hamauh kea, "Toh Ie Aku, hinje dengan kare anak je jari inenga Hatalla akang-Ku."
14 Awi kare oloh je inyewut Awie anak te, oloh kalunen je tau matei, maka Yesus kabuat manjadi sama dengan ewen tuntang belom kilau ampin olon. Ie mawie kalote mangat tagal pampatei Aie te Ie tau mampalomos setan je bara kuasa hong pampatei.
15 Hapan cara jete Ie malapas kare oloh je hapus umure injipen awi kikeh dengan pampatei.
16 Maka tarang gitan oloh je indohop Awie te dia malekat, malengkan turonan Abraham.
17 Jete rimae Ie musti manjadi sama dengan kare paharie hong kakare hal. Tuntang tagal te Ie tau manjadi Imam Hai je baketep tuntang pamasi. Tagal gawin Aie te dosan olon tau iampun.
18 Tuntang awi Ie kabuat puji manyarenan kapehe tuntang iningkes, maka Ie tau mandohop oloh je buah tingkes.

Studi Alkitab lengkap, silahkan lihat Alkitab SABDA :: Ibrani 2
Studi Alkitab mobile, silahkan lihat Alkitab Mobi :: Ibrani 2

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke