Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ineh punneh petulu tau ngerawé ratnan amung-amung luk pangeh pindenger ineh, pad tau na miak uen ngeraruh.
2 Pangeh ginala' bala luk bila melaikat ineh matu, idi idé-idé luk na nemaya ineh inukum maya' luk kikemneh.
3 Kudeng apehké tau miak mepuit kudeng tau na ngerawé ulun luk kudeng ineh rayeh? Tuhan pun-pun nemada' ratnan ulun ineh, idi lemulun luk neninger balaNeh nengegala' kuan tau ratnan bala ineh matu.
4 Idi teh Allah nengedengan luk nekali'deh ineh dengan tanu'-tanu', idi kekamen luk nan mawa idi anid-anid kekamen luk melalud. Idi Ieh nemaré baré Roh Meligan, maya' pianNeh sebuleng.
5 Allah na nengecuk melaikat ngimet tana' luk pidutenNeh, luk tau ngerawé nekini.
6 Iamo' maya' kudeng luk bila bang Surat Allah, kebalaneh, "Anunké lemulun pad Tuhan ngerawé neneh, idi anunké anak Adam, pad Tuhan ngikak neneh?
7 Bang segageh Iko nenganau' neneh sesuut beneh ratnan melaikat; Iko nemaré rayeh idi dita' ku pataNeh.
8 Iko nengeletep neneh mangun ku raca' pa luun luk amung-amung." Kebalaneh, Allah nengeletep lemulun mangun ku "raca' pa luun luk amung-amung," ilungneh luk amung-amung. Iamo' nekini na tau nier lemulun mangun ku raca' pa luun luk amung-amung.
9 Iamo' tau nier Yésus luk segageh inau' sesuut beneh ratnan melaikat ineh, pad dengan katu Allah Ieh miak maté kuan amung lemulun. Tau nier Neneh nekini dengan pata rayeh idi dita' ngaceku até luk pangeh binabehNeh.
10 Maya' pian Allah luk nemudut idi luk ngimet luk amung-amung, petulu Yésus uen ngeriput ku dereh, pad Ieh miak nguit mula' anak amé' inan rayehNeh. Ngaceku Yésus, Ieh ineh lawa ulundeh.
11 Ngaceku Luk ngeligan idi luk linigan ineh pana', amung-amung ineh ratnan Sebuleng mo' punneh; idi ini punneh Ieh na migu' neten nedeh kinanak,
12 kebalaNeh, "ui sikal mada' ngadanMu, O Allah, kuan kinanak-kinanakKu; Idi arang sidang Ui miak ngubur Namu."
13 Idi teh, kebalaNeh, "Ui ini miak merapet Neneh." Idi teh, kebalaNeh, "Siruh, Ui ini dengan anak-anak luk biré Allah kuanKu."
14 Ngaceku anak-anak ineh lemulun luk inan uang idi dara', Yésus pana' nengalap burur luk kudeng ineh, pad ratnan atéNeh Ieh miak nala' neneh luk ngimet lalud até, ieh ineh Iblis,
15 pad Ieh miak muit tuda'-tuda' lemulun luk mangun ku demulun ruked-ruked ulundeh ngaceku matot ku até.
16 Megala' baken melaikat luk denganinNeh iamo' inul Ibrahim.
17 Ilungneh, na miak na Ieh ruen mepad kudeng kinanak-kinanakNeh bang luk amung-amung, pad Ieh miak mangun ku Imam Rayeh luk méi' idi lutep maya' jani', pelé pupuNeh ineh bang kekamenNeh kuan Allah miak ngalap do' ratnan sala'.
18 Nekini Ieh miak ngedengan lemulun luk tetunin ineh, ngaceku Ieh sebuleng pangeh pidereh idi tinutun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA