Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iaté lulunia buítá bulat sibulatnia sibara ka paatuatta taomet'aké kam ngantoman siarepta, bulé tá tagalak'aké kam katonemietta.
2 Aipoí sangamberinia patonekat Taikamanua sisegéakenenda samalaika ka tubudda taikebbukatta, bulat sibulatnia; oto sangamberi sitaitut'aké nia elé sitaireddet nia, rasisiló ukuman siripot sigalaiakenenda.
3 Sarapei puaragat sabeu belé peilé ka sikuat patonekat nenda! Ké mamit bagatta ka puaragat néné, kirénangan tá tukakatsli sita ka ukuman néné. Aipoí bulat tubut Tuhan lé boikí amasipakakra pagalaiat puaragat néné, samba sia sipasiaarep boikí arabuktiakéan pububulat sibulatnia néné, ka tubutta.
4 Paobánangan pei bagei ai lé iroron'aké Taikamanua simuneng'akenenda néné, iaté aigalai sene ngamata kerek samba kiseiet sabeu, samba iparubei panguruat Ketsat Sipunenan siripot teú bagania.
5 Tá arasiló gege ka sia samalaika sibara ka Taikamanua, bulé rautéaké polak sibau ka gogoi sibabara, iaté polak patibojietta kineneiget.
6 Iageti mitsá ka sanga rubeiat ka bagat Buko Sipunenan ai atusurat'aké kisé, "Kasonia poi nia sirimanua néné, ale Taikamanua, pat koí repdemnungan nia? Sirimanua, nia né nia, sirimanua, tápoi ainupasisikeli nia!
7 Ka oggak siteté lé, anubailiuaké nia makarepé goisó tiboi tubunia, ka tubudda samalaika. Anukau ka sia tiboi tubu sabeu sambat simahormat,
8 samba leú et anupauddet nia masikup-kup'aké sangamberinia." Oto ké tukua aipauddet'an sia sirimanua, Taikamanua "bailiu sikup-kup'aké sangamberinia," katukolobatnia sangamberinia táan anai tá ka bagat kupkumen sirimanua. Tápoi kenanen kisedda, tá leú et aitaiitsó kam sia kineneiget sirimanua rakup-kup'aké sangamberinia.
9 Tápoi ka sia geti Jesus, ataitsóan kam aipuuté! Kirénangan aikau nia makarepé goisó tiboi tubunia ka tubudda samalaika ka bagat oggak siteté, bulé ka erut bagat Taikamanua oi imatei punu tubudda sangamberi taikapolak. Taitsó nia kineneiget aikau ka sia Taikamanua tiboi tubu sabeu sambat simahormat, néné kalulut pangongorik nia pat matei.
10 Kirénangan amateúan ka sia Taikamanua sipasibabaraaké sangamberinia siripot sipinaatunia sarania, ikau Jesus sipaarau bulat sipulelelek, kalulut pangoringannia. Bulé kalulut nenda bailiu maigi sirimanua ináná Taikamanua bulé tulatsat'aké sia sambat Jesus. Aipoí nia lé sipasibubuká enungan ka tubudda, bulé ioi ituarauaké sia.
11 Ipaliná sia Jesus sirimanua néné ka jodda; oto nia sipasililináaké samba sia sipaliná nia, sisara Ukkuian lé sia. Iaté lulunia tá imamaila Jesus ioniaké sia néné, sasarainania.
12 Aikua Jesus ka tubut Taikamanua, "Kupopoiliat ka sasarainangku pagalaiat tubum. Kuumun'aké onim ka parurukatda."
13 Aikua leú et Jesus, "Kukakaroni nia baga Taikamanua." Iageti aikua leú et mitsá Jesus, "Aikoí aku, sambamai tatoga siaket Taikamanua ka tubukku!"
14 Kalulut ka sia néné oniakenennia tatoga, makluk simamateiet lé, oto bailiu ka sia Jesus leú, keréakénangan tubunia ka tubudda; iageti purimanuanangan, kelé puririmanuanda sirimanua. Aigalaiaké nia geti kelé néné, Jesus, bulé kalulut kamateiatnia, pakataínangan leú et geget Sanitu, siutéaké kamateiat.
15 Bulé kaenungan kelé néné, belaakénangan sia siparimanuaaké pulolotó ka kamateiat, ka sanganantat purimanuaiatda.
16 Oto kolou, tá malaika airop'aké, tápoi sapunuteteu Abraham lé.
17 Katukolobatnia sené, iaté buítá makeré nia ka tubudda sasarainania ka sangamberinia. Samba kalulut néné, oi ibailiu nia Imam Sabeu simatopit sambat simakaté baga. Kalulut pasikelatnia, oi ituappéaké jodda sirimanua.
18 Samba kalulut ka sia leú et amangorik samba aiorak nia pasisiboat, bailiu oi irop'aké sia siorak pasisiboat; beri nia ka sia leú poí, aiorik'an pasisiboat sambat pangoringan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA