Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dangga hang, sug Allah esedeb maman naugb maireseb menau geb huhugb dag ginohob, kaba, en emouwan naugb sug maman mamoc dou mamums dougwo mer misen areg len lesai dou maman sug nosa ginero. Doba en ouwan dag maman mai mamums naugb augwan gini dara geigouhw terimda. Dauntoba maman mamedreg dau usi maireseb menau geb huhugb gin touwero, doba maman madebeij namcir.
2 Anai gareg en emaimo Allah men gomnomna areg en eic dou maman mamjemouwer ogdoc malaikad sug nosa ginero, doba en eicara baihagab terimda, kaba, len leic gogom dou en, aimo dau enin men geicara ingga an en toua. Anai Allah ens ainyes dag areg en eic dou len gin, kaba, augwan se geica namcirohob.
3 Sug lusud leic gogom dou sud hom areg en edreg dau Musa men gomnomna dag ginohob, kaba, yen youdesa dau sug maman mamei mamums naugb Allah en mer an maireseb menau geb huhugb mera eisaugb ginero, kaba, dag gogom emeb naugb maman touweroei? Naro. Maman mamarges dau gin touwero, doba gogom medam edreg dau gin eb naugb maman toua namcir. Anai en emesa en mer eisaugb maireseb menau gini dou maman emogdoc malaikad lenero. Doba maman Adehsud enin eng esai dau augwan gini teisis dou men logodeh sug aimougtutohob. Hang len lemesai mer gini dou maman. Dara len louma debin dag areg len lesai gin, kaba, augwan se geica namcirohob.
4 Anai Allah enin eng aben gansins dara ganusbus einyana auma debin meren gebedbed gin toua. Hanoba en esa Mena Gogoufu se maman mamdoc mes naugb en eic aremer aingma aingma dag gansins debin gin dou maman toua, aimo dau areg enin ouwan dous.
5 Dangga hang, naugb maireseb menau geb huhugb gin, kaba, Allah emeigdoumesa malaikad hom ingma edag mougt mera medam naugb ginero. Doba en eigdoumesa maman eng madag mougt mera medam naugb maireseb menau geb huhugb ginohob. Anai areg dan den dou yen graga, kaba, emeisaugb maman mamireseb se cinogo ginero. Doba eisaugb mamireseb menau gen daiyamo se lona gacin dous.
6 Augwan gini esogwa deisa areg sud hom, moho Daud, en erba Ugwaremer deb se Surad Injil Meb Mohon eisaugb maman deb sug nosa touohob, endagai: Adehsud Allah, emen, kaba, emen emedag lusud misen dous. Doba ban abdoc eiseisan dara eineg an emen terimda. Hang ban bemeigdoumesa emen emoho agas medam deseino banohob.
7 Anai iteitogin, kaba, emen emoho eb tainya malaikadir len meroho dousaba, doba cum, kaba, ban besedeb naugb ban bogugwo aban gogouf cucugb ingma dou emen toua namcir. Dara ban beigdoumesa emen emoho. Hanoba ban beic goubesa dou emen naugb sug emen emedag mougt mera medam naugb areg ban bahasesei dara besinsin augwan toua namcirohob. Doba sug sud hom gerba Ugwaremer en enara dag Allah eigdoumesa maman mamoho naugb augwan dag ginohob, kaba, gini meijouhw dag ara hom emeb naugb enin touwero. Doba augwan eb tainya mamanohob. Sug Allah esedeb augwan gini naugb mamanohob, kaba, gin dag maman madag mougt mera medam naugb augwan dag misenohobei? Naro, maman mameiya augwan gini dag misen touebma.
8 (2:7)
9 Doba maman maiya Yesus dau sug en aimo ucina mog erij aud gomom naugb lusud laugwanohob, kaba, dag Allah ogugwo men gogouf cucugb. Hanoba eigdoumesa en moho agas medam dag misen touohob. Anai Allah owun en moho eb tainya malaikad len meroho dag gini cum cum dous. Dauntoba en omom naugb lusud laugwan, aimo dau areg Allah en medoc esgiraha an ginohob.
10 Allah ouci ucina mog erij aud gomom naugb Yesus dag gini, anai ucina hom gin dous eng edeinyum naugb sug maman mainesa bogo. Hang en emogod an deb naugb sug Yesus aimo ucina mog erij. Dauntoba sug en aimo ucina mog erij gini terimda sug ouwedocohob, kaba, en ahwan lusud leinyana naugb len leigtou desij en se men gogouf cucugb gin toua namcir. Anai Allah gin, kaba, en ahasesei, dara en esinsin augwan. Hanoba en esedougwo augwan dara geigouhw toua, dauntoba ec dara gesgiraha namcir. Dangga hang, Krisdus enin eng edag sud hom geinoisa len se ucina gin naugb sug Allah eigdoc len dau sesar men gogom augwan aud maireseb menau geb huhugb gin dous.
11 Sug en edu maman, hanoba en ouci maman debinim dag ginohob, kaba, maman mamedag susugb dau en toua deitero. Doba sud hom gedu len dara len gedig en edu lenohob, kaba, len laugwan Merna Allah hom dous. Dangga hang, igdebes emeba en an len touwero. Doba en eigdoumesa len meroho dag en magtor dara medemeitor laugwan toua namcir.
12 Augwan gini esogwa deisa areg Yesus enara deb se Surad Injil Meb Mohon dou Allah deb sug nosa touohob, endagai: Dan demens dau aban geicara augwan dou dan indagtor dara indameitor len laugwan. Dara sug len loucimdeb naugb leisa Ari, kaba, dan demeigdoumesa ban aboho deseino len toues.
13 Dara en enara deit, endagai: Danin toua dod indina debsa Allah, bani, aninim dag dan indagtor dara indameitor len toua lod merna debsa banohob. Hanoba en enara ucan gin deit, endagai: Danin indugwenggini an indan logodeh gedig Allah ban beic dou danohob, len laugwan toua.
14 Dangga hang, sug len gedig en eija len dag men logodeh len laugwan ledag lusud misen teiteiyohob, kaba, enin toua ouwaden dau bogo naugb en edag lusud misen desij len toua. En eicara dag gin, dauntoba sug en omom taiba sogo salib naugb meren sesarohob, kaba, en esma Bilis men goubesa augwan dau en. Dauntoba en emeic gomom dou lusud gin deitero, doba en arges dau len namcir. Anai sug nosa, kaba, Bilis gini en mobisamougb naugb en eic gomom dou len laugwan terimdohob.
15 Sug en esma Bilis men goubesa augwan dau en dag ginohob, kaba, Bilis emagaigeij len dag sogougb toua deitero. Doba Krisdus eigdoc len laugwan dau en mesira mesohob. Anai se meren lona augwan, kaba, len lahau dau sug en eic gomom dou len. Hang emeic dag len lemedag sogougb dou en toua terimda.
16 Sug en eicara dag ginohob, kaba, gini ens ainyes dou maman dag en emouwaden dau bogo naugb malaikadir touwero. Doba en ouwaden dau bogo naugb en eigdoc maman masud misen dous. Augwan gini esogwa deisa dau areg Yesaya en og deb se Surad Injil Meb Mohon deb sug nosa touohob, endagai: En emen naugb len gusero. Doba en en naugb en ousa Abraham medebeitor len dous.
17 Sug en en naugb en ousa Abraham medebeitor maman dag ginohob, kaba, esloulougb medam naugb en edag lusud misen, aninim dag en magtor dara medemeitor maman se aremer augwan. Dauntoba en edag maman Gembala Gesa Taij Moho Agas deseino Allah naugb maman toua. Anai ucina gus naugb sug en ogod maman aremer deseino Allah, kaba, ingmaro. Doba hom gin dous. Dara esloulougb naugb en emarges dau gin touwero. Doba en aimo augwan gini an maman dara en medoc hom. Hanoba en medoc eineg an maman toua terimda. Anai sug en eicara dangga, kaba, eic dag Allah aigdougwo maman sesar. Dara en eic gesgigouhwesa dou maman ucugb toua namcir.
18 Dangga hang, sug Bilis ainyen Yesus enin, dara en aimo ucina mog erij dag gin touohob, kaba, edeinyum naugb en ousa maman sug Bilis ainyen maman toua. Anai en emobsara dou Bilis mougwa hom touwero, doba en es agadgeij namcirohob.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA