Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ual᷊ingu ene i kitẹ e hinong kahěnga-hěngang něngalembong mẹ̌tumpaedẹ̌ su manga těntiro kụ seng kinaringih'i kitẹ, tadeạu kumbahang i kitẹ maněntangu pangangimang i kitẹ e.

² Manga hengetang kụ pinakihabarẹ̌ su manga malạekatẹ̌ su manga i upung i kitẹ e nal᷊ahẹ u mambeng kahěngang, kụ i sain tawe tumol᷊e arau tumuhụ e sarung makaěbạ hukumang tuhụ kasěllahu ral᷊awange.

³ Limembo kate kasasal᷊amatẹ̌ kụ napal᷊iung kasěllahe wọu manga hengetang ene! Kereu i kitẹ e sarung tawe makakatal᷊ang bọu hukumang. Batụu kai Mawu sẹ̌sane kahumotong-motongange namohangu kasasal᷊amatẹ̌ ene, ringangu i sire nạung kal᷊amona nakaringihẹ̌ e seng napakal᷊ahẹ u katěngade si kitẹ.

⁴ Su sěmběkane, Mawu Ruata e mal᷊aing napakasěgadu sasahidin sire, kụ nẹ̌koạ e kal᷊awọu haghing hal᷊ẹ̌ makạdal᷊inaụ dingangu munarang kawasa ringangu apạmal᷊awuhẹ̌ manga l᷊aonggọ u Rohkẹ̌ u Ruata e tuhụewe kapulun'E hala.

⁵ Manga malạekatẹ̌ e tawe nakahombang kawasa wọu Mawu Ruata waugu mẹ̌parenta dunia wuhu sarung duměnta, kụ kai dunia e ipạhumbisarang kitẹ ini e.

⁶ Arawe su sěmběkane, piạ su sěmbahageang u Winohẹ Susi e kạbawohẹ kere ini, "Apa wue taumata e Mawu, hakịu i Kau mang mětẹ̌tahěndung si sie? Taumata e kětạengbeng taumata, kaiso kai mambeng sẹ̌sěmpikang u!

⁷ Kětạeng gěnnangu sěngkatempo i Kau napakasanạ i sie kadodọ bọu malạekatẹ̌. I Kau e nangonggọu kal᷊aianeng mawantugẹ̌ dingangu maadatẹ̌ si sie,

⁸ dingangu napakariadin sie měngẹ̌ngawasa patikụ." Kụ kamageng u niwera u Mawu Ruata e něndiadi taumata "mangangawasa patikụ sạbarang", mangal᷊ene ute tawẹ u tamasěllung su al᷊ungu kawasang taumata. Manilaing kerene, kaiso i kitẹ e tawe nakasilo ini e taumata mangangawasa patikụ sabarang.

⁹ Arawe i kitẹ e kai seng nakasilo Mawu Yesus e kawe kawasa! I Sie nipakasanạ kadodọ bọu malạekatẹ̌ e gěnnangu sěngkatempo, tadeạu ual᷊ingu kapian naungu Ruata e, i Sie kai nate waugu patikụ taumata. I kitẹ makạsilo si Sie orasẹ̌ ini e nighěllirangu kal᷊aianeng mawantugẹ̌ dingangu maadatẹ̌, ual᷊ingu i Sie seng nẹ̌tatahang u sigěsạ sarang napohong.

¹⁰ Sembeng hinone Ruata -- e něndiadi patikụ tuhụ kapulun'E sẹ̌sane napakariadin -- Yesus mananal᷊amatẹ̌ masukụ ual᷊ingu kasasigěsạ e. Dingangu ene tangu Ruata e makạboghe taumata l᷊awọ mědeạu ipakawantugẹ̌ dingangu Mawu Yesus. Batụu kai i Sie nanope ral᷊eng baug'i sire mědeạu ipakasal᷊amatẹ̌.

¹¹ Mawu Yesus namurẹ̌si taumata wọu manga rosan sire; kụ i Sie měmamurẹ̌sine ringangu i sire niwurěsin'E e lawọ piạ i Amang i sire mang sěmbaụ. Ual᷊ingu ene Mawu Yesus e tawe mamea mangakun sire ene kere anạ u sěmbaụ'E.

¹² Mawu Yesus něhengetang su Mawu Ruata, "Iạ sarung měhabarẹ̌ si kamene manga anạ u sěmbaụ mạanung Kau. Iạ e sarung mẹ̌dalo si Kau su ral᷊ungu komol᷊ang'i sire."

¹³ Mawu Yesus mal᷊aing něhengetang, "Iạ e sarung mangumbala su Mawu Ruata." Dingangu i Sie mal᷊aing něhengetang u, "Kai ini e Iạ, dingangkewelain manga anạ kụ seng nionggọ u Ruata e si Siạ."

¹⁴ Ual᷊ingu taumata apan nisěbạ'E anạ ene, kai riadikang taumata kụ mẹ̌tate tangu Mawu Yesus sẹ̌sane e nẹ̌těngkasul᷊ung i sire e kụ měbẹ̌biahẹ̌ su ral᷊ungu kakakoạ u taumata. I Sie měkẹ̌koạ kerene, tadeạu ual᷊ingu kapapohong'E, i Sie mapạkawinasang setang ěndaị mạngawasa papate.

¹⁵ Dingangu kakakoạ ene tangu i Sie měngambang taumata kụ su kanandum pẹ̌bawiahe ipětẹ̌tahuěllang ual᷊ingu katatakụ u papate.

¹⁶ Nal᷊ahẹ e kai wal᷊inewe malạekatẹ̌ kụ nịlaambang'E, kaiso kawe hiteng Abraham.

¹⁷ Ini e mangal᷊ene u i Sie hinom makoạ mẹ̌sul᷊ung dingangu manga anạ u sěmbaụ'E su ral᷊ungu patikụ sạbarang. Kụ ual᷊ingu ene i Sie makoạ Imang Mawantugẹ̌ masatia ringangu matal᷊ěntụ. Ual᷊ingu pẹ̌tatangkiang'E ene tangu rosan taumata e niampungang.

¹⁸ Kụ ual᷊ingu i Sie sẹ̌sane nạung bọu nasigěsạ dingangu nisal᷊ukateng, i Sie nakakaontol᷊ẹ̌be taumata apang kẹ̌kasal᷊ukateng, batụu i Sie hala e wọu kinasal᷊ukateng dingangu wọu nasigěsạ.

Ibrani

Video Ibrani 2

Ikuti Kami:

KONTAK | PARTISIPASI | DONASI