Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O komi to Galatia, komi tau bea! Maka pei komi mampodongeka gombo ntau to ojo mangakal komi pei mangkeni yau komi yako ri jaya to monso? Tempo ruyu komi manasa kojo batuanginya kapate i Yesu Kerisitu ri kaju pasape. Kanasanya resi komi etu sewaju ewa kanasanya resi tau to matamanasa mpalaong etu.
2 Wali tempo etu komi manasa kojo samparia rasi to nurata ngkomi naka pei komi mangarata apa saba pangaya ngkomi ri kapate i Yesu. Sewaju ewa tempo komi mangantima i Nosa Mapasing. Wali re’e samba’a pampotanakangku resi komi. Etu semo, ane tempo komi mangantima i Nosa Mapasing seore, wimba, komi mangantima apa saba mangalulu porenta i Musa, bara apa saba mangaya kareba matao to rapakarebaka resi komi? Gete, manasa kojo komi mangantima i Nosa Mapasing saba yako pangaya ngkomi semo!
3 Wali maka pei komi bea? Ri pomulanya, tempo komi owo mangaya i Pue, tempo etu komi mansarumaka pansawang i Nosa Mapasing. Pei si’i-si’i komi jamo mansarumaka muni palaong ngkomi see katuwu ngkomi damawali masilonga.
4 Kamonsonya boros kojo kasesa to nurata ngkomi yako ri temponya komi mangaya. Pei nempo ewa see, pangaya ngkomi resi i Pue maroso kojo seore. Wali gete, kesaa batuanginya komi mampiyaika yau pangaya ngkomi etu?
5 Pasi ane mangkonong i Nosa Mapasing, i Pue Allah roomo mangawaika komi NosaNya, pasi Ia re’e mangika palaong to taa rapobiasa ri oyo ngkomi. Pei si’a apa saba komi mangalulu porenta i Musa naka pei Ia mangika palaong to ewa wetu. Ia mangika palaong etu apa saba komi mangaya kareba matao to rapakarebaka resi komi.
6 Wali ewa see seja to mawali resi i Abraham tempo owi. Apa re’e ratulis ri raya ntuntu i mPue Allah mangkonong ia, to’onya, “I Abraham mangaya i Pue Allah, wali saba yako pangayanya etu see naka ia nato’o i mPue Allah tare dosanya.” Etu semo to nato’o ntuntu i mPue Allah.
7 Wali to tao-tao komi manasa kojo i sema-sema tau to mangaya i Pue, tau etu semo to rato’oka wiyaa i Abraham.
8 Pasi tau to si’a to Yahudi, sira seja maya rato’oka wiyaa i Abraham. Apa ri raya ntuntu i mPue Allah re’e to ratulis yami to mampakanasaka kita pasiwa tau to si’a to Yahudi, ane mangaya, ia danato’o seja i mPue Allah tare dosanya. Apa i Pue Allah mampakarebaka yami i Abraham kareba matao, Ia manganto’o, “Yako korom Aku damampakasanang samparia bansa nto lino.” Etu semo to nato’oka i mPue Allah i Abraham.
9 Wali i Abraham mangaya i Pue Allah see naka ia napakasanang i mPue Allah. Pasi ewa see seja samparia tau to mangaya rapakasanang sindara-ndara pei i Abraham etu.
10 Pei ane rapanya kita mangarata kasanang etu apa saba mangalulu porenta i Musa, ane ewa see si’a pangaya to pu’unya. Palaong ngkita mangalulu porenta etu semo pu’unya. Apa re’e ratulis ri raya ntuntu i mPue Allah, manganto’o, “Ojo tau to mangalulu kojo samparia to nato’o mporenta i Musa, ojo tau etu damangarata katuwu apa saba mangalulu porenta etu.” Etu semo to nato’o ntuntu i mPue Allah. Pei manasa kojo tare tau to nato’o i mPue Allah tare dosanya ane ojo saba ia mangalulu porenta i Musa. Tau rato’o tare dosanya saba yako pangayanya semo. Apa re’e seja ratulis ri raya ntuntu i mPue Allah, manganto’o, “Tau to nato’o i mPue Allah tare dosanya, tau etu damangarata katuwu apa saba pangayanya.” Etu semo to nato’o ntuntu i mPue Allah. Wali samparia tau to rani nato’o i mPue Allah tare dosanya apa saba sira mangalulu porenta i Musa, tau etu natanaa i mPue Allah apa sira taa nakurang mangalulu samparianya. Apa re’e to ratulis ri raya ntuntu i mPue Allah to manganto’o, “I sema-sema tau to taa mangalulu kojo samparia porenta to ratulis ri raya mporenta i Musa, tau etu natanaa yau i mPue Allah.” Etu semo to ratulis ri raya ntuntu i mPue Allah.
11 (3:10)
12 (3:10)
13 Pei tare pasi samba’a kita to takurang mangalulu samparia to nato’o mporenta i Musa etu, see naka kita samparia natanaa i mPue Allah. Pei kita tilapamo yako ri tanaa etu apa i Kerisitu mangabolos kita. Ia mangarata tanaa etu singkonong ewa to ratulis ri raya ntuntu i mPue Allah to manganto’o, “I sema-sema tau to rapaku ri kaju pasape, batuanginya tau etu natanaa i mPue Allah.” Wali tempo i Yesu rapaku ri kaju pasape, tempo etu Ia kono tanaa etu.
14 Wali naka pei i Yesu Kerisitu mangika palaong to etu, see kasanang to naparajanjika i mPue Allah resi i Abraham maya narata seja ntau to si’a to Yahudi. Etu semo kita rawaika i Nosa Mapasing to naparajanjika i mPue Allah etu. Kita mangarata apa saba pangayanta.
15 Wali a’i-a’i, aku mamporapaka ewa si’i, nempo to lino ane mangika parajanjinya resi sa’e, ane roomo rapakatantu, ane ewa see, tamore tau to maya mangawali bara mangadugangika bara kesaa ri parajanji etu.
16 Wali taa manto’o parajanji to naika i mPue Allah resi i Abraham pasi wiyaanya. Pei si’a wiyaa i Abraham to boros to naparajanjika i mPue Allah etu, wiyaa i Abraham to samba’aja, batuanginya i Kerisitu semo.
17 Wali ewa si’i to aku rani mampakanasaka komi mangkonong parajanji etu. Re’e parajanji to naika i mPue Allah resi i Abraham tempo owi, pasi parajanji etu roomo napakaroso i mPue Allah. Pei yako etu, ojo kagananya opo atu pei togo mpuyu nto’u, i Pue Allah mangawaika wo’u i Musa porentaNya. Pei si’a batuanginya parajanji i mPue Allah resi i Abraham etu tamo re’e. Nempo re’e porenta i Musa, pei parajanji i mPue Allah resi i Abraham tiroo maroso, pasi Ia taa maya taa mangabanang parajanjiNya etu.
18 Apa ane yako mangalulu porenta i Musa semo naka pei kita mangarata tila to napakatantuka i mPue Allah kita, ane ewa see tamore batuanginya parajanji i mPue Allah. Pei si’a ewa wetu. Rapanya ewa to mawali resi i Abraham tempo owi. I Pue Allah buya rayaNya mangawaika i Abraham tila to Ia room mampakatantuka ia. Naka pei buya rayaNya mangawaika ia, saba mangabanang parajanjiNya, si’a apa i Abraham mampalaika Ia. Wali manasa resi kita, naka pei kita mangarata tilanta etu saba yako parajanji i mPue Allah semo.
19 Wali ane ewa see, maka pei i Pue Allah mangawaika tau porentaNya? Kesaa batuanginya porenta i Musa etu? Ewa si’i batuanginya. Porenta i Musa nadugang i mPue Allah see to lino damanasanya mangkonong dosa nsira, etu semo sira mangewa porenta to Ia mangawaika etu. Pei songka i mPue Allah mangadugang porenta etu danalulu ntau sampe rata tempo kama’i mbiyaa i Abraham to mangabanang parajanji i mPue Allah resi i Abraham. Wali re’e pasisalanya tempo i Pue Allah mangawaika tau parajanjiNya pasi tempo Ia mangawaika tau porentaNya. Apa porenta etu nakeni mpomakau i mPue Allah resi i Musa, panewa yako etu i Musa semo mawali to mamponsaruka sira mamporata porenta etu resi tau to tempo etu to damangaluluka porenta etu.
20 Pei tempo i Pue Allah mangika parajanjiNya resi i Abraham, tempo etu Ia semo to mampogomboka i Abraham. Tare to mamponsaruka wo’u tempo etu apa to mangika parajanji pasi to mangabanang parajanji etu paka i Pue Allah semo.
21 Wali wimba, porenta i Musa bara mangewa parajanji i mPue Allah? Taa kojo! Apa parajanji i mPue Allah pasi porenta i Musa wungka yusa batuanginya. Naka pei re’e parajanji i mPue Allah see tau maya mangarata katuwu. Apa ane bara re’e porenta to maya mangawaika katuwu resi tau to mangalulu, ane ewa see porenta etu semo to maya mawali jaya see kita danato’o i mPue Allah tare dosanta.
22 Pei porenta taa maya mangawaika kita katuwu. Apa porenta to ri raya ntuntu i mPue Allah, porenta etu semo to mampakanasa samparia to lino paka ri ara ngkuasa nu dosa. Wali naka pei i Pue Allah mangawaika tau porentaNya see manasa kojo resi kita ojo samba’a jaya daralapa yako ri kuasa nu dosa. Etu semo mangantima sora to Ia roomo mamparajanjika resi tau to mangaya i Yesu Kerisitu. Wali ojo tau to mangaya semo to mangarata parajanji etu.
23 Wali tempo ruyu, tempo tawa rata i Yesu Kerisitu to danasarumaka ntau, tempo etu kita ewa tau to ratarungku apa nakuasang mporenta i Musa. Wali kita tawa maya mampiyaika porenta etu sampe rata temponya i Kerisitu mampaponsanika kita jaya, etu semo pangayanta ri palaong to roomo inikaNya ri kaju pasape.
24 Wali porenta i Musa raporapaka ewa guru to mampotundeka kita tempo tawa rata i Kerisitu, see tempo Ia rata kita mangansani marapi sawang resi Ia, see kita maya nato’o i mPue Allah tare dosanta apa saba kita mangaya i Kerisitu etu.
25 Pei si’i-si’i naratamo temponya kita mangaya palaong to roomo naika i ngKerisitu etu, wali porenta i Musa si’amo guru ngkita.
26 Wali komi seja paka ana i mPue Allah apa saba pangaya ngkomi resi i Kerisitu Yesu.
27 Apa komi roomo rabaptis rapasimba’a pei i Kerisitu, pasi tempo etu komi raporapaka ewa mamposunsuka baju to bou. Wali i Kerisitu semo to raporapaka ewa baju to nuposunsuka ngkomi etu.
28 Wali apa saba komi samba’a pei i Kerisitu, batuanginya komi seja rapasimba’a. Wali ane ri pangkita i mPue Allah tare pasisalanya to Yahudi pasi tau to si’a to Yahudi. Pasi tare pasisalanya watua pasi tau to si’a watua. Pasi tare seja pasisalanya to langkai pasi to we’a.
29 Pasi ane komi i Kerisitu Puenya, batuanginya komi seja wiyaa i Abraham. Wali masipato komi mangarata seja tila to naparajanjika i mPue Allah ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA